Yehosua 18
18
Nsugan Dxeral Duma Pnswayan Rudan
1Msuupu msseli Siylo ka kana seediq Israel. Kiya de phyegun daha hiya ka mrtaso kobu. Dxeral kiya we wada daha ngalun da. 2Ini sugi dxeral ka msngari 7 pnswayan rudan Israel nana. 3Rmengo seediq Israel ka Yehosua: “Dxeral bnege na yamu ka Utux Tmninun, Utux Baro pusu rdrudan namu we, mptara namu betaq knuwan msgcuqi ini namu osa mangal ho? 4Geegi pn3 heyi peeyah pnswayan rudan, kiya ka skgulun mu. Dheya we daun daha mkkesa ka dxeral hiya. Spuyu na ngngalun txtaxa pnswayan rudan matis ma, meeyah brinah yaku hini dungal ka dheya. 5Sm7 daha maasu ka dxeral. Meniq nniqan daha quri toma ka Yehudah. Yosehu we meeniq nniqan daha gaga tgbaro. 6Bobo mnhedu sm7 daha maasu ka dxeral de, asi namu ka desun berah mu hini ka pnatis namu. Mpooda ku blebil qreti dyamu meniq berah Utux Tmninun, Utux Baro ta. 7Uxe sugun dxeral ka seediq Lewiy ckceka namu. Ado qqpahun msapuh Utux Tmninun we, kiya ka pusu dnoi daha. Pnswayan rudan Gad, Reuben ma, dmeka Menaseh we gaga maangal dxeral nklaan hido yayung Yarden hiya, kiya ka bnege Moseh tnqliyan Utux Tmninun ka kiya.” 8Gisu mmaha matis dxeral nii ka dseediq we, rmengo dheya ka Yehosua: “Sai mkkesa kana ka ddxeral hiya. Bobo mhedu namu matis de, eyah yaku hini dungal. Meniq ku Siylo hini, mpsmalu ku blebil qreti yamu meniq berah Utux Tmninun.” 9Kiya de wada ka dheya. Daun daha mkkesa ka dxeral kiya ma, spooda na lualang hiya psnakun daha mn7 ka dxeral hiya. Spatis daha patis de, meyah Siylo kobu Yehosua hiya. 10Kiya de Yehosua we meniq Siylo smalu na blebil qreti berah Utux Tmninun ka dheya. Kiya de Yehosua we spooda na pnswayan rudan seediq Israel maasu dxeral meeniq hiya.
Dxeral Nsugan Binyamin
11Pnooda blebil qreti nangal daha pnswayan rudan Binyamin we, gaga cenga lqlaqi laqi Yehudah ma Yosehu. 12Ayus dxeral daha tgdaya we peeyah yayung Yarden, mquri mcherus Yerixo tgdaya ma, mquri pryaxan hido betaq ddgiyaq ma, msderux betaq tadus brenux Bet Awen. 13Ayus dxeral nii we peeyah hiya mquri toma moda Luj, msderux betaq mcherus Rus. Rus we kiya ka Beytel. Dungal we mquri toma betaq Atrot Adar ddgiyaq toma Bet Xoron. 14Ayus dxeral nii we mqquri pryaxan hido ma, sgperiq mquri toma, kiya ka peeyah Bet Xoron mqquri toma sipo ddgiyaq, msderux betaq Qiryat Baal, alang seediq Yehudah. Qiryat Baal we kiya ka Qiryat Yearim. Kiya ka ayus dxeral quri pryaxan hido ka nii. 15Quri so toma we peeyah ayus dxeral puting Qiryat Yearim, mquri pryaxan hido hmrinas betaq pusu qsiya Neptoax. 16Ayus dxeral nii we mquri toma betaq ayu Hinom ssiyo sipo ddgiyaq. Kiya ka tgbaro ayu Ripayim. Dungal we mquri toma ayu Hinom, mqquri ssiyo hmeruc Yebus, mquri toma betaq Eyn Rogel. 17Dungal we mspgeriq mquri tgdaya, hrnasan betaq Eyn Semes, msderux betaq mcherus Adumim, sipo Giriruc. Dungal we moda toma betaq pusu btunux Bohan, laqi Reuben. 18Dungal we mquri tgdaya mooda mcherus tgdaya Arabah, mquri toma betaq Bet Haarabah. 19Ayus dxeral nii we moda mcherus tgdaya Bet Xaglah, msderux betaq tgdaya rcilung Mhuqil. Kiya ka puting bale yayung Yarden. Kiya ka ayus dxeral quri tgtruma ka nii. 20Quri so ayus dxeral nklaan hido we yayung Yarden. Pnooda pnswayan rudan nangal daha ayus ddxeral seediq Binyamin.
Lualang Nangal Binyamin
21Pnooda pnswayan rudan nangal daha lualang Binyamin we so nii: Yerixo, Bet Xaglah, Emeq Qecic, 22Bet Haarabah, Cemarayim, Beytel, 23Awen, Parah, Oprah, 24Kepar Haamonah, Opniy ma, Geba. Kana ba we 12 alang ma lualang ssiyo na hiya. 25Dungal we Gibon, Ramah, Beerot, 26Micpeh, Kepirah, Mocah, 27Reqem, Yilibile, Raralah, 28Cela, Haelep ma, Yebus, kiya de Yerusalem. Gibeah ma Kriyac. Kana ba we 14 alang ma lualang ssiyo na hiya. Pnooda pnswayan rudan nangal daha dxeral seediq Binyamin ka nii.
Currently Selected:
Yehosua 18: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
