Yehosua 17
17
Dxeral Nsugan Dmeka Pnswayan Rudan Menaseh
1Pnooda blebil qreti dxeral nangal Menaseh laqi qbsuran Yosehu we so nii. Makir, tama Gilad, laqi qbsuran Menaseh. Ado mbeyax ka heya, kiya de mnangal Gilad ma Basan. 2Duma na lqlaqi laqi Menaseh, kiya ka lqlaqi laqi Abiejer, Xeleq, Asriel, Sekem, Xeper ma Semida we spooda blebil qreti wada mangal dxeral kana. Kana nii we kiya ka lqlaqi laqi rseno Menaseh laqi Yosehu kiya.
3Celapxad laqi Xeper, lqlaqi laqi Gilad, lqlaqi laqi Makir ma, lqlaqi laqi Menaseh we, uka laqi na ma, wano ba lqlaqi mqedil. Lqlaqi na mqedil we, Maxlah, Noah, Xoglah, Milkah ma Tircah. 4Dheya we meyah berah Elajar msapuh, Yehosua laqi Nun ma, dmpdudul, rmengo: “Rmnengo Moseh mbege dxeral mtswai miyan ka Utux Tmninun.” Kiya de muyu kari Utux Tmninun, sugan na dxeral pneeyah mtswai tama na ka dheya. 5Ini spegi ka dxeral Gilad nklaan hido yayung Yarden ma Basan we, niqan 10 nsugan dxeral ka pnswayan rudan Menaseh. 6Ado wada msuupu lqlaqi rseno sugan dxeral ka lqlaqi mqedil Menaseh. Dxeral Gilad we ida nlqlaqi laqi Menaseh uri.
7Ayus dxeral Menaseh we, peeyah Aser betaq Mikmetat berah Sekem, mquri so narac betaq dxeral dseediq Eyn Tapuax. 8Dxeral Tapuax we nMenaseh. Kiya we Tapuax gaga ckceka ayus dxeral Menaseh we, ida nuEprayim ka kiya. 9Ayus dxeral nii we peeyah hiya hmeruc betaq yayung Qanah. Lualang quri toma we, ani gaga meniq ckceka ayus Menaseh we, ida nuEprayim ka kiya. Ayus dxeral Menaseh gaga tgdaya yayung ma sderux betaq rcilung. 10Quri so toma we dxeral Eprayim kiya. Dxeral Menaseh quri so tgdaya we, rcilung ka ayus na. Betaq Aser ka tgdaya ma, betaq Yisaskar ka quri nklaan hido. 11Gaga meeniq ayus ckceka Yisaskar ma Aser ka lualang Menaseh we, Bet Sean, Yibolien ma lualang ssiyo na hiya. Alang Dor, Eyn Dor ma lualang ssiyo na hiya. Alang Tanak, Megido ma lualang ssiyo na hiya. Kana ba we 3 msebung dgiyaq biciq ka kiya. 12Kiya de we, lqlaqi Menaseh we ini daha lwaqi ka dseediq mneniq hiya, ida gaga meeniq ckceka daha ka dseediq Kenaan. 13Mbeyax ciida ka seediq Israel han we, pquli daha pqeepah ka seediq Kenaan. Kiya ka ini daha lwaqi.
Mesa Egu Dxeral ka Lqlaqi Laqi Yosehu
14Rmengo Yehosua ka lqlaqi laqi Yosehu: “Utux Tmninun we, smbleyaq so nii saya ka heya. Hbaro miyan seediq ka yami ma, ma su pblebil qreti mntexal bale ma, ini su prana mege nsugan dxeral ho?” 15Rmengo dheya ka Yehosua: “Nasi namu hbaro ka heyi namu ma, ini ptuku niqan ka dgiyaq Eprayim de, tduwa namu mquri nrao Perijiy ma Ripayim, tmabul hiya.” 16Rmengo ka lqlaqi laqi Yosehu: “Ini tuku nniqun ka dgiyaq hiya. Kiya uri we gaga meeniq brenux ka seediq Kenaan, kiya ka lualang Bet Sean. Kiya uri we dseediq Yijreel gaga meeniq dxeral brenux we, niqan rulu xiluy daha ka dheya.” 17Rmengo sapah Yosehu, kiya ka dseediq Eprayim ma Menaseh ka Yehosua: “Hbaro ba seediq ka yamu ma, mbeyax namu uri. Uxe maha mntexal ba blebil qreti. 18Maha nnamu ka ddgiyaq kiya uri. Ani nrao we, sai tmabul, ssiyo na we ida nnamu uri. Ani yaa mbeyax ma niqan rulu xiluy daha ka seediq Kenaan we, ani namu nak lwaqun ka dheya uri.”
Currently Selected:
Yehosua 17: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
