Yehosua 13
13
Dxeral Ini Ngali Na
1Rudan knkawas na ka Yehosua, rmengo heya ka Utux Tmninun: “Rudan knkawas su da, ida egu ka dxeral ini ngali na. 2Nii ka dxeral ini ngali na: Kiya ka kana dxeral Peliset ma kana dxeral Gesur. 3Kiya ka peeyah mquri daya yayung Sihur nklaan hido Micrayim, betaq ayus dxeral Eqron, kiya ka dxeral seediq Kenaan. 5 ka qbsuran paru seediq Peliset gaga qmlahang seediq Ajah, Asdod, Asqelon, Gat ma Eqron. Dungal we dxeral nuAwim, 4gaga toma. Dungal we kana dxeral Kenaan, Mearah seediq Cidon betaq dxeral Apeq ma, betaq ayus dxeral seediq Amori. 5Dungal dxeral seediq Gebal ma, kana dxeral Lebanon mquri nklaan hido, peeyah Baal Gad deriq dgiyaq Xermon betaq Xamat. 6Peeyah Lebanon betaq Misrepot Mayim, kana dseediq gaga meniq ddgiyaq, kiya ka kana seediq Cidon. Lwaqun mu peeyay berah seediq Israel kana ka dheya. Puyu rnengo mu ka isu ma, pooda blebil qreti ma sai maasu seediq Israel ka dxeral nii. 7Saya, psugi 9 pnswayan rudan ma dmeka pnswayan rudan Menaseh ma, ngalun daha pusu dnoi ka dxeral nii.”
Maasu Dxeral Quri Nklaan Hido yayung Yarden
8Mnangal pusu dnoi daha ka pnswayan rudan Reuben, Gad ma, dmeka Menaseh. Kiya ka dxeral bnege na dheya ka Moseh tnqliyan Utux Tmninun quri nklaan hido yayung Yarden. 9Peeyah Aroer ayu ssiyo yayung Arnon ma lualang gaga ckceka ayu, kana breenux dxeral Meydba betaq Dibon. 10Dungal we lualang Sixon qbsuran paru Amori, kiya ka qbsuran paru meeniq Xesbon betaq ayus dxeral seediq Amon. 11Dungal we dxeral Gilad, ayus seediq Gesur ma Maakah, kana dgiyaq Xermon, ma Basan betaq Salkah. 12Dungal we kana qlhangan Og qbsuran paru Basan gaga mqbsuran paru meniq Astarot ma Edrei. Wano ba Og nii ka mtngari muudus dseediq Ripayim. Wada ini baka ma lwaqan Moseh ka dseediq nii. 13Kiya de ini lwaqi seediq Israel ka seediq Gesur ma Maakah. Ida betaq saya, gaga meniq ckceka Israel ka dseediq Gesur ma Maakah.
14Wano pnswayan rudan Lewiy ka ini sugi dxeral. Ado pusu dnoi daha we kiya ka snapuh puniq bbege Utux Tmninun, Utux Baro nuIsrael. Mntena so rnengo na dheya ka Utux Tmninun.
Dxeral Nsugan Reuben
15Moseh we spooda na pnswayan rudan Reuben maasu pusu dnoi dheya. 16Ayus dxeral daha we Aroer ayu ssiyo Yayung Arnon ma lualang ckceka ayu ma, kana dxeral brenux Meydba. 17Dungal we Xesbon, kana lualang brenux Xesbon, Dibon, Bamot Baal, Bet Baal Meon, 18Yahcah, Qedemot, Meypaat, 19Qiryatayim, Sibmah, Ceret Hasaxar ebun gaga ayu, 20Bet Peor, mcherus Pisgah, Bet Haysimot, 21lualang kana dxeral brenux ma, kana qlhangan Sixon qbsuran paru Amori. Qbsuran paru mneeniq Xesbon ka Sixon. Kiya we Moseh ka wada phuqil heya ma, tnpusu pnswayan rudan Midyan. Kiya ka Ewi, Reqem, Cur, Xur ma Reba. Dheya we dmdudul dmayo Sixon ma mneniq hiya ka dheya. 22Seediq Israel we wada phuqil dseediq nii. Kiya uri we wada daha sdoi hlmadac phuqil ka Bilam mpsbunul laqi Beor. 23Ayus dxeral seediq Reuben we, kiya ka yayung Yarden ma dxeral smdaling yayung Yarden. So nii ka pusu dnoi nangal daha dxeral ma lualang ka seediq Reuben pnooda pnswayan rudan daha.
Dxeral Nsugan Gad
24Moseh we spooda na pnswayan rudan Gad maasu pusu dnoi dheya. 25Ayus dxeral daha we Yajer ma lualang Gilad, dmeka dxeral seediq Amon, betaq Aroer sipo Rabah. 26Dungal we peeyah Xesbon betaq Ramo Micpeh ma Betonim, dungal we peeyah Maxanayim betaq ayus Debir, 27dxeral Bet Haram, Bet Nimrah, Sukot ma Capon ckceka ayu. Kiya ka duma dxeral qlhangan Sixon qbsuran paru Xesbon, yayung Yarden ma dxeral msdaling yayung Yarden betaq ssiyo rcilung Kineret. Gaga meniq nklaan hido kana. 28So nii ka pusu dnoi nangal daha dxeral ma lualang ka seediq Gad pnooda pnswayan rudan daha.
Dxeral Nsugan Dmeka Pnswayan Rudan Menaseh
29Moseh we spooda na pnswayan rudan Menaseh maasu pusu dnoi dheya. 30Ayus dxeral daha we peeyah Maxanayim ma kana dxeral Basan, kiya ka kana qlhangan Og qbsuran paru Basan ma 60 kana lualang Basan ma Yair. 31Dungal we dmeka dxeral Gilad, Astarot ma Edrei alang qlhangan Og qbsuran paru Basan. Dxeral nsugan nii we pnooda pnswayan rudan bnege So nii ka nangal daha dxeral pnooda pnswayan rudan sbege daha lqlaqi laqi Makir laqi Menaseh, kiya ka dmeka lqlaqi laqi Menaseh.
32So nii ka pusu dnoi nsugan Moseh meniq nklaan hido yayung Yarden, dxeral brenux Moab sipo Yerixo. 33Kiya we wano pnswayan rudan Lewiy we, ini sugi pusu dnoi Moseh ka dheya. Pusu dnoi daha we, kiya ka Utux Tmninun, Utux Baro nuIsrael, mntena rnengo na dheya ka Utux Tmninun.
Currently Selected:
Yehosua 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
