Yirmeyah 51
51
Ptpusal Psgao Babirun
1Rmengo so nii ka Utux Tmninun:
Qtai! Ptuyun mu ka bgihur moda smeeliq,
mpccebu Babirun ma seediq gaga meeniq Rikami.
2Mpskagul ku seediq icil qlhangan meeyah Babirun,
meeyah mpkrehak dheya ma, mpkuuka ani maanu ka dxeral na.
Ali pqrqilan na ciida,
mpeeyah ani inu mccebu heya ka dheya.
3Iya phkragi halung ka mptbheniq,
iya plkusi lukus mccebu ttutuy daha.
Iya krwahi ka rseno mbbeyax Babirun,
qhdei pkuuka ka kana supi.
4Phqilun mksaro dxeral Krdiya hiya ka dheya,
btaqun daha meeniq elu alang hiya.
5Ani gaga stngayan qnquwan noda Mrtaso Israel ka nniqan Israel ma Yehudah,
ida ini lixi Utux Baro na, Utux Tmninun Mdoi Kana Supi.
6Qduriq ka yamu, latac peeyah Babirun,
Pkuudus knuudus namu nanak!
Iya psuupu mphuqil ckceka qnquwan noda na,
ado ali cyukan Utux Tmninun ka nii.
7Pngerah mahan king gaga baga Utux Tmninun ka Babirun,
wada na pbskanun kana ka dxeral,
mnimah ka qqlhangan we asi kuutux.
8Wada asi tlemu mtakur ka Babirun.
Qnqihi kuxul ka heya,
adis geluq sknexan pkmalu luqah na,
nhuwa tduwa pklmeun.
9Pkmalu ta Babirun ka ita,
kiya we ini kmalu ka heya.
Latac peeyah heya! Sai pbrinah qqlhangan daha ka txtaxa,
ado pnkdira na we wada dehuk karac ma betaq rangah baro.
10Wada ptuura knsderux ta ka Utux Tmninun.
Aguh! Meeniq ta Sion,
mpgarang ta noda Utux Tmninun, Utux Baro ta.
11Lpaxi ka tunux budi,
Doi ka qeerung heyi.
Quri so Babirun, mpkuuka heya lnglungan na ka Utux Tmninun. Kiya ka ptuyun na ka lhebun qbsuran paru Maday. Cniyuk Utux Tmninun ka nii, gisu cmiyuk sapah thmkuwan na ka nii.
12Phyegi pnslawa paru,
mccebu qnalang alang Babirun.
Psdehu ka paga gmraka,
Pniqi supi mpqlahang.
Ado rnengo na quri Babirun ka Utux Tmninun we,
ida so nii ka lnglungan na ma, wada na daun uri da.
13Teyal knuegu pila meeniq bobo yayung!
Dehuk ka ali qnhdean su da!
Stenge riyung ka knsrabang su!
14Smdehu heya nanak ka Utux Tmninun Mdoi Kana Supi:
Ida mu pstngayun seediq so mntena utun,
Mpdiras mlawa mccebu isu ka dheya.
Uyas Ttndahu Utux Baro
15Sdoi na beyax, smalu dxeral ka Utux Tmninun,
sdoi na knkela pgdehu qnlangan,
sdoi na gnkela mubung karac.
16Peeyah kari ka heya de, hmrenang ka qsiya baro.
Pnklaun na peeyah muxi karac ka plabu,
ppquyux na we tqlwaqun na ka wilaq,
pyahun na peeyah repun ka bgihur.
17Knkingal seediq we, mntena tnbugan, uka ba gnkela.
Ririh tikung, msiqa riyung ka mpsmalu ging,
ado ida uxe bale ka tikung qnequr na,
ckceka daha we uka hengak.
18Skbrhuwan ka dheya,
qyqeya psridil seediq.
Ali pkdraun ciida de mpkuuka ka dheya da.
19Qnbleyaq ngngalun Yakobu we uxe so kiya,
ado Bukung nii we smnalu kana ani manu,
Israel we klegan seediq pusu dnoi na,
Utux Tmninun Mdoi Kana Supi ka ngayan na.
Tuting Xiluy Paru ka Utux Tmninun
20Tuting puru mu ma, qyqeya mccebu mu ka isu.
Mdoi ku sunan mptnemu ku qqlhangan,
mpselaq ku qqlhangan.
21Mdoi ku sunan mptnemu dapa dmay ma tnapa dapa dmay na,
mptnemu ku rulu mccebu ma tnapa bobo na.
22Mdoi ku sunan mptnemu ku rseno ma mqedil,
mptnemu ku rudan ma mbeyax,
mptnemu ku mkkere ma weewa.
23Mdoi ku sunan mptnemu ku mtabu ma miric na,
mptnemu ku dmqeepah ma, dapa mtabul na,
mptnemu ku qbsuran mdudul ma qbsuran mdayo.
Pkdira Babirun
24Mpciyuk ku seediq Babirun ma Krdiya noda daha kana qnnaqah oda meeniq Sion berah doriq namu. Rnengo Utux Tmninun ka nii.
25Dgiyaq moda pkuuka, qtai! Mpkpais ku isu ka yaku,
smeeliq su kana dxeral ka isu,
mphkero ku baga mu mccebu ku sunan,
Tkurun misu peeyah dgiyaq,
dgiyaq su so snqmaan ka isu.
Rnengo Utux Tmninun ka nii.
26Uxe mangal btunux ngalun na pusu btunux peeyah sunan ka seediq,
uxe mangal btunux ngalun na pusu uri,
ado laxun betaq ani knuwan ka isu.
Rnengo Utux Tmninun ka nii.
27Pteetu pnslawa paru meeniq dxeral,
mpiyuk iyuk urung meeniq qqlhangan,
mpsramal mccebu Babirun ka qqlhangan.
Splawa ka Ararat, Miniy ma Askenaj qqlhangan meeyah mccebu heya,
skguli ka qbsuran supi mccebu heya,
pyahi baro ka dapa dmay, mntena so qpuruh utun mseang riyung.
28Dqqlhangan, qbsuran paru Maday, dmpqlahang ma qbsuran mdayo,
kana dxeral qnlhangan daha we, osa psramal mccebu heya kana.
29Mpklgelu ma mspgeriq ka dxeral.
Ado mpbale ba sneengan lnglungan Utux Tmninun quri Babirun,
ngalun na dxeral nlaxan uxe niqun seediq ka Babirun.
30Malix mccebu ka supi Babirun,
tgleing ckceka qbrangan.
Wada qhdeun ka beyax daha,
mtnemu so mqedil ka dheya.
Nniqan Babirun we psqmaun,
gremun kana ka ruhu rhengun.
31Ppsterung ka mmaha rmengo kari,
ppsterung ka mmaha mege pnatis,
rngagan daha ka qbsuran paru Babirun,
wada ngalun kana ka ssiyo alang da.
32Wada daha ngalun ka ntrilan ssiyo yayung da,
wada psqmaun brhengil,
betaq miicu kana ka supi.
33Rmengo so nii ka Utux Tmninun Mdoi Kana Supi, Utux Baro nuIsrael:
Mntena qqahun mugi ka Babirun.
Uxe pqbsiyaq, dehuk ka qbrungun da.
34Wada mekan kenan ka Nebukadnecar qbsuran paru Babirun,
wada pstemaq kenan,
betaq ku so qyqeya uka ani manu.
Mntena qcurux paru rmequn kenan ka heya,
kncheya mu we sptengi na nbuyas na,
dungal we wada kmugus mliwaq kenan.
35Mprengo ka seediq gaga meeniq Sion:
Tai so nangal mu ma tnsapah mu ka pnqraqil,
maha biqun Babirun.
Mprengo ka seediq Yerusalem:
Tai so dara qnluli nami we,
maha sbege seediq Krdiya.
Mdayo Israel ka Utux Tmninun
36Maanu so kiya, rmengo so nii ka Utux Tmninun:
Qtai! Mpdayo ku mprengo sunan, ririh isu mpciyuk ku.
Dngeun mu ka rcilung Babirun,
dngeun mu ka hrean qsiya na.
37Llaxun ka Babirun,
niqun huling bbuyu,
nklwiun ma phlisun seediq,
uxe niqun seediq uri.
38Maha so rkelic rudu msuupu tnugedux ka dheya,
mntena giyas rkelic rudu tnugedux.
39Meeyah ka qnuqu daha de,
asi mu ka qdalun uqan mqaras ka dheya,
Uqun knbsukan so maha mqqaras ka dheya.
Mptaqi uxe mpkiiyo ani betaq knuwan.
Rnengo Utux Tmninun ka nii.
40Pntnaun mu wawa miric rudu,
baus miric rudu ma baus miric ka dheya, psaun mu phqilan.
Kntuxan Babirun
41Ma lux ini baka ka Sesak!
Wada qrapun ka tndhuun ba seediq kana dxeral!
Wada ma ktliun malix ba qqlhangan ka Babirun!
42Mubung Babirun ka qsiya rcilung,
bungan bula rcilung ka heya.
43Mpkbuyuh nlaxan ka lualang na,
mpdxeral mdengu ma mpbreenux bnaquy,
mpdxeral uxe niqun seediq,
ani taxa seediq uxe mooda hiya.
44Pkdraun mu ka Bel nBabirun,
pbrihun mu peeyah quwaq na ka rnequn na.
Uxe mnpusal mpquri heya ka qqlhangan,
ida mptakur ka qnalang alang Babirun.
45Seediq mu! Latac peeyah Babirun ka yamu!
Qduriq peeyah seang Utux Tmninun ka txtaxa namu.
46Mnbahang namu hrenang nniqan namu,
iya kcugi ma iya krkerang.
Ado niqan ka wada bhangan knkawas nii,
knkawas kiya we niqan hrenang meeyah uri.
Niqan oda mttraqil ka alang,
mccebu qbsuran mdayo ka qbsuran mdayo.
47Maanu so kiya, qtai! Gisu ka ali,
mpkdira ku tikung qnequr Babirun.
Psqaun ka kana dxeral na,
pksragun bobo na heya ka kana seediq pnhuqil.
48Ciida, kana mneeniq karac ma dxeral,
mpqaras Babirun kana,
ado mpeeyah daya ka mpkuuka mosa dheya hiya.
Rnengo Utux Tmninun ka nii.
49Ririh seediq Israel wada phqilun ma ida mptakur ka Babirun,
ado wada phqilun Babirun ka kana seediq dxeral.
Kari Bbege Seediq Israel Gaga Meeniq Babirun
50Qnduriq nhari ka mpqduriq hlmadac,
iya heyu hiya!
Peeyah theya lngelung Utux Tmninun,
psquri Yerusalem lmngelung ka lhebun su.
51Mpqbahang ta sngayan de, msiqa ta riyung, tqsiqa kana dqeras,
ado mnremux sapah thmkuwan Utux Tmninun ka seediq icil.
52Manu so kiya, qtai! Gisu ka ali,
mpkdira ku tikung qnequr Babirun,
Kana dxeral ida niqan seediq gaga rmengac bntaqan.
Rnengo Utux Tmninun ka nii.
53Ani wada mgkala karac baro ka Babirun,
ani yaa mkkere riyung ka pgdhegun na pkbaro,
ida mu skgulun hiya ka meeyah smeeliq.
Rnengo Utux Tmninun ka nii.
Mpkuuka ka Babirun
54Niqan mdiras lmingis peeyah Babirun,
niqan paru ba sneliq pneeyah dxeral seediq Krdiya.
55Wada llaxan Utux Tmninun ka Babirun,
wada pkngalun ka paru hrenang ckceka daha.
Mntena bula rcilung,
tblenga bale ma peeyah riyung hrenang na.
56Meyah Babirun ka meeyah smeeliq.
Qrapun ka supi Babirun,
wada greman ka halung daha da.
Ado Utux Baro mciyuk ka Utux Tmninun,
ida mciyuk ka heya.
57Pbskanun mu ka dqbsuran mpdudul,
seediq niqan kkela, mpqlahang, qbsuran mdayo ma supi,
mptaqi uxe mpkiiyo ani betaq knuwan ka dheya.
Rnengo ngayan kesun qbsuran paru, Utux Tmninun Mdoi Kana Supi ka nii.
58Rmengo so nii ka Utux Tmninun Mdoi Kana Supi:
Ptblayun brenux ka qnalang alang knuglahang Babirun,
psqmaun ka bbaro ba rhengun alang.
Maha uka ririh ndaan mbqerus kana seediq,
psqmaun puniq ka bqerus kana seediq,
mpqrinuc ini knttuku ka dheya.
Srengo Betaq Babirun ka Kari Yirmeyah
59Serayah laqi Neriyah, lqlaqi laqi Maxseyah ge, msuupu Cidqiyahu qbsuran paru Yehudah tg4 knkawas qnlhangan na ma maha Babirun ka dheya ciida, niqan kari pndakar na Serayah qbsuran mdayo ka Yirmeyah. 60Kana mqraqil ka mooda quri Babirun we spatis Yirmeyah patis qniri. Nii we kari kana mqraqil meeyah quri Babirun. 61Rmengo Serayah ka Yirmeyah: “Mosa su Babirun de, tgleus ba smepu ka kana kari nii. 62Rengo: ‘Utux Tmninun! Rmnengo su quri dxeral nii: Sqetun su ma, uxe su pniqun seediq ma tnbugan meeniq hini.’ 63Qhdeun su smepu ka patis nii de, psdlani mekuy btunux bobo na ma, qdaani ckceka Yayung Euhrates. 64Rengo: ‘Ririh pnqraqil bnege na Babirun ka Utux Tmninun we, maha mntena so nii mpsqreboq ma, uxe meeyah baro dungal. Ida maha muuwic riyung ka seediq uri.’”
Betaq hini ka kari Yirmeyah.
Currently Selected:
Yirmeyah 51: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
