Yirmeyah 50
50
Ini Baka Mccebu ka Babirun
1Bukuy nii we kari quri Babirun ma seediq Krdiya rnengo Utux Tmninun pnoda na Yirmeyah mpgeela kari.
2Sai rmengo ma gmarang pgkela ka qqlhangan,
pheyu pnslawa gmkuwak paru.
Sai rmengo ma, iya leing pgkela:
“Ini baka mccebu ka Babirun,
Psqaun ka Bel utux,
Miicu ka Merodak.
Psqaun kana ka tikung Babirun,
maha miicu kana ka tikung daha.”
3Ado meeyah mccebu heya ka pneeyah tgbaro. Maha na sgliqun ka dxeral na ma, uka seediq meeniq hiya. Maadis tnbugan mpqduriq kana ka seediq.
Mpbrinah Dxeral Daha ka Israel
4Meeniq ali kiya, meeniq ciida, mpsuupu seediq Israel mpbrinah ka seediq Yehudah. Tllingis mkkesa migin Utux Tmninun, Utux Baro daha ka dheya. Rnengo Utux Tmninun ka nii. 5Msiling elu Sion ka dheya ma, mpsquri hiya dqeras daha rmengo: “Aguh! Pllutuc ta pnsdhegan uxe chngiun ani knuwan daha Utux Tmninun ka dheya.”
6Qpuruh miric mnugedang ka seediq mu. Mtabu daha ka ppgedang elu daha wada mquri ddgiyaq. Mkkesa moda dgiyaq paru ma dgiyaq tgbiciq ma, chngiyan daha ka ssngayun daha. 7Kana smterung dheya we, kika mekan dheya. Rmengo ka pais: “Uxe kesun niqan qnquwan noda ka ita. Ado wada niqan qnquwan noda Utux Tmninun, kiya ka bale ba nniqan ka dheya. Kiya ka Utux Tmninun snluwan ba rdrudan daha ka dheya.”
8“Mpqduriq namu peeyah Babirun, mplatac namu peeyah dxeral seediq Krdiya. Mntena so baus miric mgeela mkkesa berah kana rahul miric. 9Qtai! Pttuyun mu ma psliun mu ka qqlhangan prparu ma, ptgdiyalun mu dmudul dheya meyah mccebu Babirun peeyah daya. Mpsramal mccebu heya ka dheya ma, uxe daha baka hiya ka heya. Budi daha we mntena so supi tnugluhe, ini bale mnhemuc mbrinah. 10Qqrapun daha ka Krdiya. Kana qmnerac heya we, maha mttuku riyung ka lhebun daha. Rnengo Utux Tmninun ka nii.”
Wada Mtakur ka Babirun
11Gneeluk pusu dnoi mu!
Tqqaras malu namu kuxul,
mntena so giyas wawa dapa mpreno qmleqah,
mntena so mkkere dapa dmay rmengac namu.
12Maha tsdamac qnnaqah kuxul ka tnlaqi sunan,
maangal qnsiqa ka tnlaqi sunan.
Qtai! Mpthiti ba ckceka qqlhangan ka heya.
Mptadus brenux, dxeral mdengu ma, bnaquy mdengu.
13Ado seang Utux Tmninun, mpuuka ka seediq meeniq ka Babirun,
mpdxeral nlaxan kana.
Mpkiicu kana ka mnoda hiya,
mphulis sntrengan daha mqraqil ka heya.
14Kana mptbheniq! Psramal mheyu mtqiri Babirun,
cebu budi mccebu heya,
iya krwahi ka budi namu,
ado wada niqan qnquwan noda daha Utux Tmninun ka heya.
15Diras mtqiri ssiyo na hiya:
“Ini baka ka heya da,
mtakur ka qbrangan,
mhurah ka pnharac qnalang alang da!”
Cniyuk Utux Tmninun ka nii.
Cyuki yamu ka heya.
Kesi cmiyuk so cnyukan na seediq uri.
16Gnrehak rehak Babirun,
dnoi soki kmetuy qmburung we, asi ka phqilun kana.
Txtaxa daha we, mpqduriq hlmadac tnsiyax dheya,
maha mbrinah dseediq daha nanak ma, mpqduriq dxeral daha nanak.
Mpbrinah Alang Daha ka Israel
17Miric pnkrhepan rkelic rudu ka Israel. Prading ba we, pnuqan qbsuran paru Asur ma, qnhdean de wada qmteqic buuc daha ka Nebukadnecar qbsuran paru Babirun. 18Maanu so kiya, rmengo so nii ka Utux Tmninun Mdoi Kana Supi, Utux Baro nuIsrael: “Qtai! Pkdraun mu ka qbsuran paru Babirun ma dxeral na. Mntena so pkdira ku qbsuran paru Asur. 19Pbrnahun mu dmudul posa tbugan daha ka Israel. Meekan speriq Karmel ma Basan hiya ka heya. Dungal we mptengi mekan Dgiyaq Eprayim ma Gilad hiya. 20Meeniq ali kiya, meeniq ciida, gimun su ka qnquwan noda Israel we, uka ani kingal slayan. Migin su qnquwan noda Yehudah we, uka ani manu uri. Ado knrngiyan mu seediq we, maha mu srwaun. Rnengo Utux Tmninun ka nii.”
Psgao Babirun ka Utux Baro
21Osa tgbaro mccebu dxeral Meratayim,
Dungal we osa mccebu seediq Peqod.
Qhdui phuqil ka dheya,
puyu so kana kari rnengo mu sunan.
Rnengo Utux Tmninun ka nii.
22Niqan hrenang mccebu ma paru sneliq ka dxeral nii.
23Wada gremun ma ptnumean ka tuting pntnemu kana bobo dxeral!
Wada lux lixan meeniq qqlhangan ka Babirun!
24Babirun! Posa ku durang sunan,
wada su tdiyal we, ini su klai.
Wada su daha slayun ma, qqrapun uri.
Ado mccebu sunan ka Utux Tmninun.
25Rmaguh repun qyqeya mccebu ka Utux Tmninun,
mangal qyqeya mccebu na seang ka heya.
Kiya ka Utux Tmninun Bukung Mdoi Kana Supi,
ddaun na dxeral seediq Krdiya.
26Mpeeyah namu ayus theya riyung mccebu heya,
mpraguh namu repun na,
gntuwan su we, mntena so pngepung baro,
wada qhdeun phuqil ma, ini ba rngii.
27Phqili kana wawa dapa na,
so maha hmeruc pphqilun daha.
Posa phqilan kana!
Smtali bale ka dheya,
ado ali daha we, kiya ka ali pkdraun we, gisu dehuk da.
28Mdiras rmengo ka dseediq qnduriq peeyah Babirun meniq Sion hiya, Utux Tmninun, Utux Baro ta we, gisu cmiyuk ririh sapah thmkuwan na.
29Psseli kana ka mptbheniq osa mccebu Babirun. Osa pkobu ssiyo Babirun, iya bale pqdriqi ani kingal. Puyu so noda na cmiyuk heya. Pygaani so qneepah na ma cyuki ka Babirun. Ado wada psparu bale Utux Tmninun, Mrtaso Israel ka heya. 30Maanu so kiya de, mptakur elu alang ka rsriso na. Ali ciida, mplmelux kana ka supi na. Rnengo Utux Tmninun ka nii.
31“Qtai! Isu psparu nii! Pkpais mu sunan,
ado ali su,
gisu dehuk ka ali pkdira ku sunan.
Rnengo Utux Tmninun Bukung Mdoi Kana Supi ka nii.
32Ida mptakur ka psparu ma, uka seediq mdayo pstutuy.
Mpdoi ku puniq psqmaun mu ka lualang na,
qhdeun mu psqama kana ka ssiyo na.”
33Rmengo so nii ka Utux Mdoi Kana Supi: “Gaga pntnaun tmraqil ka seediq Israel ma seediq Yehudah. Qmnerac dheya we hetur daha ka dheya ma ini daha srwai ptraguh. 34Bukung mdoi baga daha we, niqan bale paru beyax, ngayan na we Utux Tmninun Mdoi Kana Supi. Ida mpciyuk ddheya ka heya ma, maangal mptbale ka kana dxeral. Kiya de, ida mosa prrudu seediq Babirun ka heya.”
35Niqan hlmadac meeyah dseediq Krdiya ma Babirun,
dehuk dqbsuran daha ma seediq dmkkeela daha.
Rnengo Utux Tmninun ka nii.
36Niqan hlmadac meeyah dseediq psparu,
asi knngataq ka dheya.
Niqan hlmadac meeyah dehuk dsupi na,
kiya de mkrkerang ka dheya.
37Niqan hlmadac meeyah dapa dmay, rulu mccebu,
kana dseediq trimax meeniq hiya,
mntena so mqedil ka dheya.
Niqan hlmadac meeyah pusu dnoi daha,
kiya de wada glekan ka pusu dnoi daha.
38Dehuk qsiya ka mddengu,
kiya de mpdengu ka dheya.
Ado dxeral qnrequl tikung ka nii,
pkniun tikung ka seediq.
39Maanu so kiya, msuupu meeniq heya ka camac bbuyu ma huling bbuyu. Meeniq heya ka rodux wili uri. Kiya de uka ka seediq meeniq hiya. Ani betaq knuwan uxe niqun seediq. 40Mntena wada sqada Utux Baro ka Sedom ma Amorah ma lualang siyo na hiya, uka seediq meeniq hiya. Rnengo Utux Tmninun ka nii.
41Qtai! Niqan 1 klegan seediq mpeeyah daya,
niqan 1 paru bale qlhangan ma hbaro dqbsuran paru we mptutuy peeyah muxi dxeral.
42Mdoi halung ma smbrangan ka dheya,
So smtali ma uka gnaalu.
Blenga daha we so bula rcilung.
Babirun!
Paapa dapa dmay ka dheya,
mntena mttuku pntbkegan daha,
meyah mccebu sunan.
43Mbahang nii ka qbsuran paru Babirun,
mbserux baga na uka beyax,
qmerac heya ka mqraqil,
mntena knnarux mqedil mptuting laqi.
44“Qtai! Maha ku so rkelic rudu pkiyak peeyah nrao Yarden ma, mpkremux mccebu ku mgdehu nniqan. Asi mu pghepi lmiwaq peeyah hiya ka seediq Krdiya. Ima ka gneegan mu we, kiya ka mpqlahang dxeral nii. Ima ka maha so mntena kenan ho? Ima ka mplawa kenan mosa mpprengo ho? Tgiinu mtabu ka mpdehuk mheyu berah mu ho? 45Mpqbahang namu sneengan mccebu Babirun ka Utux Tmninun ma, poda na mccebu seediq Krdiya ka heya. Betaq tlusun maadis kana ka miric muuwic tnbugan hiya. Nniqan tnbugan daha we maha llixun hiya. 46Ado diras wada ini baka ka Babirun de, mlgelu ka dxeral. Mpqbahang kana hrenang ka seediq qqlhangan.”
Currently Selected:
Yirmeyah 50: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
