Yirmeyah 49
49
Kari Quri Amon
1Quri seediq Amon.
Rmengo so nii ka Utux Tmninun:
Uka laqi rseno ka Israel ho?
Uka ltlutuc laqi daha ho?
Ma rmirih mangal Gad ka Milkom?
Ma gaga meniq lualang hiya ka dseediq na?
2Qtai! Gisu ka ali, pqbhangun mu hrenang mccebu ka seediq,
hrenang mccebu Rabah gaga niqan seediq Amon.
Maha laxun ka Rabah,
psqmaun puniq ka lualang na.
Rnengo Utux Tmninun ka nii.
Mnangal dxeral Israel we,
saya de, meeyah mangal dxeral daha ka Israel.
Rnengo Utux Tmninun ka nii.
3Xesbon! Lngisi,
ado wada sqada ka Ay.
Lualang Rabah! Diras mlawa,
khabik lukus mbasi.
Mdiras mlawa, mtqiri tmalang ckceka qnalang.
Ado Milkom ma msapuh na,
qbsuran mdudul na we, spuun qmerac madis kana.
4Seediq tbrinah!
Ma su ririh gaga niqan ayu,
ado niqan qsiya ka ayu de, psparu su di?
Ma su smtama pila dnoi su, rmengo:
“So ba ima ka meeyah mccebu kenan hini ho?”
5Rmengo ka Utux Tmninun Bukung Mdoi Kana Supi:
Qtai! Pyahun mu sunan ka kkcugun mpeeyah mtqiri su.
Mpliwaq sunan,
mpquri namu berah qduriq,
uka ka seediq mpsterung yamu.
6Kiya de, bobo na, pbrnahun mu ka seediq Amon qnerac. Rnengo Utux Tmninun ka nii.
Quri Kari Edom
7Quri Edom.
Rmengo so nii ka Utux Tmninun Mdoi Kana Supi:
Uxe maha niqan knkela dungal ka Teyman ho?
Wada uka sneengan ooda daha ka tgkeela seediq ho?
Wada mpahung ka knkela daha ho?
8Seediq gaga meeniq Dedan! Osa sgperiq qduriq,
osa meeniq toma riyung.
Ado pkdraun mu ka Esaw ciida,
ida meeyah heya ka pnkdira.
9Meyah yamu hiya ka maangal lipas,
uxe mpkngari ani biciq ho?
Meyah ceka rabi ka mpgeeguy,
uxe meeyah smeeliq ssliqun daha peni?
10Pbrasun mu ka Esaw,
ptraun mu ka lneing na.
Uxe mpgleing heya nanak.
Mpkuuka kana ka lqlaqi mslutuc na, mtswai na ma ssiyo na.
Mpkuuka ka heya uri.
11Malix su qrinuc laqi we, mpkuudus ku knuudus daha ka yaku.
Pstama kenan ka mqedil mqrinuc su.
12Rmengo so nii ka Utux Tmninun: “Qtai! Uxe mpiimah we asi ka miimah, kiya ka uxe pkdraun peni? Uka ka uxe mooda, asi ka mimah! 13Mpsdehu ku yaku nanak, maha kcugun seediq, qsqaun ma, ssyusun seediq ma llaxun ka Bacrah. Maha laxun betaq ani knuwan ka lualang na. Rnengo Utux Tmninun ka nii.”
14Mnbahang ku pnugkela Utux Tmninun ka yaku,
niqan snkgulan wada mquri qqlhangan, mosa rmengo:
“Psseli ma sai mccebu ka Edom,
tutuy osa mccebu.”
15Qtai! Ngalan misu tgbiciq ckceka qlhangan ka isu,
Sbciqun su daha qmita dseediq.
16Gaga meeniq lhengo ma, gaga meeniq bungu dgiyaq biciq!
Wada mberiq sunan nanak ka sniicu su ma pnspruwan su.
Ani su mntena su so qdiro tmrudu baro ba hiya,
redu misu peeyah hiya.
Rnengo Utux Tmninun ka nii.
17Maha daha kcugun ka Edom. Kana mooda hiya we maha miicu. Dungal we phlisun daha ka kana pnqraqil. 18Rmengo ka Utux Tmninun: Mpntena Sedom ma Amorah ma, lualang ssiyo na hiya mpktakur, uxe niqun seediq ma uxe daun mkrabi seediq uri ka hiya. 19Qtai! Maha ku so rkelic rudu criyu peeyah nrao Yarden ma, mpkremux mccebu ku mgdehu nniqan. Asi mu pghepi lmiwaq peeyah hiya ka seediq Edom. Ima ka gneegan mu we, kiya ka mpqlahang dxeral nii. Ima ka maha so mntena kenan ho? Ima ka mplawa kenan mosa mpprengo ho? Tgiinu mtabu ka mpdehuk mheyu berah mu ho? 20Mpqbahang namu sneengan lnglungan Utux Tmninun quri mccebu Edom ma, lnglungan mccebu seediq Teyman. Betaq clusun maadis kana ka wawa tnbugan miric muuwic riyung daha hiya. Nniqan tnbugan daha we maha llixun hiya. 21Mlgelu ka dxeral peeyah hrenang tnkuran na. Qbhangan rcilung Mtanah hiya uri ka diras rengac daha. 22Qtai! Mntena qdiro mnkala ma skiya ka pais. Mubung bobo Bacrah ka palic daha. Ali ciida, maha so mqedil mpgtuting laqi ka mnpahung ba supi Edom.
Kari Quri Darmeseq
23Quri Darmeseq.
Mangal qnsiqa ka Xamat ma Arpad,
ado mbahang kari naqah ka dheya de, asi so sqsiya.
Pslhebun daha we, mntena so bula rcilung pnmari, ini gseesu.
24Muuwic riyung ka Darmeseq, spgeriq heyi qduriq.
Qmerac heya ka mkrkerang,
qmerac heya ka mqraqil knnaqah kuxul,
mntena so mqedil mptuting laqi.
25Alang niqan ngayan ma qqrasun mu,
hmuwa lux wada laxan ho?
26Mptakur elu nganguc ka rsriso na,
ali ciida, mplmelux kana ka mnpahung supi daha.
Rmnengo Utux Tmninun Mdoi Kana Supi ka nii.
27Psqmaun mu puniq ka pnharac qnalang alang Darmeseq.
Qhdeun mu psqama ka sapah qbsuran paru Ben Hadad.
Quri Kari Qedar ma Xacor
28Quri kari mccebu Qedar ma Xacor qqlhangan ka Nebukadnecar qbsuran paru Babirun.
Rmengo so nii ka Utux Tmninun:
Seediq Krdiya! Tutuy osa Qedar,
sai phuqil ka dseediq nklaan hido.
29Meyah gmeeluk kobu ma rahul miric daha ka seediq,
maadis pala, kana qyqeya ma, dapa bukung, ngalun daha ndheya nanak.
Mdiras dheya ka seediq:
Gaga mtqiri heya kana ka kcugun.
30Seediq gaga meeniq Xacor! Qduriq betaq theya,
tgleing toma riyung hiya.
Ado gisu lmngelung mpselaq yamu ka Nebukadnecar qbsuran paru Babirun,
niqan lnglungan na mpccebu yamu.
Rnengo Utux Tmninun ka nii.
31Seediq gaga meeniq Krdiya! Tutui!
Osa dseediq mtbleyaq uka lnglungun hiya,
dheya hiya we, uka bruhu rhengun daha ma, murux meeniq.
Rnengo Utux Tmninun ka nii.
32Maha daha glekun ka dapa bukung daha,
maha daha qqrapun ka egu tnbugan daha.
Pkrehak mu ka seediq smlebu smeqic snuunux,
pyahun mu peeyah ssiyo daha ka mqraqil.
Rnengo Utux Tmninun ka nii.
33Nniqun huling bbuyu ka Xacor,
maha laxun betaq ani knuwan.
Mpuuka seediq meeniq hiya,
mpuuka ka seediq mooda mkrabi hiya uri.
Quri Kari Eylam
34Prading qmlahang ka Cidqiyah qbsuran paru Yehudah ciida, meyah Yirmeyah mpgeela kari ka kari Utux Tmninun quri Eylam.
35Rmengo ka Utux Tmninun Mdoi Kana Supi: “Rmengo so nii ka Utux Tmninun Mdoi Kana Supi: Qtai! Gremun mu ka halung seediq Eylam, kiya ka pusu stmaan kkbeyax daha. 36Pyahun mu peeyah mxmuxi karac ka bgihur ma pyupun mu Eylam ma prhepun mu nyupan bgihur ka dheya. Uka ini daha sai qqlhangan ka dseediq qndriqan peeyah Eylam. 37Pkkranun mu berah pais ma dseediq migin knuudus ka seediq Eylam. Pyahun mu mqraqil pneeyah seang mu ka dheya. Dungal we psnolun mu bukuy daha ka hlmadac, betaq mpkuuka ka dheya. Rnengo Utux Tmninun ka nii. 38Mpheyu ku tnlengan mu meeniq Eylam, mphuqil ku dqbsuran paru ma dqbsuran mdayo hiya. Rnengo Utux Tmninun ka nii.
39Kiya de, betaq qnhdean de, pbrnahun mu ka seediq Eylam qnrapan. Rnengo Utux Tmninun ka nii.”
Currently Selected:
Yirmeyah 49: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
