Yirmeyah 48
48
Quri Kari Moab
1Quri kari Moab.
Rmengo so nii ka Utux Tmninun Mdoi Kana Supi, Utux Baro nuIsrael:
Smtali bale ka Nebo! Maha llaxun ka heya.
Maha ini baka ma psqaun ka Qiryatayim,
maha sgliqun ma psqaun ka Miska,
2Uxe tndhuun ka Moab da.
Migin pqnqihan heya ka dseediq meniq Xesbon hiya:
“Aguh! Sqito ta ka heya, so maha uxe mpqnlhangan ka heya.”
Madmen! Mplmelux su ka isu uri.
Mpsdurak sunan ka hlmadac.
3Niqan diras daha pneeyah Xoronayim:
“Llaxun da! Mpuuka blbale da!”
4“Wada qhdeun smeeliq ka Moab da!”
Qbhangan seediq ka tndexan lingis lqlaqi na.
5Tllingis steetu mkkesa sttean Luxit ka seediq,
ado mbahang rengac wada qhdeun smeeliq meniq mcherus Xoronayim hiya.
6Qduriq ma pkdusi nanak ka knuudus su,
so maha mntena qhuni llebu gaga tadus brenux ka knuudus namu.
7Ado smtama su ndaan su ma pusu dnoi su de, maha su daha ini baka mccebu ka isu.
Pspuun qmerac madis ka msapuh ma, dqbsuran mdudul ka Kemos.
8Mpteme kana alang ka mpqhedu smeeliq,
ani 1 alang uxe rngiun.
Qtmaqun ka ayu,
sgliqun ka breenux,
mntena so rnengo Utux Tmninun.
9Biqi palic ka Moab,
pskiya posa ka heya.
Mpkbuyuh nlaxan ka lualang na,
uka seediq meniq hiya.
10Mbserux ini oda pnqeepah Utux Tmninun we, maangal snyusan. Hmetur ini psdara hlmadac we, maangal snyusan.
Pkuuka ka Lualang Moab
11Malu kndesan na peeyah slaqi ka Moab,
mntena sino bnsiyaq ini lggani,
uxe rnwahan sheruy icil pngerah,
uxe gnlekan ka heya duri.
Kiya de ida nkiya ka knchaya na,
ini knpriyux skenux na.
12Qtai! Gisu ka ali. Mpskagul ku pheruy sino na ma, mheruy heya. Qhdeun daha hmeruy ma prequn daha ka rusuq sino. Rnengo Utux Tmninun ka nii. 13Ririh Kemos mpqsiqa ka Moab. Mntena so pnsqaan Beytel ka sapah Israel.
14Ma namu dehuk ba rmengo mesa:
“Mnpahung miyan ka yami, kiya ka mkrkere mkela miyan mccebu ka yami” ho?
15Wada lixan ka Moab,
wada saun gmeeluk mangal pais ka lualang na.
Wada phqilun ka rsriso mkrkere na.
Rnengo ngayan kesun qbsuran paru, Utux Tmninun Mdoi Kana Supi ka nii.
16Smdaling ka pqrqilan Moab,
asi eyah heya ka mqraqil.
17Mplingis heya kana ma, mprengo:
Hukuc mnkere ma sebuc knmalu kiya we,
ma wada mgerung da!
18Seediq gaga meniq Dibon!
Alix peeyah knledax tnlungan su,
knremun tleung mangal mhqeni kndengu.
Ado mpkuuka Moab ka meeyah kmremux sunan,
Mphurah qbrangan su.
19Seediq gaga meniq Aroer!
Heyu mita ssiyo elu,
slingi ka rseno ma mqedil qnduriq:
“Gaga hmuwa di?”
20Ririh wada msiqa ini baka ka Moab.
Mptdiras namu lmingis ka yamu,
maha namu mneeru meniq Arnon hiya:
“Wada sqada ka Moab!”
21Pnkdira we mpdehuk dxeral bbreenux Xolon, Yahcah, Meypaat, 22Dibon, Nebo, Bet Diblatayim, 23Qiryatayim, Bet Gamul, Bet Meon, 24Qeriyot, Bacrah ma, kana lualang dxeral Moab gaga theya ma daling. 25Wada tlmeun ka urung Moab ma, wada gremun ka hiqur baga na. Rnengo Utux Tmninun ka nii.
Psqaun ka Moab
26Pbskani yamu ka Moab. Ado wada psparu kmpais Utux Tmninun ka heya. Treeru pnberih na nanak ka Moab ma, phlisun seediq ka heya. 27Uxe su nngalan phlisan ka Israel peni? Srengo su ciida ma sgkuwak su tunux ka heya we, uxe su qnerac peeyah ckceka dmpgeeguy peni?
28Seediq gaga meniq Moab!
Latac alang ma, osa meniq lhengo,
pntena derang tmrudu bobo rhengun rbeyuk.
29Mnbahang miyan pnspruwan seediq Moab,
Sgcuqi bale pnspruwan daha.
Psbukung, tmdahu,
ini pnsebuc ma pkuro riyung ka dheya.
30Klaun mu, skrhbuwan ka seang daha,
kari pnsparu daha we, uka ani kingal ka bale na.
Rnengo Utux Tmninun ka nii.
31Kiya de mpdiras ku lmingis Moab,
mpdiras ku kana dxeral Moab.
Ririh dseediq Qir Xeres mpqnaqah kuxul ka seediq.
32Qhuni lipas Sibmah! Mptsdamac ku lmingis sunan,
mpgkala lnngisan mu seediq Yajer.
Hmrinas rcilung mdakil ka wahir su,
mdakil betaq rcilung Yajer.
Gisu meyah mhei pnhgalang rbagan ma lipas su ka mpseelaq na.
33Wada glekun kana ka malu dxeral ma, qnrasan dxeral Moab,
uka sino na ka qpean lipas,
uka ka tqqaras mdiras qntemaq lipas di.
Hrenang diras daha we uxe qnaras.
34Niqan diras daha peeyah Xesbon betaq Elaleh, rengac daha we betaq Yahac. Peeyah Coar betaq Xoronayim ma Eglat Selisiyah. Ani qsiya Nimrim we mpdengu. 35Qhdeun mu phuqil ka snapuh dgiyaq biciq ma, pnsqama snapuh skenux utux na meniq dxeral Moab hiya. Rnengo Utux Tmninun ka nii. 36Maanu so kiya, ririh ba Moab, mntena derang lmingis rmengac ka lhebun mu. Tsdamac lmingis seediq Qir Xeres ka lhebun mu. Pusu dnoi nangal dseediq Moab we, wada sgliqun kana da.
37Qmuluh snuunux ma kmugus ngudus, thbaluc baga daha ma mlukus lukus mbasi ka txtaxa daha. 38Ani dnamux sapah, luelu alang meniq Moab we, niqan seediq gisu mdiras lmingis. Ado wada mu ptmaqun ka Moab, mntena qyqeya uka seediq smkuxul. Rnengo Utux Tmninun ka nii. 39Wada qhdeun pstemaq da! Mpdiras lmingis ka dheya di! Mpquri bukuy qnsiqa daha ka Moab di! So kiya, phlisun ma kcugun seediq ssiyo ka Moab.
Uka Elu Qdriqan Daha ka Moab
40Rmengo so nii ka Utux Tmninun:
Qtai! Mntena rehak knskyaan na skiya ka pais,
mpcebu Moab.
41Wada ngalun Qeriyot, wada daha ngalun ka qbrangan uri.
Betaq ali ciida, mntena so mqedil mptuting laqi ka knnarux lhebun supi niqan pahung Moab.
42Pkuuka ka Moab, uxe mpqnlhangan di,
ado wada psparu mquri Utux Tmninun ka heya.
43Seediq gaga meniq Moab!
Meeyah smdaling sunan ka knunguwan, knrian ma durang.
Rnengo Utux Tmninun ka nii.
44Qnduriq knngungu na we, mptuting beling,
mnkala beling we, mptgdiyal durang dungal,
ado pneeyah Moab ka knkawas pqrqilan. Rnengo Utux Tmninun ka nii.
45Mpheyu saso Xesbon hiya ka seediq qnduriq, muuwic riyung,
ado peeyah Xesbon ka puniq,
criyu peeyah Sixon ka rana na,
moda qmhedu psqama snuunux kgeli Moab ma, ptpau tunux seediq mprrudu.
46Moab! Smtali su bale!
Mphuqil seediq Kemos da!
Ado wada qrapun ka laqi su rseno,
wada qrapun madis ka weewa su.
47Betaq qnhdean, pbrnahun mu ka seediq Moab wada qrapun.
Betaq hini ka kari pnkdira mu Moab.
Rnengo Utux Tmninun ka nii.
Currently Selected:
Yirmeyah 48: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
