Dmpsgao 9
9
Abimeleq
1Abimeleq laqi Yerubaal we mosa Sekem mtqita mtswai bubu na. Rmengo dheya ma kana tnsapah tama bubu na: 2“Slingi kana ka seediq Sekem: 70 lqlaqi Yerubaal qmlahang yamu ka malu ho, uxe uri we 1 seediq qmlahang yamu ka malu na ho? Klai bale laqi namu ka yaku.” 3Ririh heya srengo na dseediq Sekem ka kana rnengo na. Lnglungan daha de mquri Abimeleq. Ado rmengo ka heya: “Mtswai miyan ka heya.” 4Mangal 70 ging peeyah sapah tikung Baal Berit ka dheya ma sbege daha Abimeleq. Kiya de Abimeleq de dmoi pila nii ssadu na duma seediq mbserux ssnegul heya. 5Meyah betaq sapah tama Oprah ka heya, wada na phqilun 1 bobo pusu btunux hiya ka mtswai na, kiya ka 70 lqlaqi Yerubaal. Wano ba Yotam mtswai ba laqi na ka mtngari. Ado mnugleing ka heya. 6Kana seediq Sekem ma Btmiru we mosa msseli kana. Mosa eruc ssiyo qhuni raus Sekem hiya. Phyegun daha qbsuran paru ka Abimeleq.
7Srengo daha Yotam ka noda nii. Kiya de mosa mheyu bungu dgiyaq Gerijim ka heya ma pmbaro mlawa dheya: “Dseediq Sekem! Qbahang kari mu ka yamu. Kiya de mpqbahang yamu ka Utux Baro uri. 8Niqan texal, mpheyu 1 qbsuran paru mpqlahang yamu ka qhuni. Kiya de mosa rmengo ka qhuni curung: ‘Isu ka pqbsuran paru ma eyah qmlahang menan!’ 9Rmengo dheya ka curung: ‘Huwa mu kesun psetuq peeyah ka abura stndahu duutux ma seediq. Betaq ku so nii mlgelu mkkesa bobo qhuni peni?’ 10Qhuni we rmengo qhuni nunuh: ‘Isu ka pqbsuran paru ma eyah qmlahang menan!’ 11Rmengo dheya ka qhuni nunuh: ‘Huwa mu kesun psetuq ka pgheyi malu heyi. Betaq ku so nii mlgelu mkkesa bobo qhuni peni?’ 12Rmengo qhuni lipas ka qhuni: ‘Isu ka pqbsuran paru mpqlahang menan!’ 13Rmengo dheya ka qhuni lipas: ‘Huwa mu kesun psetuq peeyah ka sino bgurah pqqaras duutux ma dseediq. Betaq ku so nii mlgelu mkkesa bobo qhuni peni?’ 14Rmengo qqhuni ka pako: ‘Isu ka pqbsuran paru ma eyah qmlahang menan!’ 15Rmengo qqhuni ka pako: ‘Nasi namu bale ba hrigan ku namu abura mqbsuran paru namu de, asi namu ka meyah migin qlhangan yaku hini. Nasi uxe de, tai so mpcriyu peeyah ckceka pako ka puniq meeyah mekan qulic bale Lebanon.’”
16“Saya, nasi namu msderux ini qberiq pheyu Abimeleq ka qbsuran paru ma, nasi namu smbleyaq cmiyuk Yerubaal ma tnsapah na ka ddyamu ma, nasi namu ciyuk noda baga na, 17kiya ka tama mu we ririh yamu mosa mccebu. Betaq smruwa qmada knuudus na dmoi baga yamu mlatac peeyah baga Midyan. 18Kiya de, ali saya meyah namu tbrinah tnsapah mu ka yamu. Wada namu phqilun 1 pusu btunux hiya ka kana 70 lqlaqi na. Kiya uri we pheyu namu Abimeleq laqi weewa na ma qbsuran paru dseediq Sekem ka yamu. Ado mtswai namu ka heya, 19Nasi namu msderux ini qberiq mquri Yerubaal ma tnsapah na de, tduwa namu qqrasun ka Abimeleq. Ririh yamu maha mqqaras ka heya uri. 20Nasi uxe so kiya de, tai so mpcriyu peeyah Abimeleq hiya ka puniq ma, meeyah pkuuka dseediq Sekem ma Btmiru. Dungal we tai so mpcriyu peeyah dseediq Sekem ma Btmiru ka puniq ma, meeyah pkuuka Abimeleq.” 21Ado qduriq Abimeleq mtswai na ka Yotam ma, mosa dehuk Beer meniq hiya.
223 knkawas qlhangan na Israel ka Abimeleq. 23Utux Baro we smkagul bgihur naqah betaq Abimeleq ma ckceka seediq Sekem de, qmnriqu Abimeleq ka seediq Sekem. 24Nii ge gisu mquri mtswai daha Abimeleq ka dara pnhuqil na 70 lqlaqi Yerubaal. Ado heya ka wada phuqil dheya. Dara nii we maha dseediq Sekem dmnayo phuqil mtswai na uri. 25Seediq Sekem we pqbrangun daha bobo dgiyaq hiya ma, tmara Abimeleq hiya. Kana seediq mnoda elu kiya ma mkkesa moda hiya we glekun daha. Kiya de srengo daha Abimeleq ka noda nii.
26Gaal laqi Eber ma mtswai na moda hiya betaq Sekem. Snhii heya ka dseediq Sekem. 27Dheya we mosa qnpahan, mangal lipas, qmepu sino ma, mqqaras. Dheya we mremux sapah tikung daha mekan ma mimah hiya. Smiyus Abimeleq ka dheya. 28Rmengo ka Gaal laqi Eber: “Ima ka kesun Abimeleq? Maanu ta ka ita seediq Sekem ma, mlawa ita qmeepah heya ho? Uxe laqi Yerubaal ka heya peni? Mdayo heya we uxe Jebul peni? Naka namu qmeepah lqlaqi mslutuc Xamor tama Sekem! Ma ta gisu qmeepah Abimeleq ka ita da ho? 29Tai so maha betaq baga mu ka dseediq nii, kiya ka phqilun mu ka Abimeleq.” Rmengo Abimeleq ka heya: “Prnai ka supi su ma aguh!”
30Mbahang kari Gaal laqi Eber ka Jebul qbsuran alang de, sqama seang na. 31Mgleing smkagul snkgulan betaq Abimeleq hiya ka Eber. Rmengo: “Qtai! Gaal laqi Eber ma mtswai na we meyah betaq Sekem. Qtai! Gisu ptutui seediq alang hiya mccebu sunan ka dheya. 32Saya, isu ma dseediq smnegul sunan we, asi ka tutui keeman ma mpqburang ckceka qnpahan. 33Mgrebu so kusun, mgkala ka hido de, asi nhari mosa mccebu alang ka isu. Qtai! Kaleb ma dseediq smnegul heya meyah mccebu isu ciida de, tduwa su mbeyax mccebu dheya ka isu.”
34Kiya de, mtutuy keeman ka Abimeleq ma dseediq smnegul heya. Mtg4 qpurah daha mosa qnburang mccebu Sekem. 35Mosa nganguc ka Gaal laqi Eber ma, mheyu rhengun alang hiya. Mtutuy peeyah qnbrangan daha hiya ka Abimeleq ma kana seediq smnegul heya. 36Qmita dseediq ka Gaal de, rmengo Jebul: “Qtai! Gisu hmeruc peeyah bungu ddgiyaq ka seediq.” Rmengo heya ka Jebul: “Saso ddgiyaq ka gisu namu qtaan so seediq.” 37Texal dungal rmengo ka Gaal: “Qtai! Gisu hmeruc peeyah ckceka pngepung dgiyaq ka seediq. Dungal we gisu peeyah elu qhuni raus Mionini ka 1 qpuruh seediq.” 38Rmengo heya ka Jebul: “Gaga inu ka tndhuwan su da? Rmnengo su ka isu: ‘Ima ka Abimeleq, mlawa ita mqeepah heya ho?’ Uxe nii ka dseediq gisu su sbciqun mita peni? Saya, osa ka isu. Osa mccebu dheya!” 39Kiya de Gaal we dmudul seediq Sekem mosa mccebu Abimeleq ka dheya. 40Smdurak mhero Kaleb ka Abimeleq ma, qduriq peeyah berah na ka Kaleb. Hbaro seediq wada mtakur bntaqan ma betaq rhengun alang. 41Meniq Arumah ka Abimeleq. Lmiwaq Gaal ma mtswai na ka Jebul ma, ini na srwai peeniq Sekem ka dheya.
42Kusun, mosa ckceka qnpahan ka seediq. Meyah rmengo Abimeleq ka duma seediq. 43Kiya de madis seediq ka Abimeleq ma, tgtruwan na qpuruh qmburang ckceka qnpahan hiya. Qtai! Peeyah ckceka alang meyah nganguc ka dseediq Sekem. Kiya de mtutuy ka dheya ma wada daha phqilun ka dheya. 44Asi pquri berah mccebu ka 1 qpuruh Abimeleq ma dseediq smnegul heya ma, mheyu rhengun alang. Dungal 2 qpuruh we msderux mquri qnpahan ka dheya ma, mosa phuqil seediq hiya. 451 ali mccebu alang ka Abimeleq. Kiya de ngalun daha ka alang ma, phqilun daha ka dseediq ckceka alang. Hrahun daha ka alang ma, rusan daha timu.
46Mbahang so nii ka kana seediq alang Sekem de, mosa tgleing toma dxeral sapah tikung Baal Biric. 47Meyah rmengo Abimeleq ka duma seediq, kana dseediq Sekem we gaga msseli kana. 48Kiya de Abimeleq ma kana seediq smnegul heya we, mosa dgiyaq Calmon kana. Baga Abimeleq we dmoi puru. Smeqic cida qhuni ma spapa na ahing. Rmengo seediq smnegul heya: “Qtai ka ndaan mu, kiya de muyu so nii nhari moda ka yamu.” 49Kiya de txtaxa daha we mosa smeqic cida kana ka seediq ma, smnegul Abimeleq mkkesa. Saan daha gmutu bobo toma dxeral ka cida ma, sqmaun daha ka toma dxeral. Kiya de, wada mhuqil kana ka seediq alang Sekem. Kana daha we 10'00 heyi.
50Mosa Tibic ka Abimeleq ma, pkobu sipo Tebec mccebu alang kiya. 51Niqan 1 ka paga mgdehu ba gaga meniq ckceka alang hiya. Kana seediq, ani rseno ma mqedil we wada qduriq hiya kana. Leban daha ka rhengun ma mosa bobo dnamux. 52Mosa mccebu betaq paga hiya ka Abimeleq ma, smdaling rhengun paga ma kmpsqama puniq. 53Niqan 1 mqedil ge, speeyah na baro ptuting ka btunux glangan mgbaro ma, asi cebu tunux ma ptgluqi tunux Abimeleq. 54Kiya de asi plawa riso gisu dmoi hlmadac, rmengo heya: “Hgeluq ka hlmadac su, phqili ku hiya! So uxe mprengo kenan ka seediq: ‘Wada phqilun mqedil ka heya da.’” Kiya de wada metaq heya ka riso kiya ma, mhuqil ka heya di. 55Seediq Israel we qmita wada mhuqil ka Abimeleq de, wada mbrinah sapah daha nanak ka dheya da. 56So kiya de, gisu cmiyuk Abimeleq qnnaqah qneepah quri tama na. Kiya ka wada phuqil 70 mtswai na. 57Kana qnnaqah noda seediq Sekem, Utux Baro we wada na cyukan tunux daha kana. Sniyus Yotam laqi Yerubaal we wada heyi na kana da.
Currently Selected:
Dmpsgao 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
