Dmpsgao 8
8
Ini Baka ka Seediq Midyan
1Rmengo Gidon ka seediq Eprayim: “Mmaha namu mccebu seediq Midyan ciida, ma namu ini plawa yami? Ma so kiya qnita namu kenan?” 2Rmengo dheya ka Gidon: “Ndaan miyan we maha huwa mesa pntnaun noda namu ho? Knrngiyan nangal lipas Eprayim we uxe mgkala lipas nangal Abiejer peni? 3Wada na sbege baga namu ka Oreb ma Jeeb 2 qbsuran mdudul Midyan. Hmuwa kesun pntnaun noda namu ka ndaan miyan yami ho?” Rmnengo kari nii ka Gidon de, malix seang daha ka dheya da.
4Meyah betaq yayung Yarden ka Gidon ma dseediq 3'00 heyi ma, mtaril sipo. Ani muuwic ka dheya we, ida krinah smdurak dheya. 5Rmengo seediq Sukot ka heya: “Biqi tikuh pang ka dseediq nii smnegul kenan. Ado gaga muuwic ka dheya da. Gisu su smdurak mhero qbsuran paru Midyan Jebax ma Calmuna ka yaku.” 6Rmengo ka dqbsuran mdudul seediq Sukot: “Gaga baga su ka qapal baga Jebax ma Calmuna de, Kiya ka bege miyan dsupi su ka pang peni?” 7Rmengo ka Gidon: “Kiya ho! Bobo wada na sbege baga mu ka Jebax ma Calmuna ka Utux Tmninun de, mpdoi ku pako tadus brenux ma srkunux beebu yamu.” 8Peeyah hiya mosa baro betaq Penuel ka Gidon. Ida so nii kari na rmengo dseediq hiya uri. Cniyuk seediq Penuel we ida mntena seediq Sukot uri. 9Kiya de rmengo dseediq Penuel uri ka Gidon: “Tbleyaq miyan mbrinah ciida de, hrahun mu ka alang nii.”
10Ciida, niqan 1 mang 50'00 heyi ka Jebax ma Calmuna ma, dsupi smnegul dheya meniq Qarqor hiya. Kiya ka kana knrngiyan supi pneeyah nklaan hido hiya. Ado wada phqilun mccebu dmoi hlmadac we 12 mang heyi. 11Peeyah elu dseediq meeniq kobu gaga nklaan hido Nobax ma Yuebiha hiya mosa tgbaro ka Gidon. Gisu lmngelung uxe mphuwa mesa ka supi Midyan ciida cmebu dheya. 12Qduriq ka Jebax ma Calmuna. Smdurak mhero dheya ka Gidon. Betaq wada prhepun ka kana supi bobo wada qrapun ka Jebax ma Calmuna qbsuran paru Midyan.
13Gidon laqi Yoas we peeyah nniqan na mccebu hiya moda mcherus Xeres meyah. 14Qmerac 1 riso ma smiling heya. Kiya de heya ka pnatis 77 heyi dmdudul ma ddrudan Sukot sbege na Gidon. 15Mosa seediq Sukot hiya ka Gidon de rmengo: “Mnhulis namu rmengo kenan cuuxal ka yamu: ‘Gaga baga su ka qapal baga Jebax ma Calmuna de, ya Kiya ka bege miyan dsupi su ga muuwic smnegul sunan ka pang nii?’ Qtai! Gisu hini ka Jebax ma Calmuna.” 16Kiya de qrapun daha ka rdrudan ckceka alang hiya ma, sdoi na pako tadus brenux ma srkunux beebu dseediq Sukot. 17Dungal we hrahun na ka paga Penuel ma, phqili na ka seediq alang hiya.
18Rmengo Jebax ma Calmuna ka Gidon: “Wada namu phqilun Tabor hiya ka dseediq we mgmaanu seediq ho?” Cmiyuk ka dheya: “Mntena ba sunan ka dheya. Tgtaxa daha we mntena so hnyegan laqi qbsuran paru.” 19Rmengo ka Gidon: “Mtswai mu ka dheya, laqi ba bubu mu. Mpsdehu ku quri Utux Tmninun muudus ani knuwan, nasi namu ini phqili ka knuudus daha we, uxe ku phuqil yamu uri.” 20Kiya de rmengo Yeter tgqbsuran laqi na: “Tutui, phqili ka dheya!” Kiya de miicu ka riso nii, miicu hmgeluq hlmadac, ado laqi ba ka heya na. 21Rmengo Gidon ka Jebax ma Calmuna: “Asi isu nanak ka phuqil yami! Ado hmuwa ka seediq we, maha so kiya ka beyax na uri.” Kiya de mtutuy ka Gidon. Phqilun na ka Jebax ma Calmuna. Kiya ma ngalun na ka waqic idas gaga pndpingan nduyung dapa bukung.
Pheyu Ipudi Meeniq Oprah ka Gidon
22Rmengo Gidon ka seediq Israel: “Wada su dmoi baga pqduriq baga Midyan ka isu de, tai so isu ka mpqlahang dyami ma, lqlaqi ma lqlaqi laqi su ka mpqlahang yami uri.” 23Rmengo dheya ka Gidon: “Uxe ku mpqlahang yamu ka yaku. Uxe mpqlahang yamu ka lqlaqi mu uri. Utux Tmninun ka mpqlahang yamu.” 24Rmengo dheya dungal ka Gidon: “Niqan 1 ooda ka durun mu yamu. Briku birac gnlekan namu we biqi kenan.” Ado pdeping briku birac ka seediq Yismael pais han. 25Rmengo ka seediq Israel: “Mqaras miyan mege sunan!” Kiya de smapo lukus ma sqada daha bobo hiya ka briku birac gneeluk daha. 26Knhdilan pnesa king briku birac na we ya ba 17'00 skere king. Duma na nii, niqan pdeping waqic idas, briku birac, lukus mtgdiyuc pnlukus qbsuran paru Midyan ma, pdeping sniru dapa bukung. 27Sdoi na kana nii smalu 1 ipudi ka Gidon. Phyegun na Oprah alang na hiya. Kiya de thmuku ipudi ma moda mnhemuc msuupu hiya ka kana Israel. Gisu tmlenga Gidon ma kana sapah na ka nii da. 28So kiya de, Seediq Israel we wada na ini baka ka Midyan ma betaq ini tutui ka dheya. Ali kndesan Gidon ciida, mmsbleyaq 40 knkawas ka dxeral nii.
Mhuqil ka Gidon
29Yerubaal laqi Yoas we mosa brinah meniq sapah na. 30Laqi Gidon we 70 heyi. Ado egu ka mqedil na. 31Mqedil nurun na gaga meniq Sekem we tmlaqi 1 laqi rseno, Abimeleq kesun na tmngayan ka Gidon. 32Gidon laqi Yoas we rudan riyung ma mhuqil da. Reesun daha Oprah gaga seediq Abi Haijir hiya, kiya ka habung Yoas tama na.
33Bobo mhuqil ka Gidon de, mosa smnegul Baal ma mmhemuc msuupu dungal ka seediq Israel. Ngalun daha duutux daha ka Baal Berit. 34Seediq Israel we, ini daha klai ka Utux Tmninun, Utux Baro daha. Kiya ka dmnoi baga dheya pneeyah baga pais ssiyo daha. 35Ini daha pyugi ka Yerubaal ma, ini daha sbliqi ka tnsapah Gidon so gnhuwe na Israel ka dheya.
Currently Selected:
Dmpsgao 8: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
