Dmpsgao 7
7
Ini Baka Gidon ka Seediq Midyan
1Mtutuy mgrebu ka Gidon Yerubaal ma kana seediq smnegul heya ma, pkobu ssiyo pusu qsiya Xarod. Pkobu tgdaya daha ka Midyan ma smdaling dxeral breenux dgiyaq biciq Moreh.
2Rmengo Gidon ka Utux Tmninun: “Seediq smnegul sunan we egu riyung. Uxe mu bege baga daha ka Midyan. So maha tndahu rmengo ka Israel, mprengo: ‘Mnoda baga mu nanak ka dmoi baga yami.’ 3Saya, rngagi ka seediq nii: ‘Kana miicu na we, brinah mlatac dgiyaq Gilad.’” Kiya de 2 mang 20'00 heyi ka wada mbrinah. Msngari ba 1 mang heyi.
4Rmengo Gidon ka Utux Tmninun: “Ida hbaro niya na ka seediq. Adis ssiyo qsiya ka dheya, klaun mu psseung dheya meeniq hiya. Ima ka gaga misu srengo: ‘Tduwa mosa theyaq sunan ka seediq nii’ mesa ku de, tduwa mosa theyaq sunan ka heya. Ima ka gaga misu srengo: ‘Ini tduwa mosa theyaq sunan ka seediq nii’ mesa ku de, ini tduwa theyaq sunan ka heya.” 5Kiya de Gidon we, desun na ssiyo qsiya hiya ka seediq. Rmengo Gidon ka Utux Tmninun: “Kana mntena so huling mimah qsiya na we, phyegi icil. Kana tmbqelic papak mimah qsiya na we, phyeegi icil uri.” 6Kiya de 3'00 heyi ka dmnahun baga mimah qsiya. Kana daha de tmbqelic papak daha mimah qsiya. 7Rmengo Gidon ka Utux Tmninun: “3'00 heyi dseediq dmnahun baga mimah qsiya nii ka mdoi baga yamu ma, bege mu baga su ka Midyan. Kana seediq de pbrnahi posa ddxeral daha nanak kiya.” 8Dmoi uqun ma urung ka baga seediq. Kana seediq Israel de, skgulan na pbrinah kobu daha nanak ka Gidon. Wano ba mtngari 3'00 heyi. Gaga meniq breenux tgtruma kobu daha ka Midyan.
9Keeman ciida, rmengo Gidon ka Utux Tmninun: “Tutuy! Osa kmremux kobu. Ado wada mu sbege baga su ka heya da. 10Nasi su miicu mosa kmremux we, desi kobu hiya ka Purah tnqliyan su. 11Maha su mbahang rnengo daha. Kiya de maha niqan beyax ka baga su mosa kmremux kobu.” Kiya de Gidon we maadis Purah tnqliyan na mosa betaq kobu ssiyo dseediq gaga dmoi qyqeya mccebu. 12Seediq Midyan, Amaleq ma, kana dseediq pneeyah nklaan hido we gaga mggarang meniq breenux, mntena so qpuruh utun knhbragan daha. Egu riyung ka dapa bukung daha, mntena so bnaquy rcilung kneegu. 13Dehuk hiya ka Gidon. Qtai! Gaga smneeru sepi na ka 1 seediq: “Qtai! Mnsepi ku 1 sepi. Qtai! 1 paru ba tnumun pang tdoruy mremux kobu Midyan, betaq kobu ma mrqeraq ka kobu. Betaq mhurah ma mtuting dxeral ka kobu.” 14Rmengo ka tnhiyan na: “Uxe pneeyah icil ka nii. Nii we kiya ka hlmadac Gidon laqi Yoas seediq Israel ka kiya. Utux Baro we wada na sbege baga na ka Midyan ma kana supi na.” 15Mnbahang tnugesa na sepi nii ka Gidon de, asi thmuku Utux Baro. Mbrinah meyah kobu Israel hiya de, rmengo: “Tutuy da! Utux Tmninun we, wada na sbege baga ta ka supi Midyan da.” 16Kiya de Gidon we tgtruun na ptbeku ka 3'00 supi na. Txtaxa heyi we biqan na pn1 iyuk urung ma pn1 rusuq niqan harung hhiru. 17Rmengo dheya ka heya: “Qtai ka yaku. Puyu so noda mu. Qtai! Betaq ku ssiyo kobu de, maanu ka noda mu we, puyu moda ka yamu uri. 18Miyuk ku iyuk urung ka yaku ma dseediq smnegul kenan ciida we, iyuk urung meniq ssiyo kobu ka yamu uri ma plawa: ‘Ririh Utux Tmninun! Ririh Gidon!’”
19Meniq berah ckceka rabi, bobo hani mnpriyux ka supi mpqlahang ciida, tena dehuk ssiyo kobu daha ka Gidon ma 1'00 heyi nadis na. Miyuk urung ma prequn daha ka rusuq gaga baga daha. 20So nii moda ka 2 qpuruh supi uri. Pheyu dmoi tqilung hmiru ka iril baga daha ma dmoi iyuk ka narac baga daha. Mdiras mlawa: “Hlmadac Utux Tmninun ma Gidon!” 21Mheyu meniq ssiyo kobu hiya ka txtaxa daha. Pais de, asi trrengac mddiras tmalang qduriq kana. 22Miyuk iyuk ciida ka 3'00 seediq Gidon ciida, Utux Tmninun kesun na pphuqil dheya nanak ka dpais. Kiya de qduriq mquri Cererah betaq Bet Hasitah ma Abel Mexolah ssiyo Tabat ka dheya. 23Gisu plaanun mmaha mhero seediq Midyan ka kana seediq Israel peeyah Naptaliy, Aser ma, Menaseh. 24Gidon we smkagul seediq mosa kana dxeral dgiyaq Eprayim ma rmengo dheya: “Aguh heruc mccebu seediq Midyan. Qlhangi ka ntrilan yayung Yarden betaq Bet Barah. So maha hmetur mtaril ka seediq Midyan.” 25Qrapun daha ka Oreb ma Jeeb 2 qbsuran mdudul seediq Midyan. Phqilun daha lhengo Oreb ka Oreb ma, phqilun daha qpean sino Jeeb hiya ka Jeeb. Ida ini sange smdurak seediq Midyan ka dheya ma, desun daha Gidon gaga nklaan hido sipo yayung Yarden hiya ka tunux Uric ma Jeeb.
Currently Selected:
Dmpsgao 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
