Dmpsgao 6
6
Gidon
1Ini pndungus Utux Tmninun ka noda seediq Israel. Kiya de Utux Tmninun we, sbege na baga seediq Midyan 7 knkawas ka dheya. 2Ini baka baga seediq Midyan ka seediq Israel. Kiya de mosa kmari llhengo pkobu ckceka ddgiyaq tgleing seediq Midyan. 3Bobo mhedu tmukuy ka seediq Israel de, meyah cmebu dheya ka seediq Midyan, Amaleq ma, seediq pneeyah nklaan hido. 4Pkobu ssipo daha ma, smeeliq kana pnhmaan daha betaq Ajah. Ini ba rngii uqun, dapa ma, dapa roba ka seediq Israel. 5Ado mntena so utun knuegu madis tnbugan ma kobu daha ka dheya. Ini snqlingi smepu ka seediq ma dapa bukung ma, meyah kmremux qlhangan smeeliq kana dxeral. 6Ado Midyan qrinuc bale ka Israel. Kiya de mlawa Utux Tmninun ka seediq Israel.
7Ado Midyan mlawa quri Utux Tmninun ka seediq Israel ciida. 8Kiya de Utux Tmninun we smkagul 1 mpgeela kari mosa seediq Israel hiya. Rmengo dheya: “Rmnengo so nii ka Utux Tmninun, Utux Baro nuIsrael: ‘Dmnudul ku yamu peeyah Micrayim, mnlatac namu peeyah sapah tnqliyan ka yamu. 9Dmnoi ku baga namu peeyah baga seediq Micrayim, mnlatac kana baga tmnraqil sunan. Yaku ka lmiwaq dheya peeyah berah namu. Dxeral daha we wada mu sbege dyamu. 10Rmnengo ku dyamu, yaku we Utux Tmninun, Utux Baro namu. Mneniq namu dxeral seediq Amori, iya bale kcugi ka duutux daha. Kiya de ini namu qbahang kari mu ka dyamu.’”
Gmao Gidon
11Meyah betaq Oprah ka snkgulan Utux Tmninun. Tleung toma pusu qhuni raus Yoas seediq Abi Haijir hiya. Gidon laqi Yoas we gisu smebuc mugi meniq asu qpean sino. Ririh qduriq seediq Midyan. 12Mtqita Gidon ka snkgulan Utux Tmninun, rmengo heya: “Supi mnpahung ba! Mtheyaq sunan ka Utux Tmninun!” 13Rmengo heya ka Gidon: “Bukung! Braho su prngagi ku hiya, nasi mtheyaq yaku ka Utux Tmninun de, ma nami gisu smterung kana so nii ho? Pusu rudan nami we rmnengo yami: ‘Dmnudul yami pneeyah Micrayim ka Utux Tmninun’, Gaga inu ka so sklwiun qneepah na ho? Saya, qmada yami ka Utux Tmninun, sbege nami na qapal baga seediq Midyan ka dyami.” 14Mquri Gidon rmengo heya ka Utux Tmninun: “Osa! Pooda beyax su so nii, sai dmoi baga peeyah qapal baga seediq Midyan ka Israel. Uxe ku smnkagul sunan da peni?” 15Rmengo heya ka Gidon: “Bukung! Braho su prngagi ku hiya, mphuwa ku mesa dmoi baga Israel ho? Qtai! Tgbiciq nami riyung meniq pnswayan rudan Menaseh ka dyami. Tgbiciq ku riyung meniq tnsapah tama mu ka yaku uri.” 16Rmengo heya ka Utux Tmninun: “Yaku ka mptheyaq sunan. Kiya de tduwa su mccebu Midyan, mntena so mccebu 1 ba seediq.” 17Rmengo heya ka Gidon: “Nasi saku kuxul meeniq berah doriq su, braho su bale biqi ku hiya pnskraya su, so maha ptuura ba gisu su rmengo quri sunan ka isu. 18Braho misu bale, iya bale latac peeyah hini, tara ku hiya ma maadis ku bbege mu psaun mu berah su.” Rmengo ka heya: “Mptara ku meyah sunan.”
19Kiya de Gidon we mosa psramal 1 wawa miric, saangal na 1 igipa malu mugi smalu pang ini psai tgeda. Psaun na ckceka rawa ka heyi ma, psaun na rusuq ka begu. Desun na toma qhuni raus sbege na heya. 20Rmengo Gidon ka snkgulan baro: “Posa bobo btunux ka wawa ma pang ini psai tgeda. Hrgani bobo na heya ka begu.” Muyu so nii moda ka heya. 21Hmkero hukuc gaga baga na ka snkgulan Utux Tmninun, ptelung heyi ma pang ini psai tgeda ka tunux hukuc na de, asi pncriyu peeyah ckceka btunux ka puuniq meeyah qmhedu mekan heyi ma pang ini psai tgeda. Kiya de asi ini qtai peeyah berah naka snkgulan Utux Tmninun. 22Mkela snkgulan Utux Tmninun ka heya de, rmengo ka Gidon: “Maanu ka so nii! Utux Tmninun Bukung! Ado bale ku ba qmnita ba dqeras snkgulan Utux Tmninun ka yaku da.” 23Rmengo heya ka Utux Tmninun: “Ptbale lhebun su, iya kiicu. Uxe su mphuqil.” 24Kiya de smalu 1 spuhan Utux Tmninun hiya ka Gidon. Utux Tmninun Syarung kesun na tmngayan. Spuhan nii we ida gaga meniq Oprah dseediq Abi Haijir hiya na betaq saya.
25Keeman ciida, rmengo Gidon ka Utux Tmninun: “Sai mangal ka balas dapa tama su, adis hini ka 7 knkawas tg2 dapa balas. Hurah ka spuhan Baal ntama su ma slapi ptakur ka Aserah tikung gaga ssiyo na hiya. 26Ptbeku ba smalu spuhan Utux Tmninun, Utux Baro su bobo hiya. Kiya de doi qhuni gneyu namu Aserah psqama smapuh mege ka tg2 dapa balas.” 27Kiya de Gmao 10 heyi tnqliyan na ka Gidon ma muyu tnugesa Utux Tmninun moda ka heya. Ado miicu tnsapah na ma dseediq lualang hiya de, miicu mooda diyan, daan na keeman.
Hmurah Spuhan Baal ka Gidon
28Mtutuy mgrebu ba so seediq tnualang hiya. Qtai! Wada hrahun ka spuhan Baal, Aserah tikung gaga ssiyo na we wada slapun uri ma tg2 dapa balas we gaga spuhan bobo spuhan hiya. 29Kiya de mssiling ka dheya: “Ima ka mnoda so nii?” Bobo mnoda smiling ka dheya de, rmengo ka dheya: “Noda Gidon laqi Yoas ka nii.” 30Rmengo Yoas ka seediq tnualang: “Peeyah ka laqi su, phqilun nami! Ado wada hmurah spuhan Baal ka heya ma, wada smalak Aserah ka heya.” 31Rmengo dseediq kmpais heya ka Yoas: “Gisu namu dmayo rmengo Baal ka yamu ho? Mkdmayo namu heya ka yamu peni? Ima ka kmdayo rmengo heya de, asi phqili mgrebu ka heya! Nasi Utux Baro ka Baal, nasi wada hmurah spuhan na ka seediq de, pdai nanak heya ka mdayo rmengo!” 32Kiya de peeyah ali ciida, Yerubaal kesun daha tmngayan ka Gidon. Kari na nii we, “Heya ka wada ptakur spuhan Baal, pdai nanak Baal ka mdayo rmengo.”
33Ciida, kana seediq Midyan, Amaleq ma, dseediq pneeyah nklaan hido we gaga msseli kana. Mtaril yayung ka dheya ma, pkobu dxeral brenux Yijreel. 34Dehuk heyi Gidon ka Bgihur Utux Tmninun. Miyuk urung ka heya, kiya de smnegul heya kana ka seediq Abiejer. 35Smkagul snkgulan moda mkkesa Menaseh ka heya. Kiya de psseli ma smnegul heya ka seediq Menaseh uri. Dungal we smkagul snkgulan mosa Aser, Jebulun ma, Naptaliy dungal ka heya, kiya de meyah msseli kana ka dheya uri.
Pnskraya Noda Ubal Miric
36Rmengo Utux Baro ka Gidon: “Nasi bale ba muyu kari rnengo su, spooda su baga mu mdoi baga Israel, 37qtai! Gaga mu psaun bobo sbetan mugi hiya ka 1 gntuwan ubal miric. Nasi niqan wano ba ubal miric ka niqan dremus ma mdengu ka kana dxeral de, maha ku asi kela ma mpuyu ku so kari su, mpooda baga mu mdoi baga Israel.” 38Wada mnduwa ba so nii moda kana da. Mtutuy mgrebu kusun ka Gidon. Qpean na ka ubal miric, pneeyah qnpean na ubal miric ka qsiya dremus ge stenge 1 pngerah. 39Kiya de rmengo Utux Baro dungal ka Gidon: “Braho misu, iya ku ba kseengi. Mprengo ku dungal. Pdai ku mptexal ppseung ubal miric dungal. Tai so mdengu ka ubal miric ma, mdremus kana ka dxeral.” 40Ida keeman ciida, ida so nii mooda ka Utux Baro. Drmelan dremus kana ka dxeral ma wano ba ubal miric ka mdengu.
Currently Selected:
Dmpsgao 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
