Dmpsgao 5
5
Uyas Deborah
1Ali ciida, muuyas ka Baraq laqi Abinoam ma Deborah, rmengo:
2“Niqan qbsuran mdudul ka Israel,
mqaras smnegul nanak ka seediq,
yamu we tndhui ka Utux Tmninun!
3Dqbsuran paru! Qbahang! Laqi qbsuran! Qbahang ka birac su!
Yaku we, mpuuyas ku mquri Utux Tmninun.
Mpuuyas ku Utux Tmninun, Utux Baro nuIsrael.
4Utux Tmninun! Peeyah su Seir ka isu,
peeyah su qnpahan Edom mquri su berah,
mlgelu ka dxeral,
pquyux ka karac,
peeyah qsiya ka plabu uri.
5Mlgelu berah Utux Tmninun ka ddgiyaq,
mlgelu berah Utux Tmninun, Utux Baro nuIsrael uri ka dgiyaq Sinay.
6Meniq Samgar laqi Anat ciida,
meniq ali Yael ciida,
uka seediq mkkesa elu paru,
rmaro elu icil ka seediq mooda.
7Ini niqi ka lualang Israel,
uka ani kingal seediq,
betaq ku mtutuy ka yaku Deborah,
mtutuy ku ma bubu Israel!
8Gmao utuutux bgurah ka seediq Israel,
kiya de meyah betaq rhengun alang ka mccebu.
Ckceka 4 mang seediq Israel,
ya daha qtaan ka sbaang ma snbrangan ho?
9Lmngelung ku dmpdudul Israel ka lhebun mu,
peeyah lhebun msuupu seediq mqaras smnegul ka dheya.
Tndhui ka Utux Tmninun!
10Gisu paapa dapa roba bhege hari,
gisu tleung pala tnunan rako,
mkkesa elu we,
yamu we lnglungi bale!
11Hmrinas hrenang budi ka hrenang bubul qsiya,
meeniq hiya, mprengo knsderux noda Utux Tmninun ka seediq,
knsderux noda na quri seediq Israel ka heya.
Ciida, hmeruc mmaha rhengun alang ka seediq nuUtux Tmninun.
12Deborah! Tutuy da! Tutuy da!
Tutui da! Tutui ma pyasi!
Baraq! Tutui da!
Laqi Abinoam! Qnrapan su! Qnrapan su isu!
13Ciida, seediq mnsngari muudus ckceka mbleyaq seediq,
ririh yaku mosa mccebu mbbeyax ka seediq Utux Tmninun.
14Seediq pnrdingan pneeyah seediq Amaleq we, hmeruc peeyah Eprayim,
smnegul sunan, dseediq su Binyamin.
Niqan ka mdudul pneeyah Makir,
dmoi hukuc niqan beyax hmeruc pneeyah Jebulun.
15Msuupu Deborah ka dmdudul Yisaskar.
Hmuwa ka Baraq we, so kiya ka Yisaskar uri.
Smnegul Baraq kmremux breenux ka heya.
Pnswayan rdrudan Reuben we niqan ka seediq mkela ba lnglungan.
16Ma su tleung ckceka tibu miric,
mbahang su hrenang niyuk daha ckceka rahul miric ho?
Pnswayan rdrudan Reuben we niqan ka seediq mkela ba ooda.
17Tbleyaq meniq quri nklaan hido yayung Yarden ka Gilad.
Ma gaga meniq bobo asu ka Dan ho?
Aser we meniq ssiyo rcilung,
tbleyaq meniq trilan asu hiya ka heya.
18Jebulun we seediq ini kiicu hhuqil,
meniq bobo dgiyaq ka Naptaliy we so nii uri.
19Meyah mccebu kana ka dqbsuran paru.
Ciida, qbsuran paru Kenaan we mccebu Tanak ssiyo yayung Megido hiya,
kiya we uka ba ka gneeluk daha pila.
20Mccebu peeyah karac baro ka pngerah,
peeyah elu daha kmremux Sisra.
21Beyax yayung Qison we mquri dheya cmebu,
beyax yayung ncbeyo, kiya ka beyax yayung Qison.
Bgihur mu! Kremun mosa!
22Ciida, mbeyax qmleqah ka dapa dmay,
mkkere dapa dmay we mbeyax tmalang.
23Rmengo ka snkgulan baro: ‘Syusi ka Meroj,
tbyaxi cmiyus ka seediq meniq hiya,
ado ini eyah dmayo Utux Tmninun,
ini eyah dmayo Utux Tmninun mccebu mbbeyax.’
24Tai so hmrinas dmqedil nangal egu na smbleqan ka Yael mqedil Xeber seediq Qeyniy,
hmrinas mqedil meniq truma kobu nangal na smbleqan.
25Mesa qsiya ka Sisra,
mege beyuq nunuh dapa ka Yael,
hrigan na pngerah knmalu ka geluq beyuq nunuh mege heya.
26Mangal xiluy ka iril baga Yael,
dmoi tuting ka narac baga na.
Beebu Sisra, pstmaqun na ka tunux na,
lhugun na metaq ka kgeli na.
27Sisira we tmkemu heyi na meeniq toma papak na, mtakur ma mksaro,
tmkemu heyi meniq toma papak na, spaux.
Tmkemu heyi inu ka heya we, kiya ka mksaro ma mhuqil hiya.
28Pooda beling qmita nganguc ka bubu Sisra,
peeyah toma kraga beling mqraqil mlawa:
‘Ma sgcuqi meyah ka rulu mccebu na ho?
Ma sgcuqi ksaun na ka papak rulu ho?’
29Cmiyuk heya ka mmqedil tnqliyan niqan knkela ma, kmuutux nak rmengo ka heya:
30‘Ya gaga psaasu qyqeya gneeluk daha,
knkingal mbbeyax we mangal pn2 weewa kana daha peni?
Sisra we mangal lukus bgurah ka gneeluk na,
mangal lukus bgurah gnlekan niqan rako,
2 lukus niqan rako bgurah nii,
sniru nduyung na ka dnoi nangal daha mccebu.’
31Utux Tmninun! Tai so mntena so nii mphuqil ka pais su!
Tai so seediq gmaalu sunan we, mntena hido mgkala ma pkledax paru ledax!”
Kiya de 40 knkawas mmsbleyaq ka dxeral nii.
Currently Selected:
Dmpsgao 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020