Dmpsgao 4
4
Deborah ma Baraq
1Bobo wada mhuqil ka Ehud de, ini pndungus Utux Tmninun ka noda dseediq Israel. 2Kiya de Utux Tmninun we, sbege na baga Yabin qbsuran paru Kenaan gaga meniq Xacor ka seediq Israel. Qbsuran supi Yabin we Sisra gaga meniq Haroset Hagoyim. 3Mlawa Utux Tmninun ka seediq Israel. Ado niqan 9'00 rulu xiluy mccebu ka Yabin qbsuran paru ma, pcqiun na pqraqil betaq 20 knkawas ka seediq Israel.
4Niqan ka Deborah mpgeela kari mqedil, heya we mqedil Lapidot, ma psgao Israel ciida ka heya. 5Heya we meniq cenga Rama ma Beytel dgiyaq Eprayim hiya ma, toma pusu qhuni sbiki nDeborah hiya ka heya. Seediq Israel we mosa mbahang pnsgeegan na kana. 6Heya we smkagul Qedes pneeyah Naptaliy mosa mlawa Baraq laqi Abinoam. Rmengo heya: “Rmengo sunan ka Utux Tmninun, Utux Baro nuIsrael: ‘Osa dmudul 1 mang seediq Naptaliy ma Jebulun adis betaq dgiyaq Tabor. 7Pqriun mu yayung Qison ddyamu hiya ka Sisra mpdudul supi Yabin ma rulu mccebu na. Bege mu baga su ka heya.’” 8Rmengo heya ka Baraq: “Nasi su theyaq kenan mosa we mosa ku. Ini su theyaq kenan mosa we uxe ku mosa.” 9Rmengo ka Deborah: “Ida ku mptheyaq sunan mosa ka yaku. Kiya de we, mpkuuka knledax su meniq klgelu ka isu, ado Utux Tmninun we gaga na sbege baga mqedil ka Sisra.” Kiya de mtutuy ka Deborah ma mtheyaq Baraq msuupu mosa Qedes hiya ka heya. 10Psseli seediq Jebulun ma Naptaliy mosa Qedes ka Baraq. Smnegul heya we 1 mang heyi ma, mtheyaq heya mosa ka Deborah uri.
11Xeber dseediq Qeyniy, lqlaqi mslutuc Xobab ma baki Moseh we, mlatac seediq Qayin. Mosa pkobu pusu qhuni raus Caananim smdaling Qedes hiya.
12Niqan seediq meyah rmengo Sisra: “Wada bobo dgiyaq Tabor ka Baraq laqi Abinoam.” 13Kiya de psseli kana 9'00 rulu mccebu ma kana supi ka Sisra peeyah Haroset Hagoyim meyah betaq yayung Qison. 14Rmengo Baraq ka Deborah: “Tutuy! Ali saya wada na sbege baga su ka Sisra. Uxe maha mkkesa berah su ka Utux Tmninun peni?” Kiya de hmeruc mosa dgiyaq Tabor ka Baraq. Smnegul heya we 1 mang heyi. 15Utux Tmninun we, prrwanun na ka kana rulu mccebu ma kana supi Sisra. Spaux toma hlmadac berah Baraq ka dheya. Kiya de hmeruc peeyah rulu mccebu ka Sisra ma tmalang qduriq. 16Smdurak rulu mccebu ma supi betaq Haroset Hagoyim ka Baraq. Wada mtakur toma hlmadac kana ka supi Sisra. Uka ani kingal ka mtngari.
17Wano ba Sisra ka tmalang qduriq mosa kobu Yael mqedil Xeber seediq Qeyniy. Ado mtbleyaq msuupu ka Yabin qbsuran paru Xacor ma Xeber seediq Qeyniy. 18Meyah smterung Sisra ka Yael, rmengo heya: “Pusu tnsapah mu eyah toma. Iya kiicu eyah toma hini.” Kiya de mosa truma kobu na ka Sisira. Yael we mangal pala plukus heya. 19Rmengo Yael ka Sisra: “Nii ku mhqeni bale. Braho su pmahi ku biciq qsiya.” Rmaguh lubuy qraqil pnsaan nunuh ka Yael. Pmahan na ma, gmukan na dungal. 20Rmengo Yael ka Sisra: “Braho misu bale heyu rhengun kobu. Nasi meyah smiling ka seediq: ‘Niqan seediq gaga hini ho?’ Rengo ka isu: ‘Uka’ kesa.” 21Muuwic ma betaq pchungi mtaqi ka Sisra. Yael mqedil Xeber we, mangal tuting ma xiluy pteetu ka baga na. Mthuwe bale meyah nniqan na hiya. Speeyah na kgeli na pteetu ka xiluy kiya ma pklihu betaq dxeral. Kiya de mhuqil ka Sisra da. 22Qtai! Smdurak Sisra ka Baraq. Kiya de meyah smterung heya ka Yael. Rmengo heya: “Aguh, pqtai misu seediq gisu su gimun.” Kiya de mremux kobu ka heya. Qtai! Gisu mtakur dxeral mhuqil ka Sisra da. Ida gaga meniq kgeli na ka xiluy na.
23Ali ciida, Utux Baro we meniq berah seediq Israel wada na ini baka ka Yabin qbsuran paru Kenaan. 24Peeyah ciida, krinah mbeyax ka baga seediq Israel mquri Yabin qbsuran paru Kenaan ma, betaq wada pkngalun ka Yabin qbsuran paru Kenaan.
Currently Selected:
Dmpsgao 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020