Dmpsgao 3
3
Mnsngari Qqlhangan
1Utux Tmninun rmangi qqlhangan nii we, ppseung na dseediq Israel uxe mnoda mccebu Kenaan. 2Gisu pgkela ma tmgesa bobo knxalan seediq Israel mkela mccebu. Dheya nii we uxe mnoda mccebu ka dheya. 3Mnsngari we 5 ka qbsuran mdudul seediq Peliset, kana seediq Kenaan, Cidon ma, seediq Xiwiy pneeyah dgiyaq Baal Xermon betaq tmayan Xamat gaga meniq dgiyaq Lebanon. 4Dheya nii we gisu pseung Israel, yaa bale mpsruwa mbahang tnugesa Utux Tmninun pnooda na Moseh rnengo na pusu rudan daha. 5Kiya de seediq Israel we, meniq ckceka seediq Kenaan, Xet, Amori, Perijiy, Xiwiy ma, Yebus ka dheya. 6Mangal weewa daha ma, pstrengun na dheya ka weewa daha uri. Kiya uri we thmuku duutux daha.
Otniel
7Ini pndungus Utux Tmninun ka noda seediq Israel. Cmhungi Utux Tmninun, Utux Baro daha, mosa thmuku Baal ma Aserah. 8Kiya de sqama seang na mquri Israel ka Utux Tmninun. Kiya ka sbege na baga Kusan Risatayim qbsuran paru Misputamiya ka dheya. Seediq Israel we mn8 knkawas psqrnutun daha Kusang Ristaying. 9Mlawa Utux Tmninun ka seediq Israel. Kiya de pstutui 1 meeyah dmoi baga daha ka Utux Tmninun. Kiya ka Otniel laqi Qenaj mtswai Kaleb. 10Meyah heyi Otniel ka Bgihur Utux Tmninun, kiya ka ma mpsgao Israel ka heya. Mosa mccebu ka heya we Utux Tmninun ge, sbege na baga Otniel ka Kusan Risatayim qbsuran paru Aram. Baga na we, ini na baka mccebu ka Kusang Ristaying. 11Dxeral nii we 40 knkawas mmsbleyaq. Wada mhuqil ka Otniel laqi Qenaj.
Ehud
12Ini pndungus Utux Tmninun ka noda seediq Israel. Kiya de Utux Tmninun we, pkbyaxun na ka Eglon qbsuran paru Moab ma meyah kmremux Israel. Ado ini pndungus Utux Tmninun ka noda daha. 13Psseli seediq Amon ma Amaleq meyah nniqan na hiya ka Igurung. Kiya de mosa cmebu Israel ma, ngalun daha ka alang sbiki paru. 14Betaq 18 knkawas psqrnutun daha Eglon qbsuran paru Moab ka seediq Israel.
15Mlawa Utux Tmninun ka seediq Israel. Kiya de ptutuy 1 meeyah dmoi baga daha ka Utux Tmninun. Kiya ka Ehud piiril baga laqi Gera seediq Binyamin. Seediq Israel we pdesan daha lnabu ka Ehud mosa mege Eglon qbsuran paru Moab. 16Smnalu hlmadac mcciyuk 2 ngayus 1 sese qndisan ka Ehud ma, bkeun na papak tgnarac qriyan na lukus mgbaro. 17Sbege na Igurung qbsuran paru Moab ka lnabu. Eglon we qtehur bale. 18Mnhedu mege lnabu de, skgulan na nganguc ka dseediq dmnidil lnabu. 19Kiya de, mosa tikung gaga smdaling Gilgal ka heya ma, mbrinah ma rmengo: “Qbsuran paru! Mprengo ku 1 kari lneing sunan.” Rmengo ka qbsuran paru: “Iya eniq hini kana!” Kiya de wada mbrinah kana ka dseediq mneniq ssiyo na. 20Mosa so qbsuran paru hiya ka Ehud. Wano ba heya nanak ka tleung sbsagan toma dnamux hiya. Rmengo ka Ehud: “Niqan ka kari Utux Tmninun mprengo ku sunan.” Kiya ka mtutuy peeyah tnluungan na ka qbsuran paru. 21Kiya de Ehud we sniiril na hmgeluq ka hlmadac gaga narac papak na ma, sbetaq na nbuyas qbsuran paru. 22Kana riduy na mtheyaq hlmadac wada truma nbuyas kana. Pqecul heyi qnthuran ka hlmadac. Ini na hgluqi peeyah nbuyas hiya ka hlmadac de, asi eyah ka quti na. 23Mlatac mosa nganguc rhengun ka Ehud. Htiyan na rmuhu tgbaro hiya ka qbsuran paru. 24Bobo meyah nganguc ka Ehud de, meyah ka tnqliyan qbsuran paru. Qmita ka dheya. Qtai! Gisu rhugan ka rhengun sbsagan toma dnamux nii de rmengo: “Ye bale gaga tbleyaq mosa nganguc ka qbsuran paru.” 25Pkaxa tmara ka dheya. Qtai! Ini traguh ka rhengun nana. Kiya de mosa mangal rraguh ma rwahan daha ka rnhugan. Qtai! Tnpusu sapah daha we, gisu mksaro dxeral mhuqil da.
26So nii tggila ciida ka dheya na we tena wada qduriq ka Ehud da. Mnoda tikung hiya ma qduriq betaq Seirah. 27Dehuk Seirah dgiyaq Eprayim ka heya de miyuk urung. Kiya de smnegul heya hmeruc peeyah dgiyaq ka seediq Israel. Meniq berah dmudul dheya ka heya. 28Rmengo dheya ka Ehud: “Smdaling snegul kenan! Ado Utux Tmninun we, wada na sbege baga namu ka Moab pais namu.” Kiya de smnegul heya hmeruc ka dheya. Ngalun daha ka ntrilan yayung Yarden, kiya ka sipo Moab. Ini daha pdai ani ima. 29Ciida, ye bale 1 mang seediq Moab wada daha phqilun. Dheya we mbeyax bale heyi daha, kiya we uka ani 1 ka wada qduriq. 30Ali ciida, wada ini baka baga Israel ka Moab. Kiya de betaq 80 knkawas mmsbleyaq ka dxeral nii.
Samgar
31Bobo Ehud, niqan ka Samgar laqi Anat. Heya we dmoi qreti beebu dapa pnhuqil 6'00 heyi seediq Peliset. Heya we dnoi baga Israel uri.
Currently Selected:
Dmpsgao 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
