Dmpsgao 2
2
Meniq Bokim ka Snkgulan Utux Tmninun
1Pneeyah Gilgal mosa Bokim ka snkgulan Utux Tmninun ma rmengo: “Dmnudul ku yamu pneeyah Micrayim, meyah namu dxeral sntangan mu pusu rudan namu. Rmnengo ku: ‘Uxe ku ba maalix sndhegan mu yamu. 2Yamu we iya bale ppsdehu dseediq hini. Asi namu ka sgliqun ka spuhan daha.’ Kiya we ini namu qbahang kari mu. Ma namu so kiya noda ho? 3Kiya de mprengo ku: ‘Uxe ku mpliwaq dheya peeyah berah namu. Maha ma pako toma hwiras namu ka dheya. Duutux daha we maha mptlenga namu ka kiya.’” 4Rmengo so nii kana seediq Israel ka snkgulan Utux Tmninun ciida de, lmingis kana ka seediq. 5Kiya de Bokim kesun daha tmngayan ka dxeral hiya. Kiya de smapuh Utux Tmninun hiya ka dheya.
Mhuqil ka Yehosua
6Smkagul pposa dseediq Israel ka Yehosua de wada mosa mangal dxeral txtaxa daha ka dheya. 7Muudus ka Yehosua ciida ma bobo wada mhuqil ka heya de, ddrudan ida gaga muudus ciida ka mnkela kana noda Utux Tmninun quri seediq Israel we, gaga nak qmeepah Utux Tmninun ka seediq Israel. 8Mhuqil ka Yehosua laqi Nun tnqliyan Utux Tmninun we 1'10 knkawas na. 9Seediq Israel we saan daha smeku dxeral na nanak, kiya ka Timnat Xeres gaga dgiyaq Eprayim meniq tgdaya dgiyaq Gaas. 10Kana dseediq ciida we wada mquri pusu rdrudan daha kana. Kiya de meyah ka seediq mknexal uxe mnkela Utux Tmninun ma, ini daha klai ka noda Utux Tmninun quri Israel uri.
Malix Utux Tmninun ka Israel
11Mosa thmuku Baal ini mpndungus Utux Tmninun ka noda daha ka seediq Israel. 12Malix Utux Tmninun, Utux Baro daha dmnudul dheya mnlatac peeyah Micrayim. Mosa smnegul duutux icil, kiya ka duutux qlhangan ssiyo daha. Thmuku dheya ma pkseang Utux Tmninun. 13Qmada Utux Tmninun thmuku Baal ma Astoret ka dheya. 14Utux Tmninun we mseang quri Israel. Sbege na baga dseediq meyah gmeeluk dheya ma dpais ssiyo daha. Kiya de betaq ini tduwa mheyu berah pais daha ka dheya. 15Ani mosa ani inu ka dheya we, ida cmebu dheya ka baga Utux Tmninun. Mntena so rnengo Utux Tmninun ma sndhegan na dheya. Kiya de mqraqil riyung ka dheya.
16Utux Tmninun we ptutuy dmpsgao, kiya de meyah dmoi baga dheya peeyah dseediq gmeeluk ndheya. 17Kiya de, ini qbahang dmpsgao ka dheya, smnegul ma thmuku duutux icil moda mmhemuc msuupu. Ini beyo psridil elu pusu rdrudan daha ma, bnhangan daha kari rnengo Utux Tmninun. Ini daha pyugi. 18Utux Tmninun we ptutuy mpsgao ma mtheyaq mpsgao ka heya. Muudus bobo dxeral ciida ka mpsgao han we, dmoi baga dheya peeyah baga pais ka Utux Tmninun. Gmaalu dheya ka Utux Tmninun, ado peeyah rengac tnraqil pais ka dheya. 19Kiya de, wada mhuqil ka mpsgao de mquri qmeepah naqah dungal. Qnnaqah ma knkere lhebun noda daha we, ini daha plaxi. 20Kiya de mseang quri Israel ka Utux Tmninun, rmengo: “Ado wada tbrinah sndhegan mu rnengo mu pusu rudan daha ma ini qbahang kari mu ka qhlangan nii. 21Bobo mhuqil ka Yehosua, uxe mu lwaqun ani 1 peeyah berah daha ka dqlhangan gaga msngari hiya. 22Kiya de ppseung mu Israel, yaa bale ba mpsruwa tleus muyu elu Utux Tmninun, mntena so pusu rudan daha tleus muyu.” 23Kiya de Utux Tmninun we pniqun na hiya ka dqlhangan kiya ma, ini na asi lwaqi. Ini na bqani baga Yehosua ka dheya uri.
Currently Selected:
Dmpsgao 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
