Dmpsgao 20
20
Psramal Mccebu ka Seediq Israel
1Kiya de mntena ba so 1 seediq ba msseli Micpah Utux Tmninun hiya ka peeyah Dan betaq Beerseba ma dxeral Gilad ka dseediq Israel. 2Mheyu rahul hiya ka dseediq pnswayan rudan Israel ma kana seediq Utux Baro. Dsupi gaga mangal hlmadac we 40 mang heyi daha. 3Mnbahang seediq Israel wada tgbaro Micpah ka seediq Binyamin. Rmengo ka seediq Israel: “Rngagi miyan, maanu pusu na ka naqah noda so nii?” 4Seediq Lewiy, kiya ka rseno mqedil wada phqilun we, rmengo: “Yaku ma mqedil mu biciq mneyah miyan mkrabi Gibeah Binyamin. 5Mtutuy keeman ka seediq Gibeah meyah kmremux kenan. Tmlibu sapah tnqiyan miyan ma, satang mphuqil kenan. Mqedil mu biciq ka wada daha tsyaxun phuqil. 6Kiya de wada mu tteun pnpiya ka heyi mqedil biciq mu ma, wada mu spaadis kana dxeral Israel. Ado wada mooda noda paru qnnaqah ma smsiqa ckceka Israel ka seediq Gibeah. 7Qtai! Kana namu, seediq Israel! Peeyah ka kari ma knddaun namu!” 8Mskingal ba seediq ka kana seediq ma rmengo: “Uxe miyan mpbrinah kobu nami, ani ima uxe miyan mpbrinah sapah nami! 9Saya, mpuyu so pnoda miyan blebil qreti mosa mccebu dheya. So nii ka ooda miyan Gibeah. 10Mpgao miyan 10 heyi peeyah 1'00 heyi, 1'00 heyi peeyah 10'00 heyi ma, 10'00 heyi peeyah 1 mang heyi peeyah txtaxa pnswayan rudan Israel. Dheya ka maha hmaqul uqun dsupi mmaha Geba dxeral Binyamin. Ado mnoda oda pqsiqa Israel ka Gibeah.” 11Kiya de psseli mntena so 1 ba seediq ka kana seediq Israel. Dheya we msseli mccebu alang kiya.
12Knkingal pnswayan rudan Israel we, smkagul seediq mosa rmengo kana tnsapah pnswayan rudan Binyamin: “Ma namu qmneepah qnnaqah noda so nii ckceka namu! 13Saya, asi namu ka sbege ka dnaqah seediq Gibeah nii. Phqilo miyan ma pkaangal qnnaqah nii peeyah ckceka Israel.” Kiya we ini qbahang kari seediq Israel mtswai daha ka seediq Binyamin. 14Kiya de msseli Gibeah peeyah lualang daha ka seediq Binyamin ma, kmccebu seediq Israel ka dheya. 15Ali ciida, mlawa psseli supi gaga dmoi hlmadac peeyah lualang daha ka seediq Binyamin. Kana ba we 2 mang 60'00 heyi ma, 7'00 heyi we pneeyah dseediq Gibeah. 167'00 supi nii we gneegan daha piiril kana ma, mkela ba dmoi pstalang cmebu btunux ma ini kumax. 17Seediq Israel we, ini spegi ka seediq Binyamin we, 40 mang ka supi pnsseli daha gisu dmoi hlmadac. Txtaxa daha we mkkela mccebu kana.
Ini Baka Seediq Israel ka Seediq Binyamin
18Mtutuy mosa mgkala Beytel smiling Utux Baro ka seediq Israel: “Ima miyan ka mplaale mosa mccebu seediq Binyamin ho?” Rmengo ka Utux Tmninun: “Yehudah ka mplaale na mosa.”
19Mtutuy mgrebu ka seediq Israel ma, pkobu sipo Gibeah. 20Mosa mccebu seediq Binyamin ka seediq Israel. Kiya de psramal mheyu sipo Gibeah ka seediq Israel. 21Peeyah Gibeah ka dseediq Binyamin, ali ciida we 2 mang 20'00 heyi ka seediq Israel wada daha phqilun. 22Kiya de gmbrinah mtutuy dungal ka dseediq Israel ma, mosa psramal mheyu qmburang psramal mccebu hiya dungal. 23Mnkala mosa berah Utux Tmninun lmingis betaq gbiyan ka seediq Israel. Smiling Utux Tmninun ka dheya: “Ye malu mosa miyan mccebu mtswai miyan Binyamin dungal ho?” Rmengo ka Utux Tmninun: “Ani namu nak mosa mccebu dheya.”
24So kusun de, mosa mccebu seediq Binyamin ka seediq Israel. 25Kiya de seediq Binyamin we, peeyah Gibeah meyah mccebu seediq Israel ka dheya so kusun duri. Kiya we 1 mang 80'00 heyi ka seediq Israel wada daha phqilun. 26Kiya de kana seediq Israel ma kana supi we mosa mnkala Beytel. Lmingis tleung berah Utux Tmninun. Ali ciida, ptgaya ini ekan betaq keeman ma, mege snapuh psqama ma snapuh ptbale dungal. 27Smiling Utux Tmninun ka dseediq Israel. Ciida, gaga meeniq hiya ka kulu pnsdhegan Utux Tmninun. 28Ciida, mheyu berah kulu pnsdhegan ka Pinexas laqi Elajar, lqlaqi laqi Aharon. Rmengo ka dseediq Israel: “Ye malu mosa miyan mccebu mtswai miyan Binyamin dungal ho? Ye miyan mpsange?” Rmengo ka Utux Tmninun: “Ani namu nak mosa. Ado kusun de, bege mu baga namu ka dheya.”
29Kiya de qmburang ssiyo Gibeah ka Israel. 30So mkaxa de, mosa mccebu seediq Binyamin dungal ka seediq Israel. Psramal mosa berah Gibeah, mntena nak so mndaha ccebu daha tgberah. 31Meyah smterung mccebu ka seediq Binyamin uri. Kiya we psthyaqun tmraki platac peeyah alang daha nganguc ka dheya. Meeniq 2 elu, 1 we mquri elu Beytel, 1 we mquri elu Gibeah ka dheya. Mntena so tgberah 30 heyi wada daha phqilun ka seediq Israel. 32Rmengo ka seediq Binyamin: “Mntena so hndure ini ta baka berah ta ka dheya.” Kiya de rmengo ka dseediq Israel: “Qduriq ta ma trkiyo ta platac peeyah alang betaq elu paru ka dheya.” 33Kiya de mtutuy kana ka seediq Israel, psramal mheyu Baal Tamar hiya. Mtutuy mosa tgberah ka supi peeyah Mari Geba qnburang hiya. 341 mang ka supi mkrkere kana seediq Israel we, meyah mccebu Gibeah. Ani knkana ka pncbuwan daha. Dseediq Binyamin we, ini daha klai mesa gisu msdaling ka mpqraqil daha. 35Utux Tmninun we, mccebu Binyamin berah Israel. Ali ciida, wada phqilun seediq Israel ka seediq Binyamin we 2 mang 51'00 heyi supi dmnoi hlmadac kana.
Mbeyax ka Seediq Israel
36Qmita gisu ini baka ka seediq Binyamin. Ado snhii dsupi gaga qmburang Gibeah hiya ka seediq Israel, kiya ka thkeso qduriq ka dheya.
37Asi kmremux nhari Gibeah ka supi qnburang. Ini sange mquri berah cmebu ma, dmoi hlmadac baga daha phuqil kana seediq alang hiya. 38Niqan nanak pnrngagan daha ka dseediq Israel ma supi qmburang. Mnkala peeyah alang ka qrengul pnsqama daha pneeyah alang toma. 39Qduriq peeyah pncbuwan hiya ka seediq Israel. Kiya de seediq Binyamin we ya ba 30 heyi ka seediq Israel wada daha phqilun. Kiya de rmengo: “Mntena so tgberah ini baka berah ta ka dheya.” 40Gisu mntena mquri karac baro mnkala peeyah ckceka alang ka qrengul ciida, psbrinah qmita ka dseediq Binyamin, qtai! Wada tlbuwan puniq sqama kana ka alang daha. 41Kiya de, mpbrinah mqquri dheya ka dseediq Israel. Kiya de miicu ka seediq Binyamin. Ado gisu daha klaun meyah dheya ka mqraqil da. 42Kiya de qduriq peeyah berah seediq Israel ma mquri tadus brenux ka dheya. Nii uxe ba baka mccebu ka dheya. Kiya uri we meyah cmebu dheya ma phuqil dheya ka dseediq pneeyah ckceka alang uri. 43Meyah tmlibu cmebu seediq Binyamin ka seediq Israel. Smdurak dheya meniq cnpilan papak daha ma ini daha psngai betaq sipo Gibeah nklaan hido hiya smnipaq dheya. 44Seediq Binyamin we 1 mang 80'00 heyi ka wada mhuqil. Kana daha we mkkere riyung kana. 45Duma msngari na we, qduriq mquri tadus brenux betaq lhengo Rimon. Meniq elu we 50'00 heyi ka seediq Binyamin wada phqilun seediq Israel. Mntena so gisu lmamu drami paye, ini sange smdurak dheya betaq Gidom. Wada daha phqilun dungal ka 20'00 heyi. 46Ali ciida, wada mhuqil ka seediq Binyamin we 2 mang 50'00 heyi. Kana daha nii we mkkere heyi dmnoi hlmadac kana. 476'00 heyi na we qduriq mquri tadus brenux betaq lhengo Rimon. 4 idas ka nniqan daha lhengo Ringmung hiya. 48Kiya ma mpbrinah mosa mccebu seediq Binyamin dungal ka seediq Israel. Kana ndaan daha lualang we, wada daha phqilun kana ka seediq ma tnbugan. Kiya uri we wada daha sqmaun kana ka lualang ndaan daha.
Currently Selected:
Dmpsgao 20: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
