Dmpsgao 19
19
Seediq Lewiy ma Mqedil na Biciq
1Pkelu uka qbsuran paru ciida ka Israel, tnooda meniq ayus dgiyaq Eprayim hiya ka 1 seediq Lewiy. Heya we mnangal 1 mqedil nurun na peeyah Betlexem Yehudah. 2Mseang quri rseno ka heya ma, mlatac rseno na ma mbrinah Betlexem Yehudah sapah tama na. Heya we meniq hiya betaq 4 idas. 3Mtutuy ka rseno na, madis 1 tnqliyan ma 2 dapa roba smnegul heya. Mkdmoi malu kari pbrinah heya. Kiya de mqedil nii we, desun na sapah tama na ka rseno na. Qmita heya ka tama mqedil nii de, mqaras riyung smterung heya. 4Baki na nii we, kiya ka tama mqedil nii ma, mk3 ali hrudan na hiya. Msuupu mekan ma mimah mkrabi hiya ka heya. 5Mgrebu bale tg4 ali, rmengo ama na ka tama mqedil nii: “Puqi han ma kkbeyax heyi su. Kiya de osa da.” 6Kiya de msuupu mekan ma mimah ka 2 heyi. Tama mqedil we rmengo seediq kiya: “Taqi 1 rabi hini dungal ma, tbleyaq msange.” 7Mkmosa ka seediq kiya ma, hmuric ka baki na de, meniq hiya 1 rabi dungal. 8Mgrebu ba so tg5 ali, mkmosa ka heya. Rmengo heya ka tama mqedil: “Eyah hini, pkbeyax tikuh heyi namu. Trai mqquri pryaxan hido ka hido.” Kiya de msuupu mekan dungal ka dheya. 9Seediq kiya, mqedil na biciq ma, tnqliyan na mtutuy mosa ka dheya. Kiya de baki na, kiya ka tama mqedil we, rmengo heya: “Qtai! Gisu priyax ka hido ma uxe beyo smesung da. Krabi hini dungal ka yamu. Qtai! Wada mquri pryaxan hido ka hido, asi eniq hini ma tbleyaq msange hini namu. Mgrebu so kusun de osa ka yamu ma brinah kobu namu.”
10Seediq kiya we ini sruwa mkrabi, kiya de psramal 2 dapa roba ma madis mqedil nurun na mlatac hiya betaq sipo Yebus. Yebus we kiya ka Yerusalem. 11Smdaling Yebus ka dheya ciida, priyax ka hido. Rmengo pusu tnsapah ka tnqliyan: “Nita meniq alang seediq Yebus nii. Krabi ta hini.” 12Rmengo heya ka pusu tnsapah: “Iya ta osa alang uxe seediq Israel. Uxe dxeral Israel ka kiya. Oda ta mrako hini mosa ta Gibeah.” 13Dungal rmengo tnqliyan na: “Nita mkrabi Gibeah uxe uri we Ramah hiya.” 14Kiya de hmrinas hiya mquri berah ka dheya. Uxe beyo dehuk Gibeah dxeral Binyamin de wada priyax ka hido da. 15Mosa mremux Gibeah mpkrabi hiya. Tleung pssliyan alang hiya ka heya. Kiya we uka ka seediq psteme dheya.
16Qtai! Keeman, niqan ka 1 rudan mnosa qmeepah pneeyah qnpahan. Heya we seediq pneeyah dgiyaq Eprayim ka heya ma, tnooda meeniq Gibeah hini. Seediq hiya we dseediq Binyamin. 17Rudan nii we qmita dseediq mnoda gaga pssliyan alang ma smiling dheya: “Pneyah su inu? Maha su inu ho?” 18Rmengo heya ka heya: “Pneyah miyan Betlexem Yehudah, maha miyan ayus ddgiyaq Eprayim. Seediq ku hiya ka yaku. Mnosa ku Betlexem Yehudah, saya de maha su sapah Utux Tmninun da. Kiya ma uka ka seediq meyah smterung yaku mosa sapah na. 19Bale ba we, niqan nanak ka ttabu dapa roba ma pang ma sino uqun miyan ma, tnqliyan mqedil su ma tnqliyan gaga msuupu kenan. Uka ka ini knttuku na.” 20Rmengo ka rudan: “Tai namu so psbleyaq! Dooyun namu we mbege ku sunan kana. Kiya ma iya bale krabi pssliyan alang hini.” 21Kiya de rudan nii we, desun na sapah na ka heya ma, tbugan na ka dapa roba. Mhedu trima papak de, prading mekan ma mimah ka dheya.
Qnnaqah Noda Gibeah
22Tbleyaq mqqaras ka dheya ciida, qtai! Meyah tmlibu ka seediq uka rrihan alang hiya. Tmatuk rhengun, rmengo rudan ma pusu tnsapah nii: “Desi nganguc ka dseediq gaga meyah sapah su. Mpsuupu namu mtaqi dheya.” 23Tnpusu sapah nii we, rmengo dheya: “Mtswai, iya oda qnnaqah ooda nii. Gisu mremux sapah mu ka seediq nii de, iya oda ooda so smsiqa nii ka yamu da. 24Qtai! Niqan ku weewa ini osa rseno na ma, niqan ka mqedil biciq uri. Desun mu nganguc ka dheya ma, seung nanak lnglungan namu pqsiqa dheya. Pdai nanak malu lnglungan namu moda dheya! Kiya de iya ba oda pqsiqa noda seediq nii ka yamu.” 25Kiya we ini qbahang heya ka dheya. Seediq kiya de, qmerac mqedil biciq na ma, tlusun na nganguc mege dheya. Dheya we kmhetun daha msuupu mtaqi ka heya ma, tnsyaxan daha 1 rabi betaq mgrebu. Lmedax ka karac de, hani daha plaxun. 26Betaq mgrebu, meyah ka mqedil. Asi pksaro mtakur rhengun sapah pnkrabi pusu tnsapah na ka heya, betaq lmedax ka karac.
27Mgrebu, mtutuy ka pusu tnsapah na ma rmaguh rhengun. Mmaha nganguc ma kmlatac. Qtai! Mqedil biciq na, kiya ka mqedil kiya, gisu mksaro mtakur berah rhengun sapah. Daha baga na we, gisu dmoi eruc rhengun. 28Rmengo mqedil kiya ka heya: “Tutuy ma nita da!” Kiya we ini ciyuk ka mqedil kiya. Seediq kiya de, ppaun na bobo dapa roba ka heya, mtutuy mquri dxeral daha nanak ka dheya. 29Dehuk sapah ka heya de, mangal hlmadac ma qmerac mqedil biciq na. Steetu na 12 heyi ka bqerus na ma, saasu na paadis 12 pnswayan rudan Israel. 30Kana seediq qmnita we rmengo kana: “Peeyah mnlatac Micrayim ka seediq Israel betaq saya we, ini bale ooda so mntena nii ma uxe bale qntaan ka so nii. Asi ta ka lnglungun ma mpprengo ka so nii.”
Currently Selected:
Dmpsgao 19: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
