Dmpsgao 18
18
Thedil ka Pnswayan Rudan Dan
1Ciida, uka qbsuran paru ka Israel. Dseediq pnswayan rudan Dan we, gisu migin dxeral nniqun daha na. Ado betaq ali ciida, ini oda blebil qreti mangal dxeral peeyah pnswayan rudan Israel niya na ka dheya. 2Smkagul 5 mbbeyax peeyah Carah ma Estaol mosa kmuuruy qmita dxeral kiya ka dseediq Dan. Rmengo dheya: “Osa kmuuruy qmita dxeral kiya.” Meyah betaq sapah Mikah dgiyaq kesun daha ma mosa mkrabi sapah Mikah dgiyaq Eprayim ma meniq hiya ka dheya. 3Smdaling sapah Mikah ka dheya ma, mbahang kari riso seediq Lewiy ma smiling heya: “Ima ka mnadis sunan hini? Gaga su hmuwa hini? Maanu ka qpahun su hini?” 4Rmengo dheya ka riso nii: “Mikah ka bneku ddaun mu hini. Heya ka pqeepah kenan ma, ngalan ku na msapuh na.” 5Rmengo heya ka dheya: “Braho su druni ka Utux Tmninun. So maha miyan klaun ya malu ka elu noda miyan.” 6Cmiyuk dheya ka msapuh: “Msbleyaq mosa ka dyamu. Gaga meniq berah Utux Tmninun ka elu ddaun namu.”
7Kiya de mlatac ka 5 heyi dehuk Layis. Qtaan daha ka seediq hiya we, mntena seediq Cidon tbleyaq ma, uka seediq ka tmraqil dheya. Uka ka seediq meyah gmeeluk ma mccebu dheya uri. Theya riyung dseediq Cidon ka dheya ma, ini pggaluk ani inu ka dheya. 8Mbrinah meyah Carah ma Estaol mtswai daha hiya ka dheya. Smiling dheya ka mtswai daha: “Ga namu hmuwa da?” 9Rmengo ka dheya: “Tutui, mosa ta kmremux dheya! Mnhedu ta kmuuruy dxeral kiya di. Qtai! Malu riyung ka dxeral kiya. Ma namu gisu meniq hini na? Iya sgcuqi, asi ta osa mangal dxeral kiya! 10Osa ka yamu, maha namu betaq dseediq tbleyaq meniq ma dxeral knuglahang. Utux Baro we wada na sbege baga namu ka dxeral kiya di. Kana qyqeya dxeral we ida niqan ka hiya.”
11Kiya de dmoi qyqeya mccebu ka 6'00 heyi seediq pnswayan rudan Dan ma, kndalax Carah ma Estaol. 12Steetu betaq Qiryat Yearim Yehudah ma pkobu hiya. Kiya de Mahani Dan kesun daha tmngayan betaq saya ka dxeral kiya. Qtai! Gisu meniq pryaxan hido Qiryat Yearim ka heya. 13Peeyah hiya mquri dgiyaq Eprayim ka dheya ma dehuk sapah Mikah.
14Rmengo mtswai daha ka 5 heyi seediq mnosa kmuuruy qmita Layis: “Klaun namu peni? Sapah nii we, niqan ipudi ma tikung, 1 ka tikung gnequr ma 1 ka tikung xiluy pnsqmaan. Saya, huwa ta kesun we klai ka yamu.” 15Mqquri hiya mosa ka 5 heyi ma mremux sapah Mikah. Meyah gaga niqan riso seediq Lewiy smbleyaq rmengo heya. 16Mheyu rhengun na ka 6'00 heyi seediq Dan gaga madis qyqeya mccebu. 17Mremux sapah toma ka 5 heyi mnosa kmuuruy ma, mangal tikung gnequr, ipudi, tikung utux ma tikung xiluy pnsqama. Msuupu mheyu rhengun ka msapuh ma 6'00 heyi gaga dmoi qyqeya mccebu. 18Mremux sapah Mikah ma maangal tikung gnequr, ipudi, tikung utux ma tikung xiluy pnsqama ka 5 heyi ciida, rmengo dheya ka msapuh: “Gaga namu hmuwa?” 19Rmengo heya ka dheya: “Iya squwaq, spui baga su ka quwaq ma snegul yami! Isu ka ngalun miyan tama ma msapuh. Kenu ka malu na msapuh su 1 sapah ma, msapuh su 1 pnswayan rudan Israel peni?” 20Mqaras lhebun na ka msapuh de mangal ipudi, tikung sapah hiya ma, tikung gnequr mosa tuumal dheya.
21Mlatac peeyah hiya ka dheya ma, psaun daha berah ka lqlaqi, tnbugan ma, qyqeya. 22Theya kndlexan daha peeyah sapah Mikah ka dheya de, psseli dseediq ssiyo na ka Mikah ma meyah smdurak smmkela seediq Dan. 23Mlawa seediq Dan ka dheya, mspgeriq tunux daha rmengo Mikah ka seediq Dan: “Hmuwa su so nii psseli hbaro ba seediq ho?” 24Rmengo ka Mikah: “Wada namu desun ka tktikung snmalu mu ma msapuh mu. Desun namu kana de, maanu ka nnaku di peni? Ma su lux rmengo ‘Ga su hmuwa’ di?” 25Rmengo Mikah ka seediq Dan: “Iya miyan pqbhangi dungal ka hrenang su. Nhuwa mseang ka seediq de, maha cmebu sunan. Kiya de mphuqil kana ka isu ma tnsapah su.” 26Ida gisu mkkesa elu daha niya na ka seediq Dan. Mikah we qmita mgkala heya ka beyax daha de, mpbrinah mosa sapah da.
27Seediq Dan we, wada daha desun ka tikung snmalu Mikah ma msapuh. Betaq Layis dseediq tbleyaq hiya. Dmoi hlmadac phuqil dheya ma, dmoi puniq psqama alang kiya. 28Uka seediq meyah dmoi baga dheya. Ado smtheya riyung peeyah Cidon ka alang nii. Dheya uri we uka pggaluk daha ani inu ka dheya. Smdaling brenux Bet Rexob ka alang nii. Smalu alang nii ka seediq Dan ma, meniq hiya ka dheya. 29Kiya ma spuyu daha ngayan Dan laqi pusu rudan Israel, Dan kesun daha tmngayan ka alang nii. Layis ngayan na plaale ka alang nii. 30Seediq Dan we, pheyu tikung nii ka dheya. Lqlaqi laqi Yehonatan, laqi Gersom ma, lqlaqi laqi Moseh ka msapuh pnswayan rudan Dan betaq ali wada sgliqan ciida. 31Bsiyaq ali nniqan na Siylo hiya ka sapah Utux Baro we, maha so kiya knbsiyaq nniqan na pnswayan rudan Dan hiya ka tikung Mikah pnheyu seediq Dan uri.
Currently Selected:
Dmpsgao 18: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
