Dmpsgao 14
14
Mangal Mqedil ka Simson
1Mosa hmeruc Timnah ka Simson, qmita 1 mqedil, weewa seediq Peliset ka heya. 2Mosa tgdaya rmengo tama ma bubu na: “Qmnita ku 1 mqedil meeniq Timnah hiya. Kiya ka weewa seediq Peliset. Braho su bqani ku hiya ngalun mu mqedil.” 3Rmengo heya ka tama ma bubu na: “Ckceka dwewa dlutuc su, uxe uri we kana dseediq pnswayan rudan su we, uka bale mqedil da peni? Hmuwa su lux mosa mangal mqedil seediq Peliset uxe mnoda ptgaya psalak peni?” Rmengo tama na ka Simson: “Braho su bqani ku heya ngalun mu mqedil ka weewa kiya. Ado kuxul mu ka heya.”
4Tama ma bubu na we, ini daha klai noda nii we pneeyah Utux Tmninun kiya. Ado gisu migin ccebu na seediq Peliset ka heya. Ciida, gisu qmlahang seediq Israel ka seediq Peliset.
5Msuupu tama ma bubu na hmeruc mosa Timnah ka Simson. Dehuk qnpahan lipas Timnah hiya ka dheya. Qtai! Gisu lmeun quri heya ka 1 mkkere ba wawa rkelic rudu. 6Psteme riyung Simson ka Bgihur Utux Tmninun. Ani kesun ini doi ani maanu we, wada na sgliqun rkelic rudu. Mntena so smgaliq wawa miric. 7Hmeruc mosa mpprengo mqedil kiya ka Simson. Qtaan na ma kuxul na ka heya. 8Wada so piya ali, mpbrinah meyah sterung mqedil kiya ka heya ma, mqquri elu ddaun na qmita ka heyi rkelic rudu kiya. Qtai! Gaga meniq ckceka heyi rkelic rudu nii ka walu ma beyuq walu we gaga toma hiya uri. 9Kiya de, mangal walu nii ka heya ma, psaun na qapal baga na, mkkesa mekan ka heya. Betaq tama ma bubu na hiya de, sbege na dheya ka walu ma, mekan ka dheya uri. Kiya de, ini na rngagi pneeyah ckceka heyi rkelic rudu nii ka walu nii.
10Hmeruc meyah mqedil nii ka tama na. Pgrahul qdiyal pnstreengan hiya ka Simson. Ado so nii ka gaya daha mbbeyax ciida. 11Qmita Simson ka dheya de, mlawa 30 heyi theyaq heya. 12Rmengo dheya ka Simson: “Mpribaq ku rmengo yamu. Nasi namu klaun rmengo ka elu kari na berah mk7 ali pgrahul pnstrengan nii de, mbege ku 30 lukus toma smnalu malu ware nuqah ma 30 lukus ppryuxun. 13Kiya de, nasi namu ini ciyuk kenan de, asi namu ka mege 30 lukus toma smnalu malu ware nuqah ma, 30 lukus ppryuxun.” Rmengo heya ka dheya: “Pqbhangi miyan hiya ka rribaq su kari.” 14Rmengo dheya ka Simson:
“Pneeyah meekan ka uqun.
Pneeyah mbbeyax ka mssibus.”
Ani betaq mk3 ali, ini daha klai ka kari rnibaq nii.
15Tg7 ali de, rmengo mqedil Simson ka dheya: “Sai mberiq ka rseno su ma tgsai miyan ka kari rnibaq nii. Nasi uxe so kiya de sqmaun miyan isu ma tnsapah su. Mlawa su menan we, gisu su mkmaangal kana dnoi nami ho?” 16Tllingis meniq berah rseno na ka mqedil Simson: “Tmraqil su kenan ka isu. Ini su gaalu kenan. Sbege su kari rnibaq ka dseediq miyan we, ini su rngagi kenan ka elu kari nii.” Rmengo heya ka Simson: “Qtai! Ani tama ma bubu mu we, ini mu tsai. Huwa mu kesun rmengo ka isu di peni?” 17Cenga mk7 ali qrasan mekan, ida tllingis truuriq smiling rseno na ka heya. Tg7 ali de, ado truuriq smiling ka mqedil na de, rngagan na heya ka elu kari nii. Kiya de srengo na dseediq na ka elu kari nii. 18Berah mpgeqi ka hido tg7 ali we, meyah rmengo Simson ka seediq alang hiya:
“Maanu ka mgkala knsibus beyuq walu?
Maanu ka mgkala knparu beyax rkelic rudu?”
Rmengo dheya ka Simson:
“Nasi namu ini tabul giyas dapa mu dxeral ka yamu we,
kani namu klai ka kari rnibaq mu.”
19Ciida, psteme riyung Simson ka Bgihur Utux Tmninun. Kiya de hmeruc mosa Asqelon ma phuqil 30 heyi ka Simson. Gmeeluk lukus pnlukus daha ma, sbege na seediq mnkela elu kari nii. Paru seang na ma mosa tgbaro sapah tama na da. 20Kiya de Simson we, sbege na 1 dadal na mntheyaq psterung ka mqedil nii.
Currently Selected:
Dmpsgao 14: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
