Dmpsgao 13
13
Simson
1Dungal we ini mndungus Utux Tmninun ka noda na dseediq Israel. Kiya de Utux Tmninun we, sbege na 40 knkawas seediq Peliset ka dheya.
Mtuting ka Simson
2Ciida, niqan ka seediq Carah pnswayan rudan Dan, ngayan na we Manoax. Mqedil na we kdngean ma uka laqi na. 3Snkgulan Utux Tmninun we, mtqita mqedil kiya ma rmengo heya: “Qtai! Kdngean ma uka laqi su ka isu. Saya, mptlaqi su 1 laqi ka isu. 4Qlahang bale. Ani sino ini kbeyax ma sino mbeyax we iya bale imah. Kana niqan rutiq ka uqun we iya bale uqi. 5Qtai, maha su mchedil, mptnlaqi su 1 laqi. Iya tapi ka snuunux na, ado maha ma seediq Najir Utux Baro pneeyah mntuting bubu na ka laqi nii. Heya we maha mprading dmoi baga Israel mplatac baga seediq Peliset.” 6Meyah rmengo rseno na ka mqedil kiya: “Niqan 1 seediq Utux Baro kenan hini. Hnyegan na we mntena ba hnyegan snkgulan Utux Baro so kcungun riyung. Ini mu slingi pneeyah inu ma, ini na rngagi yaku ka ngayan na uri. 7Rmengo kenan ka heya: ‘Qtai! Mpchedil su ma mptnlaqi su 1 laqi rseno. Saya, sino ma sino mbeyax we iya bale mahi. Kana niqan rutiq uqun we iya bale uqi. Ado maha ma seediq Najir Utux Baro pneeyah mntuting bubu na betaq mhuqil ka laqi nii.’”
8Kiya de dmurun Utux Tmninun ka Manoax: “Bukung mu! Ani su ba rabang, skguli yami hini texal dungal ka seediq Utux Baro kiya. Tgsai miyan huwa nami mesa mooda ka laqi mptuting nii.” 9Mbahang kari Manoax ka Utux Baro. Tleung qnpahan ciida ka mqedil kiya we, mosa hiya ka snkgulan Utux Baro. Kiya de rseno na we ini theyaq Manoax. 10Mtgaaguh tmalang mosa tmgesa rseno na ka mqedil. Rmengo: “Qtai! Mneyah mtqita snii ka seediq kiya de gaga meyah dungal.” 11Mtutuy mosa smnegul mqedil na ka Manoax ma mosa seediq hiya rmengo: “Isu ka rmnengo mqedil nii ho?” Cmiyuk ka seediq kiya de “Yaku!” 12Smiling ka Manoax: “Saya, tai so mpbale ba ka kari su! Hmuwa kesun tmgesa ka laqi nii ho? Maanu ka daun na?” 13Rmengo Manoax ka snkgulan Utux Tmninun: “Kana rnengo mu ooda mqedil nii we, asi ka muyu moda ka heya. 14Iya ekan pnugheyi qhuni lipas. Iya bale imah sino ma sino mbeyax. Kana uqun niqan rutiq we, iya bale uqi. Kana pndakar mu nii we, asi ka muyu moda ka heya.”
15Rmengo snkgulan Utux Tmninun ka Manoax: “Braho misu, tduwa miyan hmuric sunan ho? Tai so tduwa miyan psramal wawa miric sunan.” 16Rmengo Manoax ka snkgulan Utux Tmninun: “Ani su hmuruc kenan we uxe ku meekan ka uqun su. Nasi su psramal spuhan psqmaun we, asi su ka sbege Utux Tmninun.” Ado Manuwa we ini na klai heya we snkgulan Utux Tmninun ka heya. 17Rmengo snkgulan Utux Tmninun ka Manoax: “Ima ka ngayan su? Klaun miyan psparu sunan bobo wada bale ba moda ka kari su ciida.” 18Rmengo heya ka snkgulan Utux Tmninun: “Ma su smiling ngayan mu? Ngayan mu we so sklwiun bale kiya.” 19Kiya de mangal 1 wawa miric ma snapuh pnhgalang ka Manoax ma, sbege na Utux Tmninun meniq bobo btunux. Noda na so sklwiun we, gaga mita ka Manoax ma mqedil na. 20Mnkala peeyah spuhan mqquri baro ka rana puniq, snkgulan Utux Tmninun we mgkala peeyah ckceka rana puniq mquri baro ka heya uri. Qmnita so nii ka Manoax ma mqedil na de, asi tgtemaq dxeral dqeras daha.
21Ini pqita quri Manuwa ma mqedil na dungal ka snkgulan Utux Tmninun. Ciida, Manoax we hani mkela bale ba snkgulan Utux Tmninun ka heya. 22Rmengo mqedil na ka Manoax: “Mphuqil ta ka ita da. Ado wada ta qmita Utux Baro da.” 23Rmengo heya ka mqedil na: “Nasi qmphuqil ita ka Utux Tmninun de, uxe na ngalun peeyah baga ta ka snpuhan pnsqama ma snapuh pnhgalang ma, uxe mprengo kana ooda nii. Saya we, uxe tana pqbhangun kari nii uri.” 24Bobo na de, tnlaqi rseno ka mqedil nii. Simson kesun daha tmngayan. Mdakil kmparu ka laqi nii ma, smbleyaq heya ka Utux Tmninun. 25Meeniq Mahani Dan cenga Carah ma Estaol hiya, prading psteme Simson ka Bgihur Utux Tmninun.
Currently Selected:
Dmpsgao 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
