Dmpsgao 12
12
Mccebu ka Yiptax dhaka Seediq Eprayim
1Gisu plaanun ka seediq Eprayim ma, mtaril yayung meyah Capon. Rmengo Yiptax ka dheya: “Mosa su mccebu seediq Amon we, ma su ini plawa yami ssuupu mosa sunan ho? Asi miyan ka sdoi puniq psqama ka isu ma sapah su.” 2Rmengo dheya ka Yiptax: “Mgseme miyan mccebu seediq Amon ka yaku ma dseediq mu. Mnlawa ku yamu ma, ini namu eyah dmayo menan platac baga daha. 3Ini namu eyah dmayo menan mesa ku lmngelung de, mbeyax miyan mosa mccebu seediq Amon. Kiya de Utux Tmninun we sbege na baga mu ka dheya. Ma namu meyah yaku hini saya meeyah namu mccebu kenan ho?” 4Kiya de psseli kana seediq Gilad ka Yiptax ma kmccebu seediq Eprayim. Phuqil seediq Eprayim ka seediq Gilad, ado rmnengo ka dheya: “Seediq qnduriq pneeyah Eprayim meeniq ckceka Eprayim ma Menaseh ka yamu.” 5Qmlahang ntrilan yayung Yarden ka seediq Gilad ma, ini daha srwai pooda ka seediq Eprayim. Nasi rmengo ka seediq Eprayim qnduriq: “Pntrili ku.” Kiya de mpsiling heya ka seediq Gilad: “Seediq Eprayim su ka isu ho?” Nasi rmengo: “Uxe”. 6Mprengo heya ka seediq Eprayim: “Skari Sbulic.” Ado ini kela rmengo nii ka dheya ma maha pshengak “Siburic” ka heya. So kiya de qrapun daha ka heya ma, phqilun daha ntrilan yayung Yarden ka heya. Ciida 4 mang 20'00 heyi wada phqilun ka seediq Eprayim.
76 Knkawas ngalan mpsgao Israel ka Yiptax. Mhuqil ka Yiptax seediq Gilad de skuun daha alang Gilad.
Ibcan, Eylon, Abdon
8Bobo Yiptax, meyah mpsgao Israel ka Ibcan seediq Betlexem. 930 heyi ka laqi na rseno. Wada na pstrengun ka 30 heyi ka laqi na mqedil. Saangal na 30 mqedil peeyah nganguc ka kana laqi na uri. 7 knkawas ngalan psgao Israel ka heya. 10Mhuqil ka Ibcan ma skuun daha Betlexem.
11Bobo Ibcan, meyah psgao Israel ka Eylon seediq Jebulun. Mk10 knkawas Jebulon psgao Israel. 12Mhuqil ka Eylon seediq Jebulon ma skuun daha Ayalon dxeral Jebulun.
13Bobo Eylon, meyah mpsgao Israel ka Abdon laqi Hilel seediq Piraton. 1440 heyi ka laqi na rseno ma 30 heyi ka lqlaqi laqi na. Paapa 70 dapa roba ka dheya. 8 knkawas ngalan mpsgao Israel ka Abdon. 15Mhuqil ka Abdon laqi Hilel seediq Piraton ma, skuun daha dxeral Eprayim dgiyaq seediq Amaleq.
Currently Selected:
Dmpsgao 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
