Dmpsgao 11
11
Mtuting ka Yiptax
1Yiptax seediq Gilad we supi mnpahung ba. Laqi mqedil kbrexun ka heya. Tmlaqi Yiptax ka Gilad. 2Mntuting duma laqi ka dmqedil Gilad uri. Mdakil ka laqi mqedil na de, lwaqun na nganguc ka Yiptax. Rngagan na: “Uxe su mplutuc mangal pusu dnoi sapah tama mu ka isu. Ado laqi su pneeyah icil mqedil ka isu.” 3Kiya de qduriq peeyah mtswai na hiya ka Yiptax ma mosa meniq Tuobo. Meyah msseli hiya ma mtheyaq heya ka seediq mbserux uka stmaan.
4Ini qbsiyaq, meyah cmebu Israel ka seediq Amon. 5Meyah cmebu Israel ciida ka seediq Amon we, meyah bberih migin Yiptax ga meniq Tuobo hiya ka drudan Gilad. 6Rmengo Yiptax ka dheya: “Eyah mqbsuran mdudul menan ka isu. Tai so maha ta mccebu seediq Amon.” 7Cmiyuk ddrudan Gilad ka Yiptax: “Uxe namu qmnriqu kenan ma, lmniwaq namu kenan peeyah sapah tama mu peni? Saya, gisu namu smterung mqraqil de, meyah namu hini da ho?” 8Rmengo Yiptax ka drudan Gilad: “Meyah miyan isu hini saya we, so su maha mtheyaq menan mosa mccebu seediq Amon ma, mpqbsuran su kana seediq Gilad ka isu.” 9Rmengo ddrudan Gilad ka Yiptax: “Nasi namu smbrinah kenan theyaq yamu mosa mccebu seediq Amon ma, Utux Tmninun we, sbege na kenan ka dheya de, mpqbsuran ku namu ka yaku da ho?” 10Cmiyuk Yiptax ka drudan Gilad: “Mpgkela ckceka ta ka Utux Tmninun. Mpuyu miyan kari su moda ka yami.” 11Kiya de mtheyaq ddrudan Gilad mosa ka Yiptax. Kana seediq we phyegun daha qbsuran ma qbsuran mdudul ka Yiptax. Yiptax we srengo na berah Utux Tmninun ka kana noda meniq Micpah hiya.
12Smkagul snkgulan mosa qbsuran paru seediq Amon hiya ka Yiptax. Rmengo: “Maanu ba pnugluban mu sunan, betaq su so nii meyah kmremux dxeral miyan ho?” 13Rmengo snkgulan Yiptax ka qbsuran paru seediq Amon: “Ado Israel we peeyah Micrayim meyah ciida, wada mangal dxeral miyan peeyah yayung Arnon betaq yayung Yaboq ma Yarden. Saya, asi su ka ptbale pbrinah mege dungal ka ddxeral nii.” 14Dungal we smkagul snkgulan mosa qbsuran paru seediq Amon hiya ka Yiptax. 15Rmengo heya: “Rmnengo ka Yiptax, ini angal dxeral Moab ma Amon ka Israel. 16Kndalax peeyah Micrayim ka Israel we moda tadus brenux betaq rcilung Mtanah ma mosa Qades. 17Ciida, snkagul snkgulan mosa qbsuran paru Edom hiya ka Israel. Rmengo: ‘Braho su pooda miyan pklihu dxeral su.’ Kiya we ini sruwa ka qbsuran paru Edom. Mntena dungal, smkagul snkgulan mosa qbsuran paru Moab uri ka Israel, ini sruwa ka heya uri. Kiya de meeniq Qades hiya ka Israel. 18Dungal we mnoda tadus brenux ka dheya ma, mtqiri rmaro dxeral Edom ma Moab betaq nklaan hido dxeral Moab ma, pkobu ssiyo yayung Arnon. Ini bale remux dxeral Moab, ado ayus Moab ka yayung Arnon. 19Smnkagul snkgulan mosa qbsuran paru Amori hiya ka Israel. Kiya ka Sixon qbsuran paru Xesbon hiya. Rmnengo heya ka Israel: ‘Braho su pooda miyan thrinas dxeral su. Mmaha miyan dxeral nami nanak.’ 20Ini snhii Israel ka Sixon ma, ini pooda dxeral na. Psseli dseediq na ma, pkobu Yahcah hiya ka dheya ma, mccebu quri Israel. 21Utux Tmninun, Utux Baro nuIsrael we, sbege na baga Israel ka Sixon ma kana seediq na. Kiya ka wada phuqil dheya ka Israel ma, wada mangal kana dxeral seediq Amori. 22Wada ngalun kana ka dxeral seediq Amori, peeyah yayung Arnon betaq yayung Yaboq ma, peeyah tadus brenux betaq yayung Yarden. 23Utux Tmninun, Utux Baro nuIsrael ka wada lmiwaq seediq Amori peeyah berah Israel we, ngalun su ka dxeral daha nii na? 24Uxe su mnangal pusu dnoi dxeral bnege Kemos utux su da peni? Meniq berah miyan lniwaq Utux Tmninun, Utux Baro miyan we, ngalun miyan ka pusu dnoi nii uri. 25Saya, yaa su mgkala Balaq qbsuran paru Moab, laqi Cipor peni? Bale ba mnccebu Israel ka dheya, uxe uri we ya su bale mkcmebu dheya? 26Seediq Israel we wada betaq 3'00 knkawas nniqan daha Xesbon ma lualang ssiyo na hiya, alang Aroer ma lualang ssiyo na hiya, kana lualang ssiyo yayung Arnon. Hmuwa ini namu tbrihi mangal ciida han peni? 27Uka ba qnqihan mu ani maanu sunan ka yaku. Isu ka nii rmading kmccebu kenan. Tai so Utux Tmninun mpgao seediq we, maha gmao ima ka malu ma ima ka naqah ckceka seediq Israel ma seediq Amon saya.” 28Kiya de ini qbahang dnurun kari Yiptax ka qbsuran paru seediq Amon.
29Meyah meniq heyi Yiptax ka Bgihur Utux Tmninun. Kiya de moda Gilad ma Menaseh ma, mooda Micpeh Gilad ma, peeyah Micpah Gilad mosa seediq Amon hiya. 30Smdehu lnglungan bbege na quri Utux Tmninun ka Yiptax: “Nasi bale ba sbege su baga mu ka seediq Amon, 31msbleyaq ku dehuk sapah peeyah seediq Amon hiya ciida. Ani ima ka peeyah sapah mu meyah smterung we, bege mu Utux Tmninun. Asi mu ka ngalun snapuh psqama mege ka heya.” 32Kiya de mosa seediq Amon hiya ma mccebu dheya ka Yiptax. Utux Tmninun we sbege na baga na ka dheya. 33Kiya de wada na ini baka ka dheya, peeyah Aroer betaq Minit ma, dungal we betaq Abel Keramim. Wada mangal 20 lualang. So kiya de, wada ini baka seediq Israel ka seediq Amon.
Weewa Yiptax
34Mbrinah sapah Micpah ka Yiptax, betaq sapah na. Qtai! Weewa na gisu kmeeki phrenang tatuk hmuril meyah smterung heya. Heya we wano ba kiya ka laqi mqedil Yiptax. Wano ba heya, uka ka laqi na da. 35Qmita heya ka Yiptax de, asi smgaliq lukus na ma rmengo: “Ayu bale! Laqi mu! Gisu saku pqrqilun riyung ma uka mu ba knklaan da. Ado tena ku wada rmengo quri Utux Tmninun ka quwaq mu, ini tduwa bbrnahun.” 36Rmengo heya ka weewa na: “Tama mu! Tena su wada rmaguh quwaq mquri Utux Tmninun de, asi su ka spuyu rnengo quwaq su moda kenan. Ado Utux Tmninun we wada cmiyuk pnrqilan heyi seediq Amon pais su da.” 37Rmengo tama na dungal: “Wano 1 ooda ka pgsaun mu sunan. Biqi ku 2 idas, tduwa ku msuupu tnhiyan mu mremux ckceka ddgiyaq hiya. Tai so mplingis miyan knweewa mu.” 38Rmengo ka Yiptax: “Osa!” Kiya de wada mlatac betaq 2 idas ka heya. Wada theyaq heya ka tnhiyan na uri. Msuupu lmingis knweewa na meniq ddgiyaq hiya. 39Bobo 2 idas de, meyah tama na hiya ka heya. Tama na de muyu so lnglungan na ka wada na daun. Ini ba theyaq rseno ka heya na. Kiya de niqan so nii ka pnugaya daha ka Israel. 40Knkingal knkawas spooda ali nii, asi ka moda mk4 ali lmingis quri weewa Yiptax seediq Gilad ka mqedil Israel.
Currently Selected:
Dmpsgao 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
