Yakobu 5
5
Mdakar Seediq Mbleyaq
1Qlahang! Yamu seediq mbleyaq nii. Tgdiras lmingis, ado gisu meyah heyi namu ka mpqraqil. 2Mpsburo ka qnbleyaq namu, yahun mekan kuyi ka lukus namu. 3Mpsgrangan ka king ma ging namu. Pnsrangan nii we gisu ptuura qnnaqah namu. Mntena so puniq meekan heyi namu. Ado qnhdean ali nii we wano gmutu pila ka klaun namu. 4Qnburung pnhmaan namu ka mqeepah we, lihan namu mege ka sntkean daha. Ga rmengac ka pila sntkean daha nii, kiya uri we hrenang qmneepah qnburung pnhmaan we wada betaq birac Bukung Mdoi Kana Supi da. 5Mtbleyaq namu mqqaras mekan meeniq bobo dxeral ka yamu, betaq namu mtbeno tmara namu ali ppaqun. 6Biqan namu qnquwan noda ka seediq msderux noda. Phqilun namu ma ini knciyuk yamu ka dheya.
Knremun ma Dmurun
7Maanu so kiya de, mtswai, yamu we knremun betaq meyah ka Bukung. Tai, mpqeepah dxeral we tmara paru rrihan pnugheyi dxeral, knremun tmara quyux tkuyan ma quyux ktean. 8Yamu uri we knremun uri. Pgdehu lhebun namu, ado smdaling ka ali Bukung da. 9Mtswai, iya pssmereq smnetur, so namu uxe maha pkdraan Utux Baro. Tai, ga mheyu rhengun ka Bukung mpsgao. 10Mtswai, mnoda ngayan Bukung rmnengo ka dmpgeela kari cuuxal we ngali so ppyugun ka ndaan daha mqraqil ma knrmenan daha. 11Tai, seediq knremun we mbleyaq bale kesun nami. Mnbahang namu ka knrmenan Yobu, wada namu qtaan uri ka qnhdean bnege Bukung. Klaun namu stngayan gnaalu ma gnhuwe Bukung.
12Mtswai mu, pusu bale we iya psdehu. Iya psquri karac baro psdehu, iya psquri dxeral psdehu uri. Ani maanu pnsdehu we iya dai. Kiya ka kari namu “un,” we “un” ma, “uxe,” we “uxe,” kesa, so namu uxe mpremux pnsgeegan na.
13Nasi niqan mqraqil ka ckceka namu de asi ka dmurun ka heya. Niqan ka qrasun we, asi ka muuyas ka heya. 14Niqan mnarux ka ckceka namu de, plaani ka rdrudan pssliyan so meyah dmurun heya. Spooda daha ngayan Bukung rmicuh abura heya. 15Mnoda snhiyan ka dnurun we mpdoi baga seediq mnarux, pttuyun Bukung ka heya. Nasi niqan qnquwan noda na we srwaun na uri. 16Maanu so kiya de, pttgesa qnquwan noda namu. Pddurun so namu maha mkmalu. Dnurun pneeyah seediq msderux noda we niqan bale beyax. 17Mntena so ita seediq ka Eliyah. Mbeyax dmurun uxe mpquyux ka heya de, betaq 3 knkawas 6 idas ka ini quyux. 18Dmurun dungal ka heya we, qmuyux ka karac, kiya de pheru pgheyi ka dxeral.
19Mtswai mu, nasi niqan seediq ckceka namu wada mgedan knbale ma niqan ka seediq pbrinah heya de, 20asi ka mkela ka seediq nii, brinah peeyah mnugedang elu ka seediq niqan qnquwan noda we, mpbrinah dmoi utux bgihur na peeyah mhuqil. Kiya uri we muubung egu qnquwan noda uri.
Currently Selected:
Yakobu 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
