1 Petros 1
1
Smiling
1Snkgulan Yesu Kiristo ka Petros, matis yamu kana seediq gneegan Utux Baro pnkrehak tnooda meniq Pontos, Garatia, Kappadokia, Asia ma Bitunia. 2Kiya ka muyu pnlaale pnkela Utux Baro ma, mnoda Mrtaso Bgihur pnktaso. Kiya de thei Yesu Kiristo, mnoda namu dara cnuwaq na. Tai so gnhuwe ma mtbale lhebun we maha mrana mege yamu!
Muudus Sntangan
3Tai so tndhuun ka Utux Baro Tama Yesu Kiristo Bukung! Pnuyu na paru gnaalu na, pnooda na Yesu Kiristo peeyah hnqilan, wada psbgurah ptuting ita. Kiya we ita de niqan ta muudus sntangan. 4Ga tana seku mangal dnoi karac baro ini ksburo, ini qrutiq, ini qnnaqah. 5Kiya ka ririh yamu mnoda snhiyan, wada mangal qnlhangan beyax paru ba Utux Baro ka maha mangal pnsramal na betaq nhdean ptuura ddowi na baga. 6Ani namu asi ka mooda tnnais naqah kuxul meniq lmlamu pnsengan we, qrasi ka so nii. 7Ani wada pseengan ka snhiyan namu de, mntena so king mpqnaqah spooda puniq pnseengan de ptuura knmalu na. Meniq ptuura Yesu Kiristo ciida de maha mangal tndhuun, knledax ma, spruun. 8Uxe ani namu qntaan ka heya, ida namu gmaalu heya. Saya de ani ini tai, yamu de ririh snhiyan namu nii kana ka qnaras namu uka knklaan rmengo ma stngayan knledax. 9Ado mnangal gnhiyan snhiyan namu, kiya ka dooyun baga ka utux bgihur namu.
10Quri so huwe ddoi baga we, dmpgeela kari we tena rnengo maha namu mangal gnhuwe ma wada daha Sbleqan bale migin. 11Migin riyung Bgihur Kiristo ga meniq lhebun daha we, tena mnama pgkela asi ka mooda mqraqil ka Kiristo ma, bobo de maangal knledax. Ooda nii we mpknuwan, maha so hmuwa. 12Mnangal pnugkela, klaun daha uxe dheya ka sqeepah daha, yamu ka sqeepah daha. Kiya de spooda na seediq snkgulan Mrtaso Bgihur gmarang malu kari yamu. Wada na sgarang yamu saya ka nii. Ooda nii we ani snkgulan baro we ida ga mita bale!
Mrtaso Kndesan
13Maanu so kiya de, psramal bale ka lhebun namu. Qlhangi riyung ma, pskingal lhebun namu psmeyah huwe bbege na yamu ptuura ciida ka Yesu Kiristo. 14Lqlaqi thei Utux Baro we, ida asi ka ini puyu kkraguh knuuka knkela namu cuxal. 15Pnlawa yamu na we mrtaso, so kiya de asi namu ka mrtaso kana ka noda namu uri. 16Ado matis ka Patis Mrtaso: “Krtaso ka yamu, ado mrtaso ku ka yaku.”
17Wada namu kesun Tama ka Bukung ini psaanak ma psgao noda txtaxa de, asi ka peeniq kniicu lhebun moda kndesan namu bobo dxeral. 18Klaun namu, mtduwa namu dooyun baga peeyah skbrhuwan qneepah pnltudan rudan namu we, uxe pnooda king ma ging mpsburo. 19Pnooda dara Kiristo, mntena dara miric uka luqah, uka qnrutiq. 20Kiristo we kiya ka plaale pnkela Utux Baro smnalu kana bobo dxeral ciida. Kiya de wada na spqita yamu qnhdean ali nii. 21Yamu we ririh heya, snhii namu Utux Baro pkuudus heya peeyah hnqilan ma mege knledax heya. So snhiyan ma sntangan namu de meeniq Utux Baro kana.
22So yamu de ririh thei namu kari bale ba de, wada psbgurah lhebun namu nanak da. Kiya de mtduwa namu bale ba gmaalu mtswai. So kiya de pdai lhebun bgurah bale ba moda mggaalu. 23Wada namu na psbgrahun ptuting we, uxe pneyah rehak mpsburo, mnoda rehak uxe ksburo. Kiya ka mnoda muudus kari Utux Baro uka psteqan. 24Ado,
“Kana muudus niqan heyi ma dara we mntena speriq kana,
mntena phepah bobo speriq ka knmalu taan na.
Mpkdengu ka speriq, mpkpiyung ka phepah.
25Wano kari Bukung we ida meeniq ani knuwan.”
Kari nii we kiya ka malu kari ga mu sgarang yamu.
Currently Selected:
1 Petros 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
