Yakobu 2
2
Mseru Rmengo Psaanak
1Mtswai mu, snhii namu Yesu Kiristo Bukung ta lmedax we iya qita hnyegan seediq. 2Nasi pqecul king baga, mlukus malu riyung lukus mremux pnssliyan namu ka seediq, kiya uri we mremux yamu hiya ka seediq qrinuc mlukus mrutiq riyung lukus, 3yamu de spruun namu ka ga mlukus malu, rngagan namu: “Tleung hini!” Kiya we rmengo namu seediq qrinuc: “Heyu hiya!” Uxe uri we “Tleung siyo tluungan mu.” 4So nii we uxe namu gisu psaanak seediq, dmoi naqah lnglungan psgeegan seediq peni?
5Mtswai sgaalu mu, qbahang bale, Utux Baro we uxe gnao seediq qrinuc bobo dxeral ma pttuku snhiyan daha, sbege na seediq gmaalu heya ka qnlhangan pnstangan na peni? 6Pqsiqa tmsiiyax seediq qrinuc ka yamu. Pqraqil dheya ma, tmulus dheya mosa psgeegan na we, uxe dseediq mbleyaq nii peni? 7Smngayan ngayan ga namu dooyun we, uxe dheya peni?
8Mnatis ka Patis Mrtaso: “Pntnani so gmaalu su isu nanak glaani ka ssiyo su.” Nasi namu muyu ba gaya nii ka yamu de, bale ba malu ka noda namu. 9Kiya de nasi namu mita hnyegan seediq we kiya ka niqan namu qnquwan noda. Ngalan niqan qnquwan noda meniq gaya ka nii. 10Ado muyu kana gaya de, nasi smeeliq 1 ba gaya de ida ga smeeliq kana gaya da. 11Rmnengo mesa: “Iya mmhemuc msuupu” we, ga rmengo dungal “Iya phuqil” uri. Ani so ini su knhemuc msuupu, nasi su phuqil seediq de, ida ga smeeliq gaya kiya uri. 12Yamu we kmpdaun namu gaya psgao ptraguh seediq de, asi namu ka muyu gaya rmengo ma moda uri. 13Ado ini gmhuwe seediq we, maha maangal pnsgao uka gmhuwe ka dheya. Gnhuwe we mgkala psgeegan.
Snhiyan ma Noda
14Mtswai mu, nasi niqan seediq rmengo niqan snhiyan ka heya we, uka ka noda na de maanu ririh na ho? Snhiyan so nii we mtduwa pkuudus heya peni? 15Nasi mbberas ini plukus ka mtswai rseno ma mtswai mqedil, uka uqun daha klaali uri de, 16ckceka namu we niqan ka seediq rmengo dheya: “Psbale lhebun namu osa da! Tai namu so maha muuxul pnlukus, maha mtengi nekan namu!” Kiya de ini namu biqi ddooyun quri heyi daha de, maanu ririh na ka kari nii di? 17So nii ka snhiyan uri, nasi uka ndaan de kiya ka ga mhuqil.
18Kiya de ida maha rmengo ka seediq: “Niqan snhiyan ka isu. Yaku we niqan ku ndaan.” Pqtai ku hiya ka snhiyan uka noda. Kiya de spooda mu ndaan mu, ptuura ku yamu snhiyan mu. 19Snhii su Utux Baro we 1 bale, malu ka snhiyan su so nii. Ani bgihur naqah we ida snhii ka dheya ma mprkerang miicu riyung. 20Yamu seediq mngataq nii! Yaa namu maha klaun uka ndaan ka snhiyan we uka ririh na da ho? 21Rudan ta Abraham we ngalan na spuhan mege ka Yijxaq laqi na. Noda nii we uxe pnooda ndaan na wada ngalun msderux noda ka heya peni? 22Taan ta so nii de, asi ka mtheyaq ndaan ka snhiyan ma noda daha. Kiya uri we pttuku riyung snhiyan ka ndaan. 23So nii de kiya ka pbale ba rnengo Patis Mrtaso: “Snhii Utux Baro ka Abraham duma, ngalan daha msderux noda ka heya.” Kiya de ngalan na dangi Utux Baro ka heya uri. 24Taan ta so nii de, seediq ngalan msderux noda we ririh ndaan, uxe ririh snhiyan. 25Mntena so nii uri, Raxab we smterung seediq snkgulan, pdaun na icil elu posa ka dheya dungal we, ririh ndaan na wada ngalan msderux noda ka heya duni? 26Maanu so kiya de, mntena so uka utux bgihur ka heyi de mhuqil. Uka ndaan ka snhiyan de mhuqil.
Currently Selected:
Yakobu 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
