Yakobu 1
1
Smbeyax Kari
1Yakobu tnqliyan Utux Baro ma, Yesu Kiristo Bukung rmengo malu su kesi ka 12 yamu lqlaqi Israel ga mkrehak kana qnlhangan.
Snhiyan ma Knkela
2Mtswai mu, smterung namu lmlamu pnseengan ciida we, ngali paru ba qrasun. 3Ado so klaun ka snhiyan namu we pnooda pnseengan de niqan knrmenan. 4Kiya de pyahi riyung ka beyax knrmenan, so namu maha mptuku ma tgdehu bale. Ani maanu ida niqan kana. 5Ckceka namu we nasi niqan ini knttuku knkela we, pgsai ka Utux Baro mbege knedux huwe ma ini kseang seediq. Utux Baro we ida mbege heya. 6Pdai snhiyan dmurun, iya tiiyax. Ado seediq tiiyax we mntena so rcilung mtbula spaux miyuk bgihur. 7Seediq so nii we uxe maangal ani maanu peeyah Bukung. 8Mtgdaha lnglungan ka seediq we, ida maha mlgelu kana elu ksaun na.
Qrinuc ma Mbleyaq
9Mtswai qrinuc ka wada spruun we tndhui. 10Mtswai mbleyaq ka wada pgseesu we tndhui. Ado mbleyaq seediq we maha mntena phepah speriq mpkuuka. 11Mnkala ka hido ma sbhuran bgihur kntlexan de, mdengu ka speriq ma mpiyung ka phepah. Knbtunux knmalu na we mpkuuka. Mbleyaq seediq uri we mntena so nii mpdudul mpahung pntbyaxan na ciida.
Pnsengan ma Psseung
12Niqan mbleyaq ka seediq knremun moda pnseung. Ado ida maha maangal bunuh knuudus bobo pnsengan. Nii we kiya ka Bukung pnstangan na seediq gmaalu heya. 13Wada psrdilun ka seediq we, iya kesa: “Gisu pkridil kenan ka Utux Baro.” Ado ini oda pnsdrilan qnnaqah ka Utux Baro. 14Wada psrdilun ka seediq we ririh psldiun nanak peeyah kkraguh ta. 15Meniq ka kkraguh de, meyah ka qnquwan noda. Niqan ka qnquwan noda de, meyah ka qnhuqil.
16Kana mtswai sgaalu mu, so namu uxe qbriqun! 17Kana huwe knmalu ma kana knmalu bnege we ida pneeyah baro kana. Pneeyah knledax Tama ta hiya mntuting. Heya we ini knpriyux ka heya ma, uka so saso knheruy. 18Spooda na lnglungan na nanak, spooda na kari bale ba ptuting ita. Kiya de ngngalun tana tgplaale gnheyi ckceka kana snmalu na.
Qmbahang Kari ma Qmeepah
19Kana mtswai sgaalu mu, kkela ka yamu: Tgaaguh qmbahang ka yamu, tghuwe rmengo ma iya asi kseang. 20Ado seang seediq we uxe mpttuku knsderux noda Utux Baro. 21Maanu so kiya de, laxi ka kana mrutiq ma qnnaqah sneli namu. Pniqi lhebun mhenuk maangal kari pnhmaan. Nii we kiya ka kari mdoi baga utux bgihur namu.
22Kiya de, yamu we puyu kari qmeepah. Iya wano mbahang ma mberiq yamu nanak. 23Ado wano mbahang kari ma ini qeepah we, mntena so sqita na gagi dqeras na nanak. 24Bobo mnita de mosa de, kiya de wada na asi chngii ka hnyegan na. 25Wano gaya tgleus mita ma mege pntraguh, kiya ma muyu klaali ndaan daha ka seediq we maha mangal smbleyaq. Heya we uxe mnbahang ma chngiyan na, asi bale ba muyu mooda ka heya.
26Nasi ngalan na niqan ba knstuutux heya nanak ka seediq we, ini hetur hema na de, gisu mberiq lhebun na nanak. Seediq nii we mgqiya ka knstuutux na. 27Meniq ta berah Utux Baro, Tama ta, knstuutux uka qnrutiq we kiya ka mpqlahang laqi tnqliyan ma mqedil mqrinuc. Kiya uri we ini treeru rutiq bobo dxeral.
Currently Selected:
Yakobu 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
