Yexejqel 9
9
Pkdraun ka Yerusalem
1Heya we mquri birac mu pmbaro ba mlawa: “Eyah baro hini! Pkdrai ka seediq alang nii. Pddoi nanak qyqeya mccebu mpkuuka.” 2Qtai! Niqan 6 heyi seediq gisu peeyah elu rhengun meyah baro. Baga tgtaxa daha we, gisu dmoi qyqeya kmphuqil seediq. Taxa daha we mlukus lukus tninun nuqah ma, pseedal cuqi psaan ppatis qalux ka hwinuk daha. Mremux ka dheya ma, mheyu ssiyo spuhan snmalu limuk ka dheya.
3Meeniq bobo kirubing, kiya ka peeyah hiya mgkala baro ka ledax Utux Baro nuIsrael ma, betaq rhengun sapah thmkuwan. Utux Baro we splawa na ka gaga mlukus lukus tninun nuqah ma, pseedal cuqi psaan ppatis qalux hwinuk. 4Rmengo heya ka Utux Tmninun: “Dai rmigo kana ka alang Yerusalem. Dai posa pnskraya ka kduruk dseediq gaga naqah kuxul qmnriqu kana pqnqihun noda alang nii.” 5Birac mu we, mbahang gisu rmengo duma seediq ka Utux Tmninun: “Snegul heya ma oda rmigo kana alang pphuqil seediq. Iya knraguh doriq namu, iya glaani. 6Phuqil kana ka rudan, mbeyax, weewa, laqi ma, mqedil. Wano ba niqan pnskraya we, iya ba sdlingi kiya.” Kiya de dheya we pllayun daha phuqil ka rudan gaga meniq berah sapah thmkuwan. 7Rmengo dheya ka Utux Baro: “Srtiqi ka sapah thmkuwan ma, pstenge mnhuqil seediq ka nganguc. Osa di!” Kiya de mosa ka dheya ma, mosa phuqil ckceka alang ka dheya. 8Gaga phuqil seediq ka dheya ciida, yaku nanak ka msrangi hiya. Kiya de tmbqelic ku dxeral ma, mlawa ku: “Ah! Utux Tmninun Bukung! Sheruy su Yerusalem ka seang su ma, qhdeun su pkuuka kana ka seediq mnsngari Israel peni?”
9Rmengo kenan ka heya: “Paru bale qnquwan noda daha ka sapah Israel ma Yehudah. Mqhedu dara pnhuqil seediq ka qlhangan nii ma stenge qnnaqah ka alang. Ado rmnengo ka dheya: ‘Wada qmada dxeral nii ka Utux Tmninun. Ini qita ita ka heya.’ 10Kiya de, ini ku knraguh qmita ma, ini ku gaalu dheya. Mpuyu ku noda daha cmiyuk ku dheya.”
11Qtai! Cmiyuk rmengo noda nii ka seediq gaga mlukus lukus tninun nuqah ma, pseedal cuqi psaan patis qalux hwinuk: “Wada mu daan ka rnengo su di.”
Currently Selected:
Yexejqel 9: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
