Yexejqel 8
8
Tg2 Qnita Yexejqel so Utux (8:1-10:22)
Thmuku Tikung Ckceka Yerusalem
1Ali 5 idas 6 tg6 knkawas, tleung ku truma sapah. Tleung berah mu ka ddrudan Yehudah. Baga Utux Tmninun Bukung we meyah heyi mu. 2Qmita ku, qtai! Niqan ka mntena so hnyegan puniq. Peeyah hwinuk quri toma we mntena puniq ma, peeyah hwinuk quri baro we niqan hnyegan ledax, so hari xiluy tqwilaq. 3Mntena so ga na shkero ka baga na ma, qmerac snuunux mu. Kiya de desun ku na cenga karac ma dxeral ka Bgihur. Meniq ckceka qnita mu so tuutux Utux Baro hiya, desun ku na Yerusalem ma pdhekun ku na rhengun nganguc tgtruma mquri daya. Gaga hiya ka tluungan tikung mbrebur qqnriqu, kiya ka mbrebur qqnriqu. 4Qtai! Niqan knledax Utux Baro nuIsrael ka hiya. Mntena so hnyegan qnita mu meniq dxeral breenux hiya.
5Rmengo kenan ka Utux Baro: Laqi Seediq! Pstutuy tunux su ma qita quri daya. Kiya de pstutuy ku tunux ma qmita ku quri daya we gaga rhengun spuhan quri daya ka tikung qnrquun. 6Rmengo kenan dungal ka heya: “Laqi Seediq! Ya su ga qtaan ka ndaan sapah Israel ho? Smtheya peeyah Sapah Thmkuwan mu ma nii moda paru ba qnrquun hini ka sapah Israel. Kiya de mqita su krinah qnrquun dungal ka isu” kesun ku na.
7Kiya de desun ku na rhengun nganguc ka yaku. Qmita ku, qtai! Niqan 1 beling ka qnabil. 8Rmengo ka heya: “Laqi seediq! Gblingi ka qnabil.” Kiya de gblingun mu ka qnabil. Qtai! Niqan 1 rhengun. 9Rmengo ka heya: “Remux truma, qtai noda daha qnnaqah ba hini.” 10Kiya de mremux ku ma mosa ku qmita. Qtai! Gisu nii gqeran matis qnabil hiya ka ani maanu mpkkarang, hnyegan camac qnrquun ma lmlamu tikung sapah Israel. 11Mheyu berah hnyegan nii ka 70 heyi rudan sapah Israel. Yaajaneyahu laqi Sapan we gaga mheyu ckceka hiya uri. Txtaxa daha we gisu dmoi sara psqmaan skenux ma, mntena plabu wada baro ka qrengul sknexan. 12Rmengo kenan ka heya: “Laqi seediq, qtaan su gisu moda mgleing truma sapah tktikung daha nanak hiya ka drudan sapah Israel ho? Ado rmnengo ka dheya: ‘Ini qita ita ka Utux Tmninun. Wada na sqada ka dxeral nii di.’” 13Rmengo dungal: “Mqita su krinah paru bale qnrquun noda daha dungal.”
14Kiya de desun ku na rhengun quri daya sapah thmkuwan Utux Tmninun. Qtai! Gisu nii lmingis quri Tamuj tleung hiya ka mmqedil. 15Rmengo kenan ka heya: “Laqi seediq, qntaan su di? Mqita su krinah paru bale qnrquun dungal.”
16Bobo na de, desun ku na mremux nganguc tgtruma sapah thmkuwan nuUtux Tmninun. Qtai! Yaa ba 25 heyi ka seediq gaga meniq cenga sbesuk ma spuhan hiya ma, mege bukuy sapah thmkuwan mquri nklaan hido thmuku hido ka dheya. 17Rmengo kenan ka heya: “Laqi seediq! Qntaan su di? Qnrquun noda sapah Yehudah hini we, biciq peni? Pstngayan daha noda sgcuqi pnkdira ka dxeral ma, mpkrinah pkseang kenan. Qtai! Nii peeniq cida qhuni muhing mu ka dheya nii. 18Maanu so kiya de, mpooda ku seang mu moda ka yaku uri. Uxe ku mpkraguh qmita ma, uxe mu glaanun ka dheya. Ani yaa diras mlawa quri birac mu we, uxe ku mpqbahang.”
Currently Selected:
Yexejqel 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
