Yexejqel 10
10
Mlatac Peeyah Alang Mrtaso ka Knledax Utux Tmninun
1Qmita ku, qtai! Meeniq ckceka rangah karac, gaga bobo tunux kirubing ka mntena tluungan qbsuran paru so btunux mtlawa. 2Rmengo seediq qapal baga mlukus lukus tninun nuqah ka Utux Tmninun: “Osa cenga ribo toma kirubing ma, pstngai 2 karuk baga su ka bagah puniq gaga cenga kirubing. Kiya de sai murus bobo alang ka nii.”
Qmnita ku bale wada mremux ka heya. 3Wada mremux ka seediq nii ciida, mheyu tgtruma sapah thmkuwan ka kirubing. Asi pqhedu mubung nganguc tgtruma ka plabu. 4Mtutuy peeyah bobo kirubing hiya ka ledax Utux Tmninun ma, mosa bobo rhengun sapah thmkuwan. Truma sapah thmkuwan we, gaga stngayan plabu ma, nganguc we stngayan ledax Utux Tmninun duri. 5Ciida, hrenang palic kirubing we mntena hrenang kari Utux Baro Kana Beyax, qbhangan betaq nganguc tgbukuy.
6Rmengo seediq gaga mlukus lukus tninun nuqah ka Utux Tmninun: “Ngali puniq peeyah cenga kirubing, cenga ribo gaga mtgiya.” Kiya de mosa mremux mheyu siyo ribo ka seediq kiya. 7Hmkero baga mangal puniq qapal ckceka cenga kirubing ka 1 kirubing. Pniqun na tikuh baga gaga mlukus lukus tninun nuqah. Mnangal ka heya de wada nganguc ka heya. 8Qtaan mu we kiya ba so niqan baga seediq toma palic kirubing.
9Dungal qmita ku. Qtai! Ssiyo kirubing nii we gaga niqan 4 ribo. 1 ribo we gaga ssiyo 1 kirubing ma, duma na hiya ka ribo we gaga ssiyo kirubing uri. Mntena btunux mgsama dnyangan na ka ribo nii. 10Quri so hnyegan 4 ribo nii we, mntena ba kana. Mntena so gaga ckceka 1 ribo ka duma na ribo dungal. 11Knhrui mosa ka dheya we mtduwa mosa ani inu. Ini pspgeriq. Mosa inu ka tunux de, mquri nak hiya uri. Ida ini pspgeriq ka dheya. 12Kana heyi daha, bukuy, baga, palic ma ribo we, stenge doriq kana. Ida so kiya ka 4 ribo kirubing uri. 13Mbahang ka birac mu, kesun daha “Ribo mtgiya” ka ribo nii. 14Ms4 dqeras daha ka kirubing. Tgkingal dqeras we dqeras kirubing, tg2 dqeras we dqeras seediq, tg3 dqeras we dqeras rkelic rudu, tg4 dqeras we dqeras kjiro.
15Mtutuy mnkala baro ka kirubing. So kiya ka qnita mu muudus meeniq ku ssiyo yayung Kebar. 16Mkkesa ka kirubing we, mkkesa ssiyo na ka ribo uri. Rmaguh palic na ka kirubing ma, skiya peeyah dxeral. Ini latac meniq ssiyo daha ka ribo uri. 17Msange ka kirubing de, msange ka ribo uri. Mosa baro ka kirubing de, ida mosa baro ka ribo uri. Ado bgihur knuudus we gaga meeniq ckceka ribo.
18Mlatac rhengun tmayan sapah thmkuwan ka ledax Utux Tmninun. Msange bobo kirubing. 19Kiya de kmugah palic na ka kirubing de, wada baro meeniq berah mu. Wada mlatac ciida, gaga ssiyo ka ribo ma, gisu msange rhengun quri nklaan hido sapah thmkuwan nuUtux Tmninun. Niqan knledax Utux Baro nuIsrael ka baro daha.
20Muudus qnita mu ssiyo yayung Kebar ka nii. Gaga meniq toma Utux Baro nuIsrael ka dheya. Ado klaun mu kirubing ka dheya. 21Niqan ms4 dqeras ka knkingal daha ma, 4 ka palic daha. Toma palic daha we niqan ka so baga seediq. 22Quri so dqeras ma hnyegan heyi daha we, kiya ka qnita mu yayung Kebar cuuxal. Ida mquri berah mkkesa ka txtaxa daha.
Currently Selected:
Yexejqel 10: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
