Yexejqel 7
7
Smdaling ka Qnhdean Israel
1Meyah dungal kenan ka kari Utux Tmninun. Rmengo, 2“Isu, laqi seediq! So nii kari na quri dxeral Israel ka Utux Tmninun Bukung: ‘Qnhdean, nii dehuk kana muxi dxeral ka qnhdean! 3Nii dehuk sunan saya ka qnhdean di. Meeyah sunan ka seang mu ma, mpuyu ku noda su mpsgao ku sunan. Mooda kana pqnqihun qneepah su mpkdira ku sunan. 4Uxe ku mpkraguh qmita sunan ma, uxe ku mpgaalu sunan. Mpuyu ku so pqnqihun noda namu cmiyuk sunan. Kiya de maha su klaun, yaku ka Utux Tmninun.’”
5So nii kari na ka Utux Tmninun Bukung: “Mqraqil, wano kingal mqraqil. Tai, gisu ka smdaling di! 6Dehuk ka qnhdean, dehuk ka qnhdean. Mptutuy ka heya ma meeyah cmebu sunan. Qtai! Gisu di! 7Seediq nii meniq dxeral nii! Dehuk sunan ka qnhdean qnrqilan di. Dehuk ka ali ma, smdaling di. Niqan ka mrrudu riyung we, uxe hrenang qqrasan ddgiyaq kiya. 8Uxe mu beyo poxun heyi su ka tnpreqan seang mu ma, ptraguh mpquri sunan ka seang mu. Mpuyu ku noda su psgao ma, mpkdira ku sunan ririh kana pqnqihun noda su. 9Uxe mpkraguh qmita sunan ka doriq mu ma, uxe ku mpgaalu sunan. Maha ku muyu qneepah su cmiyuk sunan. Mpuyu ku pnqqihan noda su pkdira sunan. Kiya de mpkela su, smebuc sunan we kiya ka yaku, Utux Tmninun.
10Qtai! Ali kiya! Tai! Dehuk di! Dehuk ka pnqrqilan di. Gisu mphepah ka hukuc ma, gisu smtasil ka psparu. 11Mtutuy ka sgcuqi naqah riyung, kiya ka hukuc sebuc qnquwan noda. Maha mpkuuka kana nangal daha, knbleqan daha ma, dnoi daha. Mpkuuka knledax ka ckceka daha uri. 12Dehuk ka ali ma smdaling di. Iya qqaras ka mbaruy. Iya tsdamac ka gmbbaruy. Ado gisu meeyah kana rahul seediq ka seang. 13Ani ya muudus ka gnbaruy we, uxe pbrnahun ka qyqeya bnaruy. Ado tuutux nii we gisu mquri dheya. Ani ima uxe pbrinah. Uka ka seediq mptduwa pkbeyax knuudus daha nanak meniq ckceka qnquwan noda uri.
Pkdira Qnquwan Noda Israel
14Miyuk urung ma psramal ma, uka ani 1 heyi ka mosa mccebu. Ado gaga heyi daha ka seang mu. 15Gaga nganguc ka hlmadac, gaga toma ka mnarux punu ma ure. Meeniq qnpahan we, mphuqil hlmadac. Meeniq ckceka alang we, mphuqil knuure ma, mpkuuka mnarux punu. 16Ani yaa dehuk qduriq ka duma daha we, ida mpeeyah rengac daha ririh qnquwan noda daha nanak. Mntena so byugu gisu rmengac ayu. 17Uka beyax ka baga daha, pkrkerang muuwic so qsiya ka pungo daha. 18Hmabik lukus mbasi hwinuk ma, bungan kniicu kana ka dheya. Msiqa riyung ka dqeras daha ma, byuhan hiya kana ka snuunux daha. 19Sqada daha elu ka ging ma, ngalun daha quti ka king. Pkelu ali seang Utux Tmninun ciida we, uxe mpdoi baga dheya ka king ma ging. Uxe pttuku uqun daha ma, uxe mpktengi ka nbuyas daha uri. Maha so btunux mptakur dheya nanak ka qnquwan noda. 20So nii tqliwaq ppdeping daha we dooyun daha ttndahu ma ssmalu daha tikung pqnqihun ba. Kiya ka pqtaan mu so quti qmita ka kiya. 21Bege mu qyqeya gglekun seediq icil qlhangan ka nii ma, bege mu qyqeya qnerac seediq naqah ka dheya. Kiya de mptsiiyax nii ka dheya. 22Tmsiiyax sapah thmkuwan mu ka dheya. Mpteme hiya ma mptsiiyax hiya ka mpseelaq uri. Uxe ku mpquri seediq Israel ma mpqlahang dheya.
23Smlei bbekuy. Ado nii stenge qnquwan noda psdara ka dxeral ma, stenge noda sgcuqi naqah riyung ka alang. 24So kiya de, splawa mu ka seediq nqnaqah ba qqlhangan meeyah meeniq sapah daha. Plaxun mu ka ttndahu dseediq sgcuqi mtngari. Maha ttsyaxun ka sapah thmkuwan daha uri. 25Meeyah ka mpqhedu smeeliq. Meeyah mesa mttbale lhebun ka dheya we, uka ka mttbale lhebun. 26Mqraqil we prnaan hiya dungal ka mqraqil. Kari bgihur we smnegul dungal ka kari bgihur. Mpesa qqita so tuutux mpgeela kari ka dheya. Kiya de mpsetuq kana ka tnugesa dmsapuh ma, sseengan daha lmngelung ka rdrudan. 27Tsdamac ka qbsuran paru, mlukus mtletu lhebun ka dqbsuran mdudul ma, pkrkerang baga daha kana ka seediq qlhangan hini. Mpuyu ku qneepah daha mpciyuk ku dheya, mpuyu ku so ngngalun daha psgao dheya. Kiya de mpkeela ka dheya, yaku ka Utux Tmninun.”
Currently Selected:
Yexejqel 7: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
