Yexejqel 6
6
Mseang Qnquwan Noda Thmuku Tikung
1Meyah kenan ka kari Utux Tmninun, 2“Laqi seediq! Psquri ddgiyaq Israel ka dqeras su ma rmengo kari pgeela. 3Rengo ka isu, ddgiyaq Israel! Qbahang kari Utux Tmninun Bukung. So nii kari na quri dgiyaq, dgiyaq biciq, ayu ma, yayung. Qtai! Pyahun mu yamu ka hlmadac ma, hrahun mu ka spuhan namu. 4Hrahun ka spuhan namu ma hrahun ka psqmaan namu sknexan. Qada mu berah tikung namu ka seediq namu pnhuqil. 5Pniqun mu berah tikung daha ka mnhuqil seediq Israel ma, urus mu mtqiri spuhan namu ka buuc namu. 6Ani namu meniq niinu, qada mu kana ka lualang namu ma, sliqun ka spuhan. Kiya de maha lixun ka spuhan namu ma, ngalun niqan qnquwan noda. Tnmeun ka tikung ma, hrahun ka spuhan namu. Kana noda namu we maha sresun kana. 7Mpksaro ckceka namu ka dseediq pnhuqil. Kiya de mpkela namu, yaku ka Utux Tmninun.
8Mprangi ku duma seediq, kiya ka mpqduriq hlmadac meeniq dqqlhangan ma pnkrehak qqlhangan icil. 9Dseediq qnduriq we, maha lmngelung kenan meniq alang qnerac qqlhangan hiya. Mngihur riyung ka lhebun mu, ado lnglungan mmhemuc msuupu ka lhebun daha, malix kenan ma, doriq mmhemuc msuupu we gisu smnegul tikung. Ririh kana qnnaqah psaniq noda daha, mpqnqihun daha nanak ka dheya. 10Dheya we maha daha klaun, yaku ka Utux Tmninun. Rmnengo ku mmeyah dheyi daha ka mpqraqil nii. Kari nii we mpbale ba.”
11So nii kari na ka Utux Tmninun Bukung: “Tapaq baga su ma klekil papak su rmengo: Ah! Sapah Israel we mnoda oda kana qnqihun di, mpksaro hlmadac, knuure ma, mnarux punu ka dheya. 12Gaga meniq theya we mphuqil mnarux punu. Gaga meniq ddaling we phqilun hlmadac. Mnsngari muudus rnangi tlbuwan hiya we desun ure. So nii mpdehuk dheya ka tnpreqan seang mu. 13Mnhuqil we mpksaro ckceka tikung meniq mtqiri spuhan, meniq dgiyaq paru ma, bungu dgiyaq, kana toma qhuni, kana toma qhuni raus, kiya ka kana spuhan tikung psqmaan skenux hiya. Ciida, mpkela ka dheya, yaku ka Utux Tmninun. 14Mposa ku baga dheya, mpseeliq ku dxeral daha ma, ngalan mu dxeral qnada nlaxan ka peeyah tadus brenux Diblah ma, kana gaga daha niqan. Kiya de mpkela ka dheya, yaku ka Utux Tmninun.”
Currently Selected:
Yexejqel 6: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
