Yexejqel 5
5
Matak Snuunux ka Yexejqel
1“Isu, laqi seediq! Ngali mhungul ba hlmadac ma pntnaani so kugus mkugus snuunux. Tapi ka snuunux su ma kgusi ka ngudus su. Bobo na de posa sseengan ma psaasu. 2Mttuku ka ali tnlbuwan de, psqmai ckceka alang ka 1 tnugtruwan snuunux. Angal ka 1 tnugtruwan ma ttei hlmadac mtqiri alang. Msngari na ka 1 tnugtruwan du we pkrehak piiyuk bgihur. Mphgeluq ku hlmadac ka yaku ma mpsdurak ku bukuy daha. 3Ngali tikuh ubal snuunux peeyah hiya ma labu palic lukus. 4Dungal we ngali tikuh peeyah ckceka hiya ma, qdaani ckceka puniq psqama. Mpeyah ckceka hiya ka puniq meyah mpsqama kana sapah Israel. 5Rmengo so nii ka Utux Tmninun Bukung: ‘Nii ka Yerusalem. Pniqan mu ckceka kana qlhangan ma mptqiri ssiyo na ka kana qlhangan. 6Moda qnnaqah oda ka Yerusalem ma, tbrinah gaya bneku mu ma betaq hmrinas dqqlhangan. Ttbrinah kari pndakar mu ma, betaq hmrinas dqqlhangan gaga tqqiri ssiyo. Malix gaya bneku mu ma, ini puyu kari pndakar mu uri.’ 7Kiya de so nii kari na ka Utux Tmninun Bukung: ‘Hmrinas seediq icil qlhangan ga mtqiri yamu ka mrrudu namu ma, ini namu puyu kari pndakar mu ma, ini namu qbahang gaya bneku mu. Ani yaa gaya pndakar dqqlhangan tqqiri ssiyo su uri we ini su pyugi uri.’” 8Kiya de rmengo so nii ka Utux Tmninun Bukung: “Qtai! Yaku, mppais ku sunan ka yaku. Mpkdira ku sunan, meeniq ku berah qqlhangan ma, meeniq ku ckceka namu. 9Ririh kana bsaniq noda namu, mooda ku uxe mu ndaan meniq ckceka namu. Ani so nexal we uxe ku mooda so nii. 10Meniq ckceka namu, meekan heyi laqi na ka tama ma, meekan heyi tama na ka laqi. Psgeegun maku ma mnstngari namu we mpkrehak ani inu kana. 11Rmengo ka Utux Tmninun Bukung: ‘Mpsdehu ku knuudus mu betaq ani knuwan. Ado sdoi su qyqeya bsaniq kenan ma, noda qnrquun mu wada su smrutiq sapah thmkuwan mu. Kiya de qhdeun su mu qmuluh ma, doriq mu we uxe mpkhuwe ma mpgaalu sunan. 121 tnugtruwan dseediq su we, mphuqil mnarux punu, ado mphuqil niqan knrayan ckceka namu. 1 tnugtruwan we phqilun hlmadac mtqiri su hiya. 1 tnugtruwan we mkrehak mu ani inu ma, mphgeluq ku hlmadac smdurak dheya.
13Pyahun mu kana ka seang mu. Bobo wada msange ka seang mu dheya de, mpkmalu ka kuxul mu. Wada mu ptkuun peeyah dheya kana ka tperuq seang mu ciida, maha mkela rnengo mu yaku, Utux Tmninun we pneeyah snhuran mu. 14Ngalun maku nlaxan qnada meniq qqlhangan mtqiri ka yamu. Ngalun tnsyaxan meniq berah doriq dseediq mnoda hiya. 15So kiya de, mpdoi ku seang ma tperuq, psgao ku quri sunan. Ciida, meeniq ckceka dqlhangan mtqiri hiya we, maha so tnsyaxan, snlyanun, qlhangun ma, nklwiun ka nii. So nii ka rnengo mu yaku, Utux Tmninun. 16Ccebu mu dseediq mpkuuka ka budi knuure naqah. Cbuun mu ma, mpkuuka ka dheya. Ciida, krnahun mu peeyah ka knrayan, pstequn mu ka uuqun ngngalun. 17Mpskagul ku ure ma camac qnnaqah mosa yamu hiya, kiya ka mpkuuka lqlaqi namu. Oda mnarux mpunu ma mpsdara we, maha mrana yamu hiya. Dungal we pyahun mu yamu hiya ka hlmadac uri. So nii ka rnengo mu yaku, Utux Tmninun.’”
Currently Selected:
Yexejqel 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
