Yexejqel 48
48
Psaasu Dxeral ka Dpnswayan Rudan
1Ngayan pnswayan rudan we so nii: Peeyah daya betaq qhdaan, speeyah Xetlon betaq tmayan Xamat, betaq ayus dxeral Xacar Eynan ayus Darmeseq. Smdaling dxeral Xamat ka daya, nDan ka duma peeyah nklaan hido betaq pryaxan hido. 2Smdaling ayus dxeral Dan we, nuAser ka duma peeyah nklaan hido betaq pryaxan hido. 3Smdaling ayus dxeral Aser we, nNaptaliy duma peeyah nklaan hido betaq pryaxan hido. 4Smdaling ayus dxeral Naptaliy we, dxeral Menaseh ka duma peeyah nklaan hido betaq pryaxan hido. 5Smdaling ayus dxeral Menaseh we, nuEprayim duma peeyah nklaan hido betaq pryaxan hido. 6Smdaling ayus dxeral Eprayim we, dxeral Reuben duma peeyah nklaan hido betaq pryaxan hido. 7Smdaling ayus dxeral Reuben we, nuYehudah duma peeyah nklaan hido betaq pryaxan hido.
Dxeral Mrtaso Gaga Ckceka
8Smdaling ayus dxeral Yehudah we, peeyah nklaan hido betaq pryaxan hido, asi ka niqan ka bnege su dxeral mrtaso, 2 mang 50'00 sese ka qndisan na. Knbragan na we, ida mntena naasu pnswayan rudan peeyah nklaan hido betaq pryaxan hido. Asi ka meeniq hiya ka sapah thmkuwan. 9Dxeral mrtaso bege namu Utux Tmninun we asi ka 2 mang 50'00 sese ka knlabang ma, 1 mang ka qndisan. 10Asi ka sbege msapuh ka dxeral mrtaso nii. Mquri daya ka knlabang na we 2 mang 50'00 sese, mquri pryaxan hido we 1 mang qndisan, mquri nklaan hido we 1 mang baga qndisan ma, mquri tgtruma ma we 2 mang 50'00 sese knlabang na. Asi ka meeniq hiya ka sapah thmkuwan Utux Tmninun. 11Dxeral nii we asi ka sbege dmsapuh mrtaso lqlaqi Cadoq. Dheya we asi ka muyu tnugesa mu. Mgeedang seediq Israel ciida, ini pntena seediq Lewiy mgeedang ka dheya. 12Asi namu ka rngiun 1 dxeral ka dheya meeniq dxeral mrtaso hiya. Ririh pusu mrtaso, asi ka smdaling ayus dxeral seediq Lewiy. 13Dxeral nangal seediq Lewiy we 2 mang 50'00 sese knlabang ma, 1 mang qndisan. Mntena ayus dxeral msapuh kiya, ida 2 mang 50'00 sese knlabang ma, 1 mang qndisan. 14Iya brigi ka dxeral nii ma, iya bale pryuxi uri. Knmalu bale nii we, iya bale biqi seediq icil, ado nuUtux Tmninun mrtaso ka kiya.
15Dxeral mnsngari na 2 mang 50'00 sese knlabang ma, 50'00 sese qndisan we, pspuun dmoi kana kiya. Doyun smalu alang, sapah ma, dxeral ini psai ani manu. Asi ka meeniq ckceka bale ka alang. 16So nii ka Knpruwan alang: Tgdaya we 45'00 sese, tgtruma we 45'00 sese, nklaan hido we 45'00 sese ma, pryaxan hido we 45'00 sese. 17Asi ka niqan dxeral ini psai ani manu ka alang, mquri tgdaya we 250 sese, mquri tgtruma we 250 sese, mquri nklaan hido we 250 sese ma, mquri pryaxan hido we 250 sese. 18Dxeral smdaling dxeral mrtaso msngari we, mquri nklaan hido we 1 mang knlabang, mquri pryaxan hido we 1 mang sese. Ida msuupu dxeral mrtaso ma, hneru pneeyah ckceka dxeral nii we, kiya puqun dseediq meepah ckceka dlualang hiya. 19Dseediq pneeyah pnswayan rudan Israel mpqeepah alang nii we, asi ka mosa meepah dxeral nii. 20Kana dxeral mrtaso, 2 mang 50'00 sese knlabang ma, 2 mang 50'00 sese qndisan nii ma, kana dxeral dlualang we ngalun dxeral mrtaso kana.
21Dxeral gaga ssiyo mnsngari dxeral mrtaso ma dxeral lualang we, asi ka sbege qbsuran paru kiya. Dxeral nklaan hido we, mquri tgdaya ma tgtruma we 2 mang 50'00 sese. Mquri nklaan hido we betaq ayus nklaan hido. Dxeral pryaxan hido, mquri tgdaya ma tgruma we 2 mang 50'00 sese. Mquri pryaxan hido we betaq ayus pryaxan hido. Dxeral pnaasu pnswayan rudan we, asi ka sbege qbsuran paru kiya. Dxeral mrtaso ma dxeral lualang we asi ka meeniq ckceka hiya. 22Dxeral seediq Lewiy ma dxeral lualang we, asi ka meeniq ckceka dxeral qbsuran paru. Cenga ayus dxeral Yehudah ma ayus dxeral Binyamin we, asi ka sbege qbsuran paru kiya.
Duma Dxeral Pnswayan Rudan
23Quri so duma pnswayan rudan peeyah nklaan hido betaq pryaxan hido we nBinyamin kiya. 24Smdaling ayus dxeral Binyamin we, nSimeon ka duma peeyah nklaan hido betaq pryaxan hido. 25Smdaling ayus dxeral Simeon we, nuYisaskar ka duma peeyah nklaan hido betaq pryaxan hido. 26Smdaling ayus dxeral Yisaskar we, nJebulun ka duma peeyah nklaan hido betaq pryaxan hido. 27Smdaling ayus dxeral Jebulun we, nGad ka duma peeyah nklaan hido betaq pryaxan hido. 28Smdaling ayus dxeral Gad, ayus peeyah Tamar betaq qsiya Meribah gaga Qades, mooda ayu yayung Micrayim betaq rcilung Paru. 29Kiya ka dxeral nii daun namu blebil qreti psaasu namu mege pnswayan rudan Israel ngalun daha pusu dnoi. Ngngalun dpnswayan rudan ka nii. Rnengo Utux Tmninun Bukung ka nii.
Rhengun Alang Yerusalem
30So nii ka rhengun alang Yerusalem: Mquri tgdaya we 45'00 sese. 31Rrhengun alang we asi ka spooda ngayan pnswayan rudan Israel ptngayan. Tgdaya we niqan 3 ka rhengun, 1 we rhengun Reuben, 1 we rhengun Yehudah ma, 1 we rhengun Lewiy. 32Mquri nklaan hido we 45'00 sese, niqan 3 ka rhengun. 1 we rhengun Yosehu, nii we rhengun Binyamin ma, 1 we rhengun Dan. 33Mquri tgtruma we 45'00 sese, niqan 3 rhengun. 1 we rhengun Simeon, 1 we rhengun Yisaskar ma, 1 we rhengun Jebulun. 34Mquri pryaxan hido we 45'00 sese, niqan 3 rhengun. 1 we rhengun Gad, 1 we rhengun Aser ma, 1 we rhengun Naptaliy. 35Msuupu qndisan na ka 4 mtqiri baang alang nii we 1 mang 80'00 sese. Bobo na nii, ngayan alang nii we, asi ka kesun “Nniqan Utux Tmninun.”
Currently Selected:
Yexejqel 48: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
