Yexejqel 47
47
Qsiya Hneru Peeyah Sapah Thmkuwan
1Heya we pbrnahun ku na rhengun sapah thmkuwan ka yaku. Qtai! Niqan qsiya hmneru peeyah toma rhengun sapah thmkuwan mqquri nklaan hido. Ado mqquri nklaan hido ka sapah thmkuwan. Qsiya we criyu ssiyo sapah thmkuwan, kiya ka narac na peeyah tgtruma spuhan mquri tgtruma qluli. 2Heya we desun ku na mlatac rhengun tgdaya, dungal we speeyah ku na nganguc mquri rhengun nganguc gaga quri nklaan hido. Qtai! Peeyah narac hmeru ka qsiya.
3Mangal negul ka baga na mquri nklaan hido mlatac ma, smeung 10'00 sese. Pdaun ku na mtaril qsiya ma, betaq pnqapal ka qsiya. 4Heya we, smeung dungal 10'00 sese, pdaun ku na mtaril qsiya ma, betaq dgiyaq papak mu ka qsiya. Dungal we smeung 10'00 sese ma, pdaun ku na mtaril, betaq hwinuk mu ka qsiya. 5Dungal we smeung 10'00 sese, msyayung ka qsiya ma, uka daun mtaril. Ado msyayung baro ka qsiya ma, asi ka lnguyan, uka kksaan mtaril. 6Rmengo kenan ka heya: “Laqi seediq! Ntaan su da ho?”
Desun ku na ssiyo yayung. 7Dehuk ku ssiyo yayung ciida, qtai! Egu bale qhuni ka ssiyo yayung hini ma ssiyo yayung sipo. 8Rmengo kenan ka heya: “Mqquri nklaan hido qluli ka qsiya nii. Mooda Arabah ma mremux rcilung. Mremux rcilung ka qsiya yayung de asi ini knihul. 9Dhekan qsiya 2 yayung nii we, ida mpkuudus ka kana mnuudus. Dheqan qsiya nii de, ini knihul ka qsiya. Ado egu riyung qcurux ka toma qsiya hiya. Ani inu dhekan qsiya nii we, ida mpkuudus kana ka muudus hiya. 10Mheyu ssiyo rcilung hiya ka mptqcurux ma, mpeeyah Eyn Gediy betaq Eyn Eglayim we phdagan daha qcurux. Lmlamu ka qcurux hiya, mntena so lmlamu qcurux meeniq rcilung paru. 11Qsiya mneeniq mslangu hunac, mrutiq ebun ka qsiya na we ida mremul kiya na. Wano ba slmeun timu kiya. 12Mssipo sysiyo yayung we ani maanu qhuni pnhgalang ka gaga hmeru hiya tduwa ngalun uqun. Ini ba kuuwic mdengu ka waso ma, ini qsetuq ka heyi qhuni. Ida knteetu mghei idiidas. Ado hmneru pneeyah sapah thmkuwan ka qsiya nii. Uqun ka gnheyi qhuni ma, tduwa ssapuh ka waso na.”
Ayus Dxeral
13Rnengo so nii ka Utux Tmninun Bukung: “Ayus dxeral asu namu mege 12 pnswayan rudan Israel ka nii. Asi ka mangal 2 nseegan ka Yosehu. 14Yamu we mangal namu pusu dnoi dxeral nii we, asi namu ka nduwa bale psaasu. Sntangan mu bbege rdrudan namu ka dxeral nii ma, bbege mu pusu dnoi namu ka dxeral nii.
15Ayus dxeral nii we so nii: Ayus quri daya we peeyah rcilung paru mquri Xetlon betaq Cedad. 16Ayus nii we mquri Xamat, Berotah ma, Sibrayim, Sibrayim we gaga cenga ayus dxeral Darmeseq ma Xamat betaq Hacer Hatikon ayus Xawran. 17Manu so kiya, ayus dxeral we, peeyah rcilung Paru mquri Xacar Eynan ayus Darmeseq. Quri daya we Xamat ka ayus na. Nii ka ayus quri daya.
18Ayus quri nklaan hido we, gaga cenga Xawran ma Darmeseq, cenga Gilad ma Israel, yayung Yarden ka ayus na. Smeung namu ayus we, asi ka betaq rcilung nklaan hido. Ayus quri nklaan hido ka nii.
19Ayus quri toma we, peeyah Tamar betaq qsiya Meribah gaga Qades. Mooda ayu rcilung Micrayim, betaq rcilung Paru. Ayus quri tgtruma ka nii.
20Ayus quri pryaxan hido we, kiya ka paru Rcilung, peeyah ayus toma betaq sipo tmayan Xamat. Ayus quri pryaxan hido ka nii.
21Asi ka spuyu namu pnswayan rudan Israel psaasu dxeral nii. 22Asi namu ka spooda blebil qreti maasu ka dxeral ngalun pusu dnoi nii. Bbege yamu nanak ma, dseediq tnooda yamu hiya ma, dlqlaqi tnlaqi seediq icil. Asi ka ngalun namu seediq Israel mntuting dxeral hini mita ka dheya. Mntena yamu mangal pusu dnoi meeniq ckceka pnswayan rudan Israel ka dheya. 23Tnooda pnswayan rudan inu ka dheya we, asi namu ka pssugun dxeral hiya ka dheya. Rnengo Utux Tmninun Bukung ka nii.”
Currently Selected:
Yexejqel 47: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
