Yexejqel 45
45
Dxeral Bege Utux Tmninun
1Spooda namu blebil qreti maasu dxeral ciida, asi namu ka mege duma dxeral bbege namu Utux Tmninun. Knlaban na we 2 mang 50'00 sese, qndisan we 2 mang. Ngali dxeral mrtaso kana ka dxeral nii. 2Dungal we mangal namu nniqan mrtaso ka 1 dxeral, knlaban na we 5'00 sese, qndisan we 5'00 sese, mntena knuglahang niya. Prbangun 50 sese dungal ka dxeral ssiyo nganguc na. 3Peeyah dxeral nii dai matis 2 mang 50'00 sese knlaban ma, qndisan na we 1 mang dxeral. Ckceka na hiya we pniqun nniqan mrtaso, kiya mrtaso riyung. 4Mrtaso bale dxeral meeniq bobo dxeral ka nii. Kiya ka sbege msapuh mqeepah nniqan mrtaso, mpsdaling meepah Utux Tmninun. Ngalun daha sapah daha, nniqan mrtaso ma, dxeral mrtaso kiya. 5Msngari na 2 mang 50'00 sese knlabang ma, 1 mang sese qndisan we, asi ka sbege seediq Lewiy mqeepah sapah thmkuwan kiya. Kiya ka pusu dnoi daha ssmalu 20 sapah nniqan daha.
6Ssiyo dxeral mrtaso nii we, asi namu ka smalu dxeral ssmalu namu alang, qndisan na we 50'00 sese ma, knlabang na we 2 mang 50'00 sese sbege kana sapah Israel.
Dxeral Qbsuran Paru
7Smlei dxeral qbsuran paru we meeniq ssiyo dxeral mrtaso ma dxeral ssmalu sapah. Mquri berah dxeral mrtaso ma, mquri dxeral ssmalu sapah uri. Peeyay pryaxan hido betaq mquri pryaxan hido ma, peeyah nklaan hido betaq mquri nklaan hido. Peeyah pryaxan hido betaq nklaan hido, ida mntena nsugan knkingal pnswayan rudan ka knlahang na. 8Nii ka dxeral qbsuran paru gaga ckceka Israel. Dqbsuran paru mu we uxe mpnpusal tmraqil seediq mu. Mpuyu pnswayan rudan sapah Israel sugan na ka dxeral.
Gaya Pyugun Qbsuran Paru
9Rmengo so nii kari ka Utux Tmninun Bukung: “Dqbsuran paru Israel! Baka di! Laxi ka tmraqil ma ooda gmeeluk, dai ka ini psaanak ma msderux noda, iya mpnpusal smdurak mesa seediq mu. Rnengo Utux Tmninun ka nii.
10Yamu we doi bale ba seengan, bale ba igipa ma, bale ba bati. 11Pntnaun ka kneegu igipa ma bati. Kneegu 1 bati we 1 tnugmxalan hmeyu. 1 igipa we 1 tnugmxalan hmeyu uri. Asi ka dmoi hmeyu smeung kana. 121 skere we 20 kira. 20 skere, 25 skere ma 15 skere, spengun kana de, 1 mina.
13Bbege namu snapuh we so nii: 1 hmeyu mugi we asi namu ka mege 1 mnugtruwan igipa. 1 hmeyu mugi paru we asi namu ka mege 1 mnugtruwan igipa. 14Gaya pndakar bbege abura we so nii, asi ka spuyu bati smeung abura: Knkingal koru abura we, kiya ka 10 bati, uxe uri we 1 hmeyu asi ka mege 1 tnugmxalan bati. Ado 10 bati we mntena 1 hmeyu. 15Peeyah speriq Israel niqan msngari qsiya hiya, ckceka 200 miric we, asi ka mege namu 1 wawa miric. Nii we tduwa ngalun snapuh bnege pnhgalang, snapuh psqmaun ma, snapuh ptbale psruwa qnquwan noda seediq. Rnengo Utux Tmninun Bukung ka nii. 16Kana seediq dxeral nii we, asi ka madis bbege nii mosa qbsuran paru Israel hiya. 17Qpahun qbsuran paru we, kiya ka meeniq ali smseman, ali prading idas, ali sngayan, kiya ka kana pssliyan mrahur kana sapah Israel. Ciida asi ka mege namu snapuh psqmaun, snapuh ptbale, snapuh sino. Heya we asi ka mege snapuh psruwa qnquwan noda, snapuh bnege pnhgalang, snapuh psqmaun ma, snapuh ptbale mooda psruwa qnquwan noda sapah Israel.
Ali Smseman
18Rnengo so nii ka Utux Tmninun Bukung: 1 ali 1 idas ciida, asi su ka mangal 1 dapa balas uka luqah na mooda prtaso sapah thmkuwan. 19Msapuh we ngali duma dara snapuh tnbugan sani rmicuh eruc rhengun sapah thmkuwan ma 4 muxi spilan spuhan ma, baang eruc rhengun nganguc tgtruma. 207 ali ida idas ciida, asi su ka mooda ririh qnquwan noda uxe daha nseung ma, ini daha klai. Asi namu ka moda psruwa qnquwan noda sapah thmkuwan.
2114 ali 1 idas ciida, asi su ka moda smseman hrnasan. Mk7 ali ka smseman we, mooda namu mekan pang ini psai tgeda. 22Ali ciida, qbsuran paru we, ririh heya nana ma, kana seediq qlhangan na we, asi ka psramal 1 dapa balas ngalun na snapuh psruwa qnquwan noda. 23Mk7 ali nii we, asi namu ka psramal 7 dapa balas, 7 miric rudu uka luqah ka snapuh qnquwan noda bege namu Utux Tmninun klaali. Klaali uri we, asi namu ka psramal 1 baus miric ngalun snapuh psruwa qnquwan noda. 24Asi ka psramal snapuh bnege pnhgalang mege 1 dapa balas, pspuun mege 1 igipa nemu mugi. Mege 1 miric rudu we, pspuun mege 1 igipa nemu mugi, pnkingal igipa we prnaun 1 sin abura. 25Smseman 15 ali 7 idas ciida, mk7 ali nii we, asi ka mntena so nii psramal snapuh psruwa qnquwan noda, snapuh psqmaun, snapuh bnege pnhgalang ma, abura.”
Currently Selected:
Yexejqel 45: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
