Yexejqel 44
44
Ddoi Rhengun Nklaan Hido
1Heya we pbrnahun ku na maadis nganguc rhengun quri nklaan hido sapah thmkuwan de meluk ka rhengun. 2Rmengo kenan ka Utux Tmninun: “Asi ka lebun ka rhengun nii, iya rwahi. Ani ima, iya teme peeyah hini. Ado wada mremux peeyah hini ka Utux Tmninun, Utux Baro nuIsrael. Kiya de, asi ka lebun. 3Quri so qbsuran paru we, asi ka tleung tluungan qbsuran paru ka heya ma, mekan pang berah Utux Tmninun. Heya we asi ka mremux peeyah rhengun nii ma asi ka moda rhengun nii mlatac uri.”
Gaya Tteme Sapah Thmkuwan
4Heya we desun ku na mooda rhengun daya ma mosa berah sapah thmkuwan. Qmita ku. Qtai! Stenge ckceka sapah thmkuwan Utux Tmninun ka ledax Utux Tmninun. Kiya de asi ku tgtemaq dxeral ka dqeras mu. 5Rmengo kenan ka Utux Tmninun: “Laqi seediq! Kana rnengo mu kari pndakar ma gaya sunan meeniq ckceka sapah thmkuwan Utux Tmninun we, asi su ka qmlahang lhebun, qtai doriq, pdai birac mbahang. Asi su ka qmlahang mremux sapah thmkuwan ma, kana lntadan peeyah sapah thmkuwan. 6Rngagi ka sapah Israel mptbrinah. Rmnengo so nii ka Utux Tmninun Bukung: Sapah Israel! Kana pqnqihun noda namu we, baka di! 7Smapuh namu siyang ma dara uqun mu ciida, sbege namu dseediq icil ini ooda ptgaya psalak ka lhebun ma heyi namu ma, prmuxun namu sapah thmkuwan mu ma, psrutiq sapah thmkuwan mu. Mnoda namu kana pqnqihun noda ma, tbrinah namu pnsdhegan mu. 8Ini namu pqpahi ka qpahun qmlahang mrtaso qyqeya mu ma, seediq icil qlhangan ka spririh namu pqeepah qpahun sapah thmkuwan.
9Rnengo so nii ka Utux Tmninun Bukung: Kana seediq icil ini oda ptgaya psalak, kiya ka dseediq icil gaga meeniq ckceka seediq Israel we, ini tduwa mremux sapah mrtaso mu kana.
Seediq Lewiy Ini Tduwa Ma Msapuh
10Mgeedang ciida ka seediq Israel we, smtheya kenan ka seediq Lewiy. Smnegul tikung daha mgeedang mlatac kenan ka dheya. Dheya we asi ka mheal qnquwan noda daha nanak. 11Asi ka mpquli sapah mrtaso mu ma, mpqlahang rhengun sapah thmkuwan ma, mqeepah ckceka sapah thmkuwan ka dheya. Mooda phuqil snapuh psqama tnbugan ma, duma snapuh tnbugan dseediq ma, mpheyu berah seediq ma mdayo seediq ka dheya. 12Ado dseediq Lewiy nii we qneepah berah tikung, kiya ka btunux mptakur qnquwan noda sapah Israel. Manu so kiya, mpsdehu ku dheya: Asi ka mheal qnquwan noda daha ka dheya nanak. Rnengo Utux Tmninun Bukung ka nii. 13Dheya we ini tduwa smdaling kenan ma, ma msapuh mu qmeepah kenan. Ini tduwa smdaling tmelung kana mrtaso qyqeya mu, kiya ka qyqeya mrtaso. Dheya we asi ka mapa qnsiqa daha ma, cniyuk pqnqihun noda daha. 14Mpskagul ku dheya mosa qmlahang sapah Thmkuwan ma, meepah kana ddaun ma mooda kana oda.
Msapuh Sapah Lewiy
15Mgeedang mlatac kenan ka seediq Israel ciida, dmsapuh ka seediq Lewiy pneyah mllutuc laqi Cadoq we wada dehuk qmeepah qpahun sapah thmkuwan. Kiya ka dheya nii we mtduwa meyah smdaling kenan ma, qmeepah kenan. Dungal we mpheyu berah mu mbege siyang ma dara kenan. Rnengo Utux Tmninun Bukung ka nii. 16Wano dheya ka tduwa mremux nniqan mrtaso mu, meyah berah spilan mu meepah kenan ma, meepah qpahan tnugsaan mu. 17Mpteme rhengun nganguc tgtruma ka dheya we asi ka mlukus tninun malu nuqah pstrmaun. Qmeepah rhengun nganguc tgtruma ma truma sapah thmkuwan ka dheya we, ini tduwa mlukus tninun ubal. 18Pkbunuh tninun malu nuqah ka tunux ma, hwinuk we asi ka mkribul ribul tninun malu nuqah. Ini tduwa mlukus lukus so maha mtmering. 19So maha nganguc gaga niqan seediq ka dheya ciida we, asi ka lhlahun ka lukus gaga daha plkusun, psaun daha nniqan truma mrtaso hiya ma, mlukus duma na hiya lukus. So uxe ririh lukus daha ruun knrtaso lukus nii ka seediq. 20Ini tduwa kmugus snuunux ka dheya. Ini tduwa sgcuqi bbaro ka snuunux daha uri. Asi ka ndwaun smeqic ka snuunux. 21Mpteme nganguc tgtruma ka msapuh we ini tduwa mimah sino. 22Ini tduwa mangal mqedil mqrinuc ma mqedil nlaxan ka dheya. Asi ka weewa ini osa rseno lqlaqi mslutuc Israel ma, mqedil mqrinuc msapuh ka tduwa daha ngalun. 23Dheya we asi ka mnduwa ptaanak tmgesa mrtaso ma rutiq, mrutiq ma ini qrutiq. 24Niqan ka pprngaun daha we, asi ka moda mpprengo. Mpuyu gaya bneku mu moda psgao. Meeniq smseman mu ka dheya we, asi ka muyu gaya ma kari pndakar mu. Dungal we asi ka ngalun daha ali mrtaso ka ali sngayan mu. 25Iya smdaling seediq mnhuqil psrutiq heyi daha. Wano ba quri tama, bubu, laqi rseno, laqi mqedil, mtswai rseno ma, mtswai mqedil ini osa seediq nanak we ani psrutiq dheya kiya. 26Bobo bgurah ka heya de, asi ka smepu mk7 ali na. 27Mremux nganguc tgtruma, mosa nniqan mrtaso, ali meepah nniqan mrtaso ka heya we, asi ka mege snapuh psruwa qnquwan noda heya nanak. Rnengo Utux Tmninun Bukung ka nii.
28Ida asi ka niqan pusu dnoi daha ka msapuh. Yaku ka pusu dnoi daha. Iya biqi pusu dnoi meeniq ckceka Israel ka dheya. Yaku ka pusu dnoi daha. 29Tduwa mekan snapuh bnege pnhgalang, snapuh psruwa qnquwan noda ma, sapuh prtaso qnquwan ka dheya. Kana snapuh bbege daha betaq ani knuwan ckceka Israel we ida ndheya kana. 30Kana malu pnlaale mghei, tgmalu ba kana ckceka bnege daha snapuh we, ida sbege msapuh kana. Asi namu ka sbege msapuh ka pnlale bale nemu mugi namu. Kiya de meeyah sapah namu ka smbleqan. 31Ani qbheni ma camac, kana mnhuqil nanak, uxe uri we wada sgliqan phuqil we, iya bale uqi msapuh.”
Currently Selected:
Yexejqel 44: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
