Yexejqel 43
43
Mpbrinah Sapah Thmkuwan ka Utux Tmninun
1Bobo na nii, heya we maadis kenan rhengun quri nklaan hido. 2Qtai! Peeyah nklaan hido ka ledax Utux Baro nuIsrael. Mntena so hrenang paru qsiya ma lmedax pnrdaxan na ka dxeral. 3Qtaan mu ka so tuutux nii we mntena so qntaan mu mneyah pkuuka alang nii ka heya ciida, dungal we tuutux mntena so qntaan mu ssiyo yayung Kebar. Kiya de asi ku tgtemaq dxeral ka dqeras mu. 4Peeyah rhengun quri nklaan hido mremux sapah thmkuwan ka ledax Utux Tmninun. 5Bgihur we ptutui kenan ma maadis kenan nganguc tgtruma hiya. Qtai! Stngayan ledax Utux Tmninun ka sapah thmkuwan.
6Qbhangan mu rmengo kenan peeyah sapah thmkuwan ma, mheyu ssiyo mu ka 1 seediq. 7Rmengo kenan ka heya: “Laqi seediq! Dxeral tluungan mu ka nii ma, dxeral spilan qapal papak mu ka nii. Meeniq ku hini, meeniq ku ckceka seediq Israel betaq ani knuwan. Uxe mpnpusal mooda mmhemuc msuupu ka sapah Israel ma dqbsuran paru daha. Uxe uri we smrutiq ngayan mu psaun daha tgbaro ka bqerus qbsuran paru daha. 8Dheya ge, pniqun daha ssiyo rhengun mu ka rhengun daha ma, phyegun daha ssiyo eruc rhengun mu ka eruc rhengun daha. Wano qnabil nanak ka cenga mu ma dheya. Kiya de mnoda pqnqihun qneepah daha wada smrutiq ngayan mrtaso mu. Kiya ka mseang ku ma pkuuka ka dheya. 9Saya, asi ka smtheya mmhemuc msuupu ma bqerus qbsuran paru peeyah berah mu ka dheya. Kiya ka meeniq ku ckceka daha betaq ani knuwan.
10Isu, laqi seediq! Spqita mu sapah Israel ka sapah thmkuwan nii. So maha smeung knparu nii de, ririh qnquwan noda daha mpqsiqa ka dheya. 11Nasi msiqa ndaan daha kana ka dheya de pgklai dheya ka snlayan sapah thmkuwan, pnhyegan, smnlean, ltadan, tmayan, dungal we quri so pndakar so kana gaya, pndakar ma, pnugaya dheya. Ptsani berah daha ka nii ma pygaani so kana phyegan ma gaya psmlei ka dheya. 12Gaya sapah thmkuwan ka nii: Mtqiri kana bungu dgiyaq nii we mrtaso bale dxeral. Qtai! Gaya sapah thmkuwan ka nii.
Spuhan
13So nii ka knparu spuhan, seung sese, kiya ka kingal sese ma, kingal karuk sese. Tnugkadan spilan spuhan we 1 sese, qndisan ssiyo we 1 sese. Tnugkadan pnsaayu mtqiri we 1 qango. Kiya ka spilan spuhan ka nii. 14Peeyah spilan, tgtruma ba tntunan ka tnugkadan na we 2 sese, qndisan ssiyo we 1 sese. Tgceka peeyah tgbiciq betaq tgparu tntunan ka tnugkadan na we 4 sese, qndisan ssiyo we 1 sese. 15Tnugkadan tgbaro ba tntunan spilan psqmaan smapuh tnbugan we 4 sese, peeyah spilan psqmaan mquri 4 muxi spuhan criyu ka 4 urung. 16Knlabang spilan psqmaan we 12 sese, qndisan we 12 sese ma, 4 ka baang na mntena kana. 17Knlabang eruc spilan psqmaan we 14 sese, qndisan we 14 sese ma, 4 ka baang na mntena kana. Pnsaayu mtqiri ka tnugkadan we dmeka sese. Saan taalu baro ka spuhan we 1 sese. Niqan ka tnunan mgkala elu mquri nklaan hido.”
Mege Spuhan
18Rmengo kenan ka heya: “Laqi seediq! Rmnengo so nii ka Utux Tmninun Bukung: So nii ka gaya bbege namu psqama snapuh bobo hiya ma, reesun namu bobo hiya ka dara: 19Asi su ka sbege snapuh psruwa qnquwan noda ka 1 wawa dapa balas. Biqi dmsapuh tnsapah Lewiy lqlaqi mslutuc Cadoq ka mtduwa smdaling qmeepah kenan. Rnengo Utux Tmninun Bukung ka nii. 20Aangal duma dara wawa dapa balas kiya, rcuhi ka 4 urung, muxi spuhan ma ayu mtqiri spuhan. Asi su ka moda pkbgurah spuhan ma psruwa qnquwan noda spuhan ka isu. 21Dungal we asi su ka psqmaun nganguc sapah mrtaso ka dapa balas snapuh psruwa qnquwan noda kiya. Kiya ka pnsramal psqmaan hiya. 22Tg2 ali, asi su ka sbege snapuh psruwa qnquwan noda ka dapa balas uka luqah. Mooda psbgurah spuhan, mntena so bgurah ka dapa balas. 23Mnhedu su pkrtaso spuhan de, asi su ka mangal 1 wawa dapa balas uka luqah ma, 1 baus miric rudu uka luqah. 24Sbege su berah Utux Tmninun. Msapuh we murus timu bobo niya, ngalun na snapuh psqama bbege na Utux Tmninun. 25Tgberah mk7 ali, asi su ka mege 1 baus miric klaali. Dungal we asi su ka mege 1 wawa dapa balas ma 1 baus miric rudu meeniq rahul miric. Kana nii we asi ka uka luqah. 26Tgberah mk7 ali we, asi ka moda psruwa qnquwan noda spuhan nii ka msapuh. Psbgurah ma psnakun na prtaso ka spuhan. 27Mttuku 7 ali de, bobo peeyah mk8 ali, mbege snapuh psqmaan ma snapuh ptbale bobo spuhan nii ka msapuh. Kiya de qrasun maku maangal ka yamu. Rnengo Utux Tmninun Bukung ka nii.”
Currently Selected:
Yexejqel 43: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
