Yexejqel 42
42
Sapah Ssiyo Sapah Thmkuwan
1Heya we desun ku na nganguc mquri nami tgtruma daya ma, desun ku na mremux 1 nniqan. 1 we mquri dxeral uka ani manu ma, 1 we mquri nniqan tgdaya. 2Knlabang tgberah nii we 100 sese ma, qndisan we 50 sese, niqan ka rhengun mquri tgdaya. 3Mquri nganguc toma we 20 sese, dungal we mquri nganguc dxeral btunux. Niqan sbesuk mquri sbesuk ka tg3 tnunan sapah. 4Berah nniqan nii we niqan kingal ooda, qndisan na we 10 sese. Mquri toma na we niqan 1 sese ka qndisan na elu. Mquri tgdaya ka rhengun sapah. 5Wada ngalun sbesuk ka duma nniqan. Kiya ka dmudul msdgehing pntnaun tnunan ckceka ma tgtruma ka nniqan tgbaro. 6Ado 3 tntunan ka sapah nniqan nii ma, ini daani so eruc nganguc ka lmekoh. Kika de sapah pnheyu nii we asi speeyah toma mquri baro, kiya ka dmudul msdgehing mquri baro. 7Niqan ka pnharac qnabil mskiyi sapah osa quri nganguc tgbukuy. Knbragan na we 50 sese. Gaga berah sapah ma, ini msderux nniqan mquri nganguc na. 8Knbragan nniqan gaga mquri nganguc tgbukuy we 50 sese. Qtai! Knbragan mquri sapah thmkuwan we 100 sese. 9Truma nniqan nii we mtduwa tmayan peeyah nganguc tgbukuy ma gaga quri nklaan hido hiya ka rhengun. 10Qndisan na we mntena so pnharac nganguc. Niqan nniqan ka mquri nklaan hido. 1 we mquri dxeral uka ani manu ma, 1 we mquri sapah. 11Elu berah nniqan nii we mntena elu nniqan gaga daya. Ida mntena kana ka knlahang, qndisan ma, ltadan, snlmean ma, rhengun. 12Prdingan elu gaga nklaan hido we, gisu mquri qnabil niqan rhengun tduwa mremux. Mntena rhengun nniqan gaga mquri tgtruma.
13Rmengo kenan ka heya: “Mrtaso nniqan kana ka nniqan mquri dxeral uka ani manu mquri toma ma sapah daya. Msapuh smdaling Utux Tmninun we, asi ka mekan uqun mrtaso hiya. Asi ka psaun daha hiya ka qyqeya mrtaso. Kiya ka snapuh bnege pnhgalang, snapuh psruwa qnquwan noda ma, snapuh prtaso qnquwan noda. Kiya ka kesun mrtaso ka nniqan nii. 14Mnosa mremux truma sapah thmkuwan ka dmsapuh, meeyah namu nganguc de, ini tduwa asi usa nganguc. Asi namu ka psaun hini ka lukus pnlukus namu. Ado lukus mrtaso ka nii. Asi ka mlukus namu kingal nanak ka tduwa namu mosa gaga niqan seediq.”
Qndisan Mtqiri Sapah Thmkuwan
15Mnhedu smeung toma nganguc sapah thmkuwan ka heya de, desun ku na mquri rhengun nklaan hido. Mosa miyan smeung qndisan mtqiri sapah Thmkuwan. 16Seengun na qreti brhengil ka quri nklaan hido we 5'00 qreti. 17Dungal we dmoi qreti brhengil mosa smeung mquri daya we 5'00 qreti. 18Dungal we dmoi qreti brhengil mosa smeung mquri toma we 5'00 qreti. 19Dungal we mquri pryaxan hido, dmoi qreti brhengil seengan na we 5'00 qreti. 20Daan na smeung ka qnalang mtqiri we 5'00 qreti ka knuglahang, qdisan na we 5'00 qreti. Ida niqan qnalang ka mtqiri, kiya psaanak nniqan seediq ma mrtaso.
Currently Selected:
Yexejqel 42: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
