Yexejqel 40
40
Qnita so Utux Bgurah Sapah Thmkuwan (40:1-48:35)
Desun Yerusalem ka Yexejqel
1Prading tg25 knkawas bobo qmnerac menan, pkelu 10 ali prading idas, bobo tg14 knkawas wada ngalun ka alang Yerusalem ciida, meyah kenan ka baga Utux Tmninun ma desun ku na hiya. 2Meeniq ku ckceka tuutux Utux Baro we, desun ku na dxeral Israel ma, pniqun ku na bungu bbaro ba dgiyaq. Meeniq tgtruma na hiya ka so 1 alang snmalu. 3Desun ku na hiya, qtai! Niqan 1 seediq. Mntena snmalu limuk ka hnyegan na. Dmoi qreti brhengil snuyuk nuqah ma dmoi seengan ka baga na ma mheyu rhengun hiya. 4Rmengo kenan ka seediq kiya: “Laqi seediq! Kana tnsaan misu we, qtai bale doriq ma, bhangi riyung birac, kiya uri we peeniq bale lhebun su. Saadis misu hini we ppqita mu sunan. Kana ntaan su we rrngaani sapah Israel kana.”
Rhengun Nklaan Hido
5Qtai! Sapah Thmkuwan we gaga ptqriyan qnalang. Dmoi qreti brhengil 6 sese knbragan pblangun na 1 karuk sese ka pnkingal sese. Smeung qnalang ka heya we, 1 qreti qndisan ma 1 qreti tnugkadan. 6Mosa quri rhengun nklaan hido ka heya. Mnkala elu tntunan mharac ma, seengun na ka rhengun tmayan we 1 qreti qndisan. 7Dungal we sapah qbrangan we, 1 qreti knuglahang ma 1 qreti qndisan. Qnabil ccenga sapah qbrangan we 5 sese. Hrnasan ma mooda rhengun sbesuk. Rhengun sbesuk nii we mquri sapah thmkuwan we 1 qreti. 8Seengun na ka rhengun sbesuk mquri sapah thmkuwan we 1 qreti. 9Sbesuk rhengun we 8 sese. Eruc qnabil we 2 sese. Sbesuk rhengun nii we mquri sapah thmkuwan hiya. 10Mquri rhengun nklaan hido we niqan sapah qbrangan: 3 nniqan ka hini ma, 3 nniqan ka hiya ma, ida mntena kana ka knpruwan na ma mntena ka kndlexan ccenga na. 11Smeung ttmayan rhengun we 10 sese qndisan, knbragan rhengun we 13 sese. 12Qnalang llebu gaga berah sapah qbrangan we 1 sese. Qnalang llebu hiya we 1 sese uri. Sapah qbrangan hini we 6 sese ma, quri so hiya we 6 sese uri. 13Seengun na ka rhengun, peeyah dnamux sapah qbrangan hini ma betaq dnamux hiya we, 25 sese qndisan. Mbbege berah ka rrhengun. 14Sneung na eruc qnabil we 60 sese. Mtqiri so nganguc we niqan ka rhengun gaga smdaling eruc qnabil. 15Peeyah berah rhengun tmayan, betaq berah sbesuk rhengun we 50 sese. 16Gaga pniqan beling ka sapah qbrangan ma cenga eruc mtqiri tgtruma rhengun ma, mtqiri tgtruma sbesuk. Niqan blingan kana ka truma. Eruc qnabil we gaga gqeran matis sbiki paru.
Nganguc Tgbukuy
17Desun ku na nganguc tgbukuy. Qtai! Gaga mtqiri nganguc ka sapah ma, spagan btunux ka nganguc. Gaga mtqiri nganguc snpagan btunux ka 30 sapah. 18Snpagan btunux we gaga ssiyo rhengun we, kiya ka dxeral snpagan btunux toma ka nii, mntena knbragan rhengun. 19Smeung knuglahang peeyah berah rhengun toma betaq berah nganguc tgtruma, kiya ka peeyah nklaan hido mquri tgbaro we 100 sese.
Rhengun Tgdaya
20Smeung knbragan ma qnlahang rhengun tgdaya gaga nganguc tgbukuy ka hiya. 21Niqan rhengun ka sapah qbrangan, hini we 3 nniqan, hiya we 3 nniqan. Knbragan eruc qnabil, sbesuk ma, rhengun tgkingal we mntena 50 sese knbragan na ma, 25 sese qndisan na. 22Beling, sbesuk ma sbiki paru gnqeran matis we ida mntena knbragan rhengun gaga nklaan hido. Ado ka mnkala 7 tntunan pnhuradan elu baro de kiya ka tduwa mremux rhengun nii. Berah na we niqan sbesuk. 23Mbbege berah ka rhengun nganguc tgtruma ma rhengun nii. Ida so kiya ka rhengun gaga tgbaro ma nklaan hido. Smeung peeyah rhengun nii betaq rhengun hiya we, 100 sese.
Rhengun Tgtruma
24Desun ku na quri tgtruma. Qtai! Niqan rhengun ka mquri tgruma. Smeung eruc qnabil ma sbesuk we, ida mntena knparu na tgberah. 25Ssiyo rhengun ma sbesuk we niqan beling kana. Mntena blingan snengan tgberah kana. Knbragan rhengun we 50 sese, 25 ka qndisan na. 26Mpnkala hiya we niqan 7 tntunan pnhuradan elu ma gaga hiya ka sbesuk. Eruc qnabil bbaang na we gaga gqeran matis sbiki paru. 27Gaga nganguc tgtruma hiya ka rhengun mquri tgtruma. Seengun ka peeyah rhengun betaq rhengun mqquri toma we 100 sese.
Rhengun Truma Nganguc Tgruwan
28Desun ku na peeyah rhengun toma nganguc tgtruma. Smeung rhengun toma ka heya ma, mntena knbragan rhengun tgberah. 29Sapah qbrangan, eruc qnabil ma, sbesuk we ida mntena knbragan tgberah. Rhengun ma mtqiri we niqan beling kana. Knbragan rhengun we 50 sese, qndisan we 25 sese. 30Niqan sbesuk ka mtqiri hiya, knbragan na we 25 sese, qndisan na we 5 sese. 31Mqquri nganguc tgbukuy ka sbesuk nii ma, gqeran sbiki paru ka eruc qnabil. Asi ka mgkala 8 tnunan pnhuradan ka elu na, kiya ka tduwa mremux rhengun nii.
Rhengun Nklaan Hido Nganguc Tgtruwan
32Desun ku na quri nklaan hido nganguc tgtruma ka yaku. Seengun na ka rhengun ma knbragan na we ida mntena rhengun tgberah. 33Sapah qbrangan, eruc qnabil ma sbesuk we ida mntena knbragan tgberah. Rhengun ma mtqiri sbesuk we niqan beling. Knbragan rhengun we 50 sese ma qndisan na we 25 sese. 34Mqquri nganguc tgbukuy ka sbesuk. Gqeran sbiki paru ka eruc qnabil. Asi ka mgkala 8 tntunan pnhuradan ka elu na, kiya ka tduwa mremux rhengun nii.
Rhengun Daya Nganguc Tgruwan
35Desun ku na rhengun daya ka yaku. Seengun na ka rhengun ma knbragan na we ida mntena rhengun tgberah. 36Kiya ka snengan na sapah qbrangan, eruc qnabil ma, sbesuk. Rhengun ma mtqiri sbesuk we niqan beling. Knbragan rhengun we 50 sese ma qndisan na we 25 sese. 37Mqquri nganguc tgbukuy ka sbesuk. Gqeran sbiki paru ka eruc qnabil. Asi ka mgkala 8 tntunan pnhuradan ka elu na, kiya ka tduwa mremux rhengun nii.
Sapah Gaga Smdaling Rhengun Daya
38Gaga ssiyo eruc qnabil rhengun hiya ka nniqan ma rhengun. Snagan tnbugan ssapuh psqmaun ka hiya. 39Truma sbesuk rhengun hiya we niqan 2 ka spilan. Icil we niqan 2 spilan uri. Bobo niya ka tduwa byakan tnbugan ssapuh psqama, snapuh psruwa qnquwan noda ma, snapuh prtaso qnquwan. 40Rhengun tmayan tgdaya we, mquri nganguc hiya we niqan 2 spilan. Rhengun sbesuk icil we niqan 2 spilan uri. 41Niqan 4 tluungan ka rhengun hini ma, niqan 4 ka hiya uri. Byakun daha bobo 8 spilan nii ka tnbugan. 42Ddooyun smapuh psqama ka 4 spilan nii we snmalu btunux qnequr. Knbragan na we 1 sese dmeka ma, qndisan na we 1 sese dmeka ma, 1 sese ka tnugkadan na. Tduwa daha psaun bobo nii ka bnyakan snapuh tnbugan ma duma qyqeya doyun daha smapuh. 43Dongun daha mtqiri sbesuk toma we niqan laling 1 karuk baga qndisan. Tduwa psaan heyi tnbugan ka bobo spilan.
44Peeyah nganguc mosa toma we, niqan nniqun dseediq mpuuyas ka tgtruma nganguc. 1 we gaga meeniq ssiyo rhengun tgdaya gaga mquri. 1 we gaga meeniq ssiyo rhengun toma gaga mquri tgdaya. 45Rmengo kenan ka heya: “Nniqun mquri toma nii we dooyun dmsapuh mpqeepah sapah thmkuwan. 46Nniqun mquri daya nii we dooyun dmsapuh mpqeepah spuhan. Pnltudan lqlaqi Cadoq dseediq Lewiy ka msapuh nii. Dheya ka meeyah qmeepah berah Utux Tmninun.”
Nganguc Tgtruma ma Sapah Thmkuwan
47Smeung nganguc ka heya ma, 100 sese ka knbragan, 100 sese ka qndisan ma 2 baang. Gaga berah sapah thmkuwan ka spuhan. 48Heya we desun ku na sbesuk sapah thmkuwan ka yaku. Seengun na ka eruc qnabil sbesuk. 5 sese qndisan ka baang hini ma, 5 sese qndisan ka baang hiya. Ssiyo qnabil rhengun we 3 sese ka hini ma, 3 sese ka hiya. 49Knbragan sbesuk we 20 sese ma 11 sese ka qndisan na. Asi ka mgkala tnunan pnhuradan elu kiya ka tduwa mgkala sbesuk nii. Smdaling eruc qnabil we niqan eruc. Hini we niqan 1, hiya we niqan 1.
Currently Selected:
Yexejqel 40: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
