Yexejqel 39
39
Ini Baka Mccebu ka Gog
1“Isu, laqi seediq! Psquri Gog rmengo kari pgeela. Rengo so nii, rmnengo so nii ka Utux Tmninun Bukung: Gog qbsuran paru Mesek ma Tubal, qtai! Mpkmpais ku sunan. 2Pbrnahun misu ma ddudul misu mosa bobo ddgiyaq Israel peeyah tgbaro theya riyung. 3Ptingun mu peeyah iril baga su ka halung ma, ptingun mu peeyah narac baga su ka budi. 4Mptakur bobo ddgiyaq Israel ka isu ma supi su ma, dseediq smnegul sunan pneeyah icil qqlhangan. Pqdalun misu ani maanu qbheni ma camac bbuyu. 5Mptakur su breenux ka isu, ado rmnengo ku, rnengo Utux Tmninun Bukung ka nii. 6Mptuting ku puniq heyi seediq Magog ma seediq gaga tbleyaq qqlhangan ssiyo rcilung. Kiya ka mpkeela ka dheya, yaku ka Utux Tmninun.
7Ptuura ku ngayan mrtaso mu meeniq ckceka Israel seediq mu. Uxe mu npsalun psrutiq ka ngayan mrtaso mu. Kiya ka mpkeela ka qqlhangan, yaku ka Utux Tmninun pusu mrtaso ckceka Israel. 8Qtai! Dehuk ka ali ma, mpkeso kiya ka ooda. Kiya ka ali rnengo mu ka nii. Rnengo Utux Tmninun Bukung ka nii. 9Mlatac lualang daha ka seediq Israel mosa mtahu puniq. Mdoi qyqeya mccebu, kiya ka qeerung heyi paru, qeerung heyi biciq, halung ma budi, smbrangan qqada ma smbrangan betaq. Nii ka doyun daha psqama betaq 7 knkawas pthuun daha. 10Ani ini osa migin qhuni bbuyu ma, gmeyu qhuni nrao ka dheya. Ado qyqeya mccebu ka sptahu daha. Qyqeya wada daha hiya rngatun we rngatun daha ma, wada daha hiya gleekun maangal we gleekun daha maangal. Rnengo Utux Tmninun Bukung ka nii.
Reesun ka Gog
11Ali ciida, pniqun mu ckceka Israel ma, ayu Tndaun Seediq gaga quri nklaan hido rcilung ngalun habung Gog. Kiya ka mpsbaang dseediq mmooda hiya. Reesun seediq meeniq hiya ka Gog, ayu Hamon Gog kesun daha tmngayan ka dxeral kiya. 12Mk7 idas rmeus dheya ka dseediq sapah Israel, kiya ka psbgurah dxeral kiya. 13Reesun kana seediq meeniq hiya ka dheya. Ali mangal ku knledax ciida, ida maha mangal malu ngayan ka seediq mu. Rnengo Utux Tmninun Bukung ka nii. 14Mpskagul ku seediq mmaha mkkesa mita kana dxeral. Mooda psbgurah kana dxeral rmeus bqerus seediq mnsngari knremux bobo dxeral. 15Dseediq mooda rmigo kana dxeral we, qmita buuc seediq de mpheyu 1 pnskraya, betaq saan rmeus dseediq mreus bqerus meeniq ayu Hamon Gog. 16Hamonah kesun daha tmngayan ka 1 alang uri. Mooda psbgurah dxeral kiya ka dheya.
17Isu, laqi seediq! Rmnengo so nii ka Utux Tmninun Bukung: Rngage isu ka kklegan qbheni ma camac bbuyu: Eyah msseli ka yamu. Aguh! Aguh psseli meekan uqun pnsramal mu yamu. Kiya ka malu snapuh pnsramal ddgiyaq Israel, mpeekan heyi ma mpiimah dara yamu. 18Meekan namu heyi dsupi ma, miimah namu dara mpdudul bobo dxeral. Mntena so mekan baus miric rudu, wawa miric, baus miric ma, dapa balas. Kana nii we tnbugan Basan ka nii. 19Meekan namu snapuh pnsramal mu ma, meekan namu siyang betaq mtengi ma, miimah namu dara betaq bsukan. 20Mptengi namu mekan dapa dmay, supi mpaapa dapa dmay, dmpahung supi ma, kana supi uqan mu ka yamu. Rnengo Utux Tmninun Bukung ka nii.
Mbeyax Dungal ka Israel
21Mptuura ku knledax mu meeniq qqlhangan. Mpqita hmuwa ku poosa baga heyi daha ma mooda psgao ka qqlhangan. 22Bobo ali kiya, sapah Israel we mpkeela yaku ka Utux Tmninun, Utux Baro daha. 23Maha mkela ka qqlhangan, ririh qnquwan noda daha wada qrapun ka sapah Israel. Mooda qnquwan noda kenan ka dheya, kiya ka betaq ku mege qilu dheya ma ini qita dheya. Sbege mu baga supi ka dheya ma mtakur toma hlmadac kana ka dheya. 24Spuyu mu qnnaqah ma qnquwan noda daha cmiyuk dheya ma, mege qilu ini qita dheya.
25Rmnengo so nii ka Utux Tmninun Bukung: Saya, pbrnahun mu peeyah ka Yakobu dseediq qneraq. Mpgaalu ku kana sapah Israel. Ririh ngayan mrtaso mu mmqepah ku. 26-27Pltadun mu peeyah kana seediq ka dheya ma, plaanun mu peeyah dxeral dsupi. Mptuura ku knrtaso meeniq berah doriq qqlhangan ma meeniq heyi daha. Mpbleyaq meeniq dxeral daha nanak ka dheya ma, uka seediq ka meeyah smiicu dheya. Ciida, mpheal qnsiqa daha nanak ma kana qnquwan noda daha kenan ka dheya. 28Yaku ka pnqerac dheya mosa qqlhangan, bobo na de, yaku ka psseli dheya dungal meeyah dxeral daha nanak. Uxe ku mprangi ani 1 seediq meeniq hiya. Ciida, mpkeela ka dheya, yaku ka Utux Tmninun, Utux Baro daha. 29Uxe ku mpnpusal mege qilu ma ini qlahang dheya. Ado wada mu sheruy sapah Israel ka Bgihur mu. Rnengo Utux Tmninun Bukung ka nii.”
Currently Selected:
Yexejqel 39: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
