Yexejqel 29
29
Mseang Micrayim
112 ali 10 idas tg10 knkawas, meeyah kenan ka kari Utux Tmninun, 2“Laqi seediq! Pquri Paroh qbsuran paru Micrayim ka dqeras su ma, rngagi kari pgeela ka heya ma kana dxeral Micrayim. 3Rngage, rmnengo so kari nii ka Utux Tmninun Bukung:
Paroh, qbsuran paru Micrayim,
isu we quyu paru mksaro yayung,
qtai! Yaku we mpknpais ku sunan.
Rmnengo su: ‘Nyayung mu Yeor we nnaku,
snmalu mu yaku nanak.’
4Mpdoi ku galuk dongun mu ka bkeluy su,
psqpahun mu kukuh su ka qcurux yayung.
Isu ma kana qcurux gaga niqan kukuh we,
hgetun mu peeyah yayung meyah baro kana.
5Qada mu tadus brenux ka isu ma kana qcurux ckceka rcilung.
Mpksaro su qnpahan,
uka ka mosa smeku ma, uka ka mosa mubung.
6Maha mkela yaku we Utux Tmninun ka kana seediq Micrayim. Ado wada su mhukuc brhengil sapah Israel ka isu. 7Dmoi qapal baga ka dheya de, asi su mscilaq mu, pluqah su ahing daha. Sdahar isu ka dheya de, mgeerung su ka isu ma, skwiric ka hwinuk daha. 8Maanu so kiya de, rmengo ka Utux Tmninun Bukung: Meeyah isu ka hlmadac, meyah phuqil seediq ma tnbugan ckceka su. 9Ma tadus nlaxan ka dxeral Micrayim, kiya de mpkeela ka dheya, yaku ka Utux Tmninun.
Ado rmnengo: ‘Nnaku ka yayung Yeor, snmalu mu nanak.’ 10Maanu so kiya de, qtai! Mpknpais ku isu ma yayung su. Maha tadus nlaxan kana ka dxeral Micrayim meeyah Migdol betaq Seweneh, betaq ayus dxeral Kusu. 11Uxe daun papak seediq, uxe ksaun papak camac uri. 40 knkawas uxe niqun ani ima. 12Pktdusun mu qmada mgkala kana qqlhangan qnada ka dxeral Micrayim ma, 40 knkawas mpgkala lualang nlaxan llaxun ka lualang hiya. Pnkrehak mu ckceka dqqlhangan ma lwaqun mu dklegan seediq ka dheya.
13Rmnengo so nii ka Utux Tmninun Bukung: Bobo 40 knkawas de psliun mu peeyah dklegan seediq pnkrhepan mu ka seediq Micrayim. 14Mpbrinah meeyah ka dseediq Micrayim qnerac. Pbrnahun mu Patros pnyahan daha. Meeniq hiya, mpqlhangan so biciq ka dheya. 15Mptgtruma kana qlhangan ka dheya ma, uxe meeniq baro daha. Ngalun mu biciq ba qlhangan ma, uxe mpqlahang dqlhangan ka heya. 16Uxe stmaun sapah Israel ka Micrayim. Kiya we mplngelung qnquwan noda daha sntama Micrayim ka sapah Israel. Kiya de mpkeela ka dheya, yaku we Utux Tmninun Bukung.”
Mpcebu Micrayim ka Nebukadnecar
171 ali 1 idas tg27 knkawas, meeyah kenan ka kari Utux Tmninun, rmengo, 18“Laqi seediq! Smkagul supi na mpkbeyax mccebu Cor ka Nebukadnecar qbsuran paru Babirun. Kiya de maareq ka tunux ma, mqrehaq ka ahing daha. Ani so nii, heya ma supi na ge, uka ba snadu daha ani mseme ba mccebu daha Cor. 19Maanu so kiya de, rmnengo so nii ka Utux Tmninun Bukung: Bege mu Nebukadnecar qbsuran paru Babirun ka dxeral Micrayim. Mpgeluk qyqeya daha ka heya ma, mpgeluk gnlekan daha ka heya. Snadu bbege na supi na ka qyqeya gnlekan na. 20Mege mu heya ka dxeral Micrayim, ssadu mu heya. Ado dmayo kenan ka dheya. Rmnengo so nii ka Utux Tmninun Bukung.
21Ali ciida, pkpruun mu paru ka sapah Israel, dungal we mpragoh ku isu, Yexejqel quwaq su meeniq ckceka daha. Kiya de mpkeela ka dheya, yaku ka Utux Tmninun.”
Currently Selected:
Yexejqel 29: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
