Yexejqel 30
30
Mpkdira Micrayim ka Utux Tmninun
1Meeyah kenan ka kari Utux Tmninun, rmengo, 2“Laqi seediq! Rengo kari pgeela. Rengo so nii, rmnengo so nii ka Utux Tmninun Bukung:
So smtali ka ali nii! Asi namu ka lmingis ka yamu,
3ado smdaling ka ali,
smdaling ka ali Utux Tmninun,
ali plabu ka kiya,
ali pkdira dqlhangan ka kiya.
4Meeyah Micrayim ka hlmadac.
Mksaro Micrayim ka dseediq pnhuqil de,
mkrkerang miicu ka Kusu.
Rngatun heya maangal ka qnbleqan Micrayim,
hrahun heya ka pnsaan pusu daha.
5Msuupu dheya mptakur toma hlmadac ka seediq Kusu, Put, Lud, Arab ma Kub.
6Rmnengo so nii ka Utux Tmninun:
Mpktakur ka dmayo Micrayim,
mpsbiciq ka beyax ttndahu Micrayim,
dseediq peeyah Migdol betaq Seweneh we, mptakur toma hlmadac.
Rmnengo Utux Tmninun Bukung ka nii.
7Pktdusun qmada mgkala qqlhangan qnada ka Micrayim,
mgkala lualang nlaxan, laxun ka lualang na.
8Psqmaun mu puniq ka Micrayim,
mpkuuka ka kana dmnayo Micrayim.
Ali ciida, mpkeela ka dheya, yaku ka Utux Tmninun.
9Betaq ali ciida, mooda berah mu mpaapa asu mosa ka snkgulan. Kiya ka mpsklui seediq Kusu ini kela ali. Meeyah ka ali mqraqil Micrayim de, ida meeyah dheya ka mqraqil uri. Qtai! Smdaling ka ooda nii di!
10Rmnengo so nii ka Utux Tmninun Bukung:
Mpooda ku baga Nebukadnecar qbsuran paru Babirun,
mpkuuka ku supi Micrayim.
11Heya ma dseediq smnegul heya we,
kiya ka dseediq tmraqil riyung meeniq dqlhangan,
dheya ka meeyah mpkuuka dxeral nii,
dheya ka mphgeluq hlmadac mccebu Micrayim,
pqhdeun dseediq pnhuqil ka dxeral hiya.
12Dngeun mu ka yayung,
bbrigun mu baga naqah seediq ka dxeral nii.
Mooda baga seediq icil qlhangan,
laxun ka dxeral nii ma kana mneeniq hiya.
Rnengo yaku, Utux Tmninun ka nii.
13Rmnengo so nii ka Utux Tmninun Bukung:
Pstmaqun mu ka tikung,
pqhdeun pkuuka mu ka tikung peeyah Nop.
Mpkuuka ka qbsuran paru pneeyah dxeral Micrayim,
biqun mu kkiicu daha ka dseediq meeniq dxeral Micrayim.
14Llaxun mu ka Patros,
psqmaun mu puniq ka Coan,
mpkdira ku No.
15Mpheri ku Sin ka seang mu,
meeniq bobo qbrangan Micrayim,
mphuqil ku seediq No.
16Psqama ku Micrayim,
mpqraqil ku riyung Sin,
qtmaqun mu mccebu ka No,
yahun mccebu pais klaali ka Nop.
17Phqilun toma hlmadac ka rsriso Awen ma Pibeset,
qrapun maadis ka dlualang nii.
18Pstemaq ku kudo Micrayim meeniq Taxpanxes hiya,
mpkuuka ka beyax stndahu na.
Ali ciida, mpkeeman ka hido.
Quri so alang nii we, bungun knedux plabu,
maha qrapun maadis ka lualang ssiyo hiya.
19So nii pkdira mu Micrayim,
kiya de mpkeela ka dheya, yaku ka Utux Tmninun.”
Mprukan ka Qbsuran Paru Micrayim
207 ali 1 idas tg11 knkawas, meeyah kenan ka kari Utux Tmninun, rmengo, 21“Laqi seediq! Wada mu gremun ka sese hiqur baga Paroh qbsuran paru Micrayim. Qtai! Ini lbui iyu ka heya. Uka ka mosa lmabu luqah na, kiya ka tduwa pkbeyax heya mdoi hlmadac. 22Maanu so kiya de, rmengo so nii ka Utux Tmninun Bukung: Qtai! Kmpais ku Paroh qbsuran paru Micrayim ka yaku. Mpgerung ku hiqur baga na, mpgerung ku mbeyax na ma, mnangal luqah na. Hlmadac daha we ptingun mu peeyah ckceka baga daha. 23Mpkrehak dqlhangan ka seediq Micrayim, lwaqun mu ckceka qqlhangan. 24Pkbyaxun mu ka hiqur baga qbsuran paru Babirun ma, bege mu baga na ka hlmadac mu. Kiya we, gremun mu ka hiqur baga Paroh ma, mprengac berah qbsuran paru Babirun ka heya, so mntena seediq pnhuqil. 25Pkbyaxun mu ka hiqur baga qbsuran paru Babirun ma, pkwitun mu ka hiqur baga Paroh. Bbege mu baga qbsuran paru Babirun ka hlmadac mu ciida, mpheyu ku hlmadac mpccebu ku dxeral Micrayim. Kiya de mpkeela ka dheya, yaku ka Utux Tmninun. 26Prhepun mu dqqlhangan ka seediq Micrayim ma, lwaqun mu dqqlhangan ka dheya. Kiya de mpkeela ka dheya, yaku ka Utux Tmninun.”
Currently Selected:
Yexejqel 30: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
