Yexejqel 27
27
Csdamac Muyas Cor
1Meeyah kenan ka kari Utux Tmninun, rmengo, 2“Laqi seediq! Slmei uyas tsdmaci ka Cor. 3Rngagi ka seediq Cor gaga meeniq tmayan rcilung ma, mbaruy quri egu ddxeral biciq ckceka rcilung. Rmnengo so nii ka Utux Tmninun Bukung, Cor! Rmnengo su:
‘Mbtunux ku riyung.’
4Gaga ckceka rcilung ka ayus dxeral su,
smnalu sunan we wada su na ptkuun ba pqnseediq.
5Ssmalu su na qulic Senir ka qrtinuh asu su,
ssmalu su na qulic bale Lebanon ka eruc pqyean galiq asu su.
6Ssmalu su na lmukas Basan ka icux asu su,
scapang daha waqic dapa bukung Kityim ddxeral biciq ckceka rcilung ka qulic bale.
7Pala nuqah ppdeping tmninun Micrayim we ngalan pnslawa asu su,
pnskraya pnslawa su.
Galiq mgqliyang we snmalu mtgdiyuc sqeerung su we pneyah Elisah ddxeral biciq ckceka rcilung.
8Seediq Cidon ma Arwad ka miicux asu su.
Cor! Seediq knkela ckceka namu ka mptuasu su.
9Drudan Gebal ma dseediq knkela ka smalu mnugerung.
Kana asu ma dmpteasu bobo rcilung,
msuupu sunan gmbaruy qyqeya su meeniq hiya.
10Ma supi tuumal dsupi su ka seediq Paras, Lud ma Put. Pqeya bunuh qeerung ma qeerung heyi meeniq ckceka namu ma ptuura knledax su. 11Dseediq Arwad ma dsupi su we, gaga meeniq bobo pnharac qmlahang mtqiri su. Niqan supi mnpahung uri ka bobo pnharac su. Dheya nii we pqeya qeerung heyi ma, pttuku pdeping sunan.
12Ririh isu mrana qyqeya dnoi na ka Tarsis, ma seediq mbbaruy sunan. Maadis ging, xiluy, xiluy hmuril ma, xiluy bbali rmiyux maruy qyqeya su ka seediq Tarsis. 13Msuupu mbbaruy sunan ka Yawan, Tubal na, Mesek. Maadis tnqliyan, qyqeya snmalu limuk rmiyux maruy qyqeya su. 14Seediq Togamah we maadis dapa dmay, dapa dmay mccebu ma, dapa roba rmiyux maruy qyqeya su. 15Mbbaruy dyamu ka seediq Dedan ma, bbrigan namu ka egu qqlhangan ssiyo rcilung. Waqic dapa bukung ma qhuni qalux ka spririh daha yamu. 16Ado egu ka qyqeya snmalu su ma gmbbaruy sunan ka Aram. Maadis mtumun btunux mgsama, tninun ubal mgceyas, pala tninun nuqah, qhuni mtanah rcilung ma mtumun liqa meyah priyux qyqeya su. 17Mbbege namu maruy ka dxeral Yehudah ma Israel. Maadis mugi, curung, nunuh, beyuq walu, abura, geluq skenux Minit ma meyah priyux maruy qyqeya su. 18Ado egu ka qyqeya snmalu su, mbleyaq su ma Darmeseq we mbbege maruy sunan. Maadis sino Xelbon, ubal miric rudu Sahar, 19Wedan ma Yawan we maadis xiluy, tama mqeri ma kedang pneyah Udal. Yahan daha priyux qyqeya su. 20Dedan we maadis tninun sapil ppaan dapa dmay ma priyux maruy. 21Seediq Arab ma dqbsuran dmudul Qedar we maadis wawa miric rudu, baus miric ma miric meyah priyux maruy. 22Dmpsbaruy Seba ma Ramah we maangal lmlamu ricuh malu sknexan, lmlamu btunux qrari ma king, meyah priyux maruy qyqeya su. 23Dmpsbaruy Xaran, Kaneh, Eden, Seba, Asur ma Kilmad we mppriyux mbbaruy sunan. 24Dheya nii we maadis malu ba lukus, lukus mtlawa, galiq pniri, sapo msburah, snuyuk ma qyqeya qulic bale meyah priyux maruy qyqeya su.
25Asu Tarsis ka mooda mtqiri mapa qyqeya su.
Tbleyaq su ba ckceka rcilung ka isu, stenge napa su ma krinah su mrana.
26Dmiisux asu su we desun su na ckceka paru rcilung,
smgaliq asu su ckceka rcilung heya ka bgihur nklaan hido.
27Ali tgbleqan su ciida, kana pusu dnoi, bbrigun ma, qyqeya su sbrigun,
kana dmptqsiya ma dmpteasu su,
dmpsbaruy qyqeya snmalu su,
kana dmkkere supi su ckceka na hiya ma,
kana supi ckceka su,
mpskrebu ckceka rcilung kana.
28Ririh diras dmpteasu,
mlgelu ka dxeral ssiyo hiya.
29Kana dmiisux asu we,
mlatac peeyah asu kana.
Dmptqsiya ma dmpteasu we,
mptaril mheyu ssiyo rcilung kana.
30Ririh isu tgdiras ma tnugedux lmingis ka dheya,
murus qbulic tunux,
tricuh ckceka qbulic.
31Ririh isu mkugus tunux,
mlukus lukus mbasi,
tllingis trrengac,
qnnaqah kuxul ka dheya.
32Tgdiras lmingis ciida ka dheya,
mpsmalu uyas tsdamac sunan,
mpqraqil lmingis sunan.
Alang ima ka mntena Cor,
wada sqrebu ckceka rcilung peni?
33Tklihu su rcilung hmaduc qyqeya,
wada su pktngiun ka hbaro ba seediq qqlhangan.
Mnoda qnbleyaq ma kneegu qyqeya sbbrigun su,
wada su pkblequn ka dqbsuran paru bobo dxeral.
34Sliqan su rcilung sqrebu su rcilung truma ciida,
qyqeya su ma kana dsupi gaga ckceka su we mpsqrebu kana.
35Mnkluwi sunan kana ka seediq meeniq dxeral biciq ckceka rcilung,
Dqbsuran paru daha we mngungu, naqah kuxul ka dqeras daha.
36Tghulis sunan ka dmpsbaruy qqlhangan.
Smicu su riyung seediq,
uxe su mpexal meeniq bobo dxeral betaq ani knuwan.”
Currently Selected:
Yexejqel 27: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
