Yexejqel 26
26
Mseang Cor
11 ali idas ciida, tg11 knkawas, meeyah kenan ka kari Utux Tmninun, rmengo, 2“Laqi seediq! Ado rmnengo Yerusalem so nii ka Cor: ‘Axab! Wada hrahun ka rhengun seediq kiya ma, gaga sraguh kenan. Wada sqada ma, mprana ka yaku.’ 3Maanu so kiya de, rnengo so nii kari na ka Utux Tmninun Bukung, Cor, qtai! Mpkpais ku sunan ka yaku. Meeyah mccebu sunan ka hbaro qlhangan, mntena so tmutuy bula na ka rcilung. 4Mpseeliq qbrangan Cor ka dheya ma, mptakur paga daha. Sksikun mu ka dxeral daha ma, ptraun mu ka tasil msdheriq na. 5Mosa ma psaan kadi meeniq ckceka rcilung ka Cor, ado rmnengo ku. Rnengo so nii ka Utux Tmninun Bukung. Qrapun dqlhangan ka heya. 6Dlualang gaga mtqiri alang we phqilun hlmadac kana. Kiya ka mpkeela, yaku ka Utux Tmninun.”
7Rmnengo so nii ka Utux Tmninun Bukung: “Qtai! Mpdudul dapa dmay, rulu mccebu, supi paapa dapa dmay, supi ma hbaro seediq peeyah tgbaro meeyah mccebu Cor ka qbsuran paru kana qbsuran paru, kiya ka Nebukadnecar qbsuran paru Babirun. 8Mdoi hlmadac mphuqil kana seediq gaga mtqiri alang ka heya. Mpsquri sunan smalu qbrangan, kmari ma psbeku qeerung heyi paru. 9Pqriun na pnharac qnalang alang peeniq ka mhurah pnharac qnalang alang ma, dmoi yayu hmurah qnabil alang su. 10Ado hbaro riyung ka dapa dmay na ma, mubung sunan ka bengux tnlaman. Mremux rhengun alang su, mntena mremux alang pnreqan. Ciida, ririh hrenang supi paapa dapa dmay, rulu tdoruy ma, rulu mccebu mplgelu pnharac qnalang alang su. 11Mpqtemaq kana elu alang su hiya ka kukuh dapa dmay. Mpdoi hlmadac phuqil dseediq su ka heya. Ani eruc mkkere riyung su we, ida mptakur uri. 12Mpgeeluk maangal pusu dnoi su, mrengac qyqeya sbrigun, mhurah pnharac qnalang alang, rmere sapah mbleyaq, betaq btunux, qhuni ma dxeral ka ptrbegun daha ckceka qsiya ka dheya. 13Mpsetuq ku hrenang uyas su ka yaku. Uxe bhangun seediq ka hrenang tnubu su. 14Ma btunux msdheriq ka isu ma, ngalun su daha phdagan kadi. Uxe su npsalun ppheyu, ado rmnengo ku ka yaku Utux Tmninun. Rnengo so nii ka Utux Tmninun Bukung.”
15So nii rmnengo na Cor ka Utux Tmninun Bukung: “Phuqil ku ckceka namu ma, rmengac ka dseediq mnangal luqah ciida, uxe mpkrkerang mbahang hrenang tnkuran su ka lualang ssiyo rcilung ho? 16Ciida, dqbsuran paru ssiyo rcilung we malix peeyah tluungan daha ma, qmada lukus qbsuran, lmhelah lukus pniri, mplukus mpkrkerang tleung dxeral ma, uxe mpsetuq pkrkerang ma mnkluwi sunan. 17Ririh isu mpsmalu uyas tsdamac ka dheya. Mprengo sunan,
‘Alang paru ngayan nii,
kiya ka gaga niqan dseediq tnscilung,
mkkere riyung meeniq bobo rcilung,
isu ma kana seediq mneeniq ssiyo rcilung we,
uka ka ini kiicu,
mpkuuka saya di!
18Saya, ali tnkuran su,
mnkluwi kana ka qnlhangan ckceka rcilung.
Qmnita wada su uka ka qnlhangan ckceka rcilung de,
miicu kana.’”
19Rmnengo so nii ka Utux Tmninun Bukung: “Cor! Mosa sqada ka isu, mntena alang uka seediq meeniq hiya. Mpbubung sunan ka qsiya paru ma, muubung sunan ka paru qsiya. 20Ciida, mptheyaq su dseediq mosa tuxan mnkuung, meeniq su nniqan toma rcilung. Meeniq su nlixan ma, uka seediq ka meeniq hiya. Mptuura ku knledax meeniq dxeral seediq muudus. 21Mpkiicu su seediq ka isu, uxe su meeniq bobo dxeral ka isu. Ani migin sunan ka seediq we, uxe su daha slayun. Rnengo Utux Tmninun Bukung ka nii.”
Currently Selected:
Yexejqel 26: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
