Yexejqel 24
24
Liwas Sgrangan
110 ali 10 idas tg9 knkawas, meyah kenan ka kari Utux Tmninun, rmengo, 2“Laqi seediq! Ptsani ka ngayan ali saya. Ado pkelu ali saya, kmremux Yerusalem ka qbsuran paru Babirun. 3Pngali kari rmengo ka sapah mptbrinah nii. Rngagi ka dheya, so nii kari na ka Utux Tmninun Bukung,
posa bobo puniq ka ribo,
mhedu de, hrigi qsiya ka toma na.
4Posa toma hiya ka kana tgmalu heyi tneetu,
posa hiya kana ka heyi bteriq ma ahing.
Pstngai tgmalu bale buuc.
5Ngali tgmalu ba miric,
gtui qhuni ka toma ribo.
Pbgei bale pure ka heyi,
pshada ba ka buuc ckceka na hiya.”
6Rmnengo so nii ka Utux Tmninun Bukung: “Smtali bale! Alang psdara seediq nii we, kiya ka ribo gaga sgrangan. Girang na we ini pkaangal. Skngali maangal ka knkingal knretan heyi. Iya pdaani blebil qreti. 7Ida gaga ckceka alang hiya ka dara pnhuqil. Scuwaq na bobo btunux sdheriq, ini na hrgaani dxeral ma, ini na bungi dxeral. 8Yaku ka pnheruy dara alang nii bobo btunux sdheriq, iya bungi. Kiya ka pbrebur seang mu mpciyuk dheya. 9Maanu so kiya de, rmengo ka Utux Tmninun Bukung: Smtali bale! Alang mpsdara seediq nii. Mpbrinah ku gmutu qhuni ka yaku. 10Prnai gmutu ka qhuni, psrnai ba ka puniq, pkhenuk ka heyi ma, psai ka pskenux na, ptbungux ka buuc. 11Iya pniqi ani maanu ka ribo ma posa bobo bagah puniq. Pstilux ka ribo ma betaq mtanah. Psqyai ka rutiq, pkaangal ka girang na. 12Kiya de, wada uka ririh na ka bqerus. Ini pkaangal pnthuwan ka girang knedux na. 13Ani ku kmpsbgurah qnrutiq ndaan su mmhemuc msuupu we, ida su ini psbgurah. Asi ka betaq msange ka seang mu quri sunan, ida ini tduwa psbgrahun ka qnrutiq su. 14Yaku, Utux Tmninun we rmnengo ku kari so nii. Dehuk ka ali de, ida maha daun. Uxe maalix, uxe ku mpkraguh, uxe ku mpsbrinah uri. Mpuyu qneepah su mpsgao isu ka seediq. Rnengo Utux Tmninun Bukung ka nii.”
Hnqilan Mqedil Mpgeela Kari
15Meyah kenan ka kari Utux Tmninun, rmengo, 16“Laqi seediq! Qtai! Kmpooda ku mqraqil ma mnarux maangal kuxul su meeniq doriq. Kiya we iya qnaqah kuxul ma, iya lingis. Iya tsrusuq lmingis uri. 17Wano ba squwaq, kiya we iya peeyah hrenang. Iya dai smbasi ka seediq wada mhuqil. Qrii galiq tunux ma pkkucu. Iya qruungi ka ngudus. Iya uqi ka pang mbasi.” 18Rmnengo ku seediq mgrebu we mphuqil gbiyan ka mqedil mu di. Mgrebu so kusun de mooda ku ida so pnosa na kari kenan.
19Smiling kenan ka dseediq: “So ka gaga su daan ge, maanu pnugluban na menan. Rngage miyan ho?” 20Rmengo ku dheya: “Meeyah kenan ka kari Utux Tmninun, rmengo, 21‘Rngagi ka sapah Israel, rmnengo so nii ka Utux Tmninun Bukung, srtiqun mu ka sapah thmkuwan mu, kiya ka pnooda namu beyax stndahu namu, qrasun namu ckceka doriq, stangan namu lhebun namu. Kiya dungal we, lqlaqi knrngiyan we, ida mphuqil toma hlmadac. 22Ciida, asi ka mpuyu namu noda mu. Uxe namu mpqeerung ngudus ma, uxe namu meekan pang dseediq. 23Mqiri namu galiq tunux ma, mpkramil namu. Uxe namu mpqnaqah kuxul ma uxe namu mplingis. Mkule namu muuwic ckceka qnrutiq namu ma mpprengac namu. 24Ma mpgeela pnskraya yamu ka Yexejqel. Kana noda na we, dai yamu uri. Meeyah ka ooda kiya de, mpkela namu yaku ka Utux Tmninun Bukung.’”
25“Isu, laqi seediq! Ngngalun mu peeyah dheya ka sntangan daha, knledax kuxul daha, kuxul doriq daha ma, lqlaqi spruun lhebun daha ali ciida. 26Yaa uxe mpquri sunan ka dseediq qduriq ma, mosa pqbahang sunan peni? 27Ali ciida, mpraguh su quwaq mprengo su dseediq qnduriq, uxe su mpngangah ka isu. Ma mpgeela pnskraya dheya ka isu. Kiya de mpkela ka dheya, yaku ka Utux Tmninun.”
Currently Selected:
Yexejqel 24: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
