Yexejqel 20
20
Lnglungan Utux Baro ma Tnbrinah Kari ka Seediq Israel
110 ali 5 idas tg7 knkawas ciida, meyah smiling Utux Tmninun ka duma rdrudan Israel ma meyah tleung berah mu. 2Meyah kenan ka kari Utux Tmninun, rmengo, 3“Laqi seediq! Rngagi ka rdrudan Israel. Rngage so nii ka kari Utux Tmninun Bukung, Meyah namu smiling kenan ho? Rmengo ka Utux Tmninun, mpsdehu ku knuudus mu betaq ani knuwan, uxe namu pyahun smiling. 4Laqi seediq, mpsgao su dheya ka isu ho? Mpsgao su ho? Asi su ka pklaun qnqihan noda ddrudan daha cbeyo. 5Rngage isu ka dheya, so nii ka kari Utux Tmninun Bukung, ali ciida, gmnao ku Israel, psdehu ku lqlaqi mslutuc sapah Yakobu ma, ptuura ku ddheya meeniq dxeral Micrayim. Pnsdehu ku so nii, yaku we Utux Tmninun, Utux Baro namu. 6Ali ciida, psdehu ku dheya, pnlatac mu peeyah dxeral Micrayim ka dheya ma, desun mu malu dxeral psbyeqan nunuh ma walu nigin mu dheya. Kiya ka malu riyung kana dxeral. 7Rmnengo ku dheya, txtaxa namu we asi ka lixun namu ka noda pqnqihun ckceka kuxul doriq namu. Iya psrciqi tikung Micrayim ka heyi namu. Yaku we Utux Tmninun, Utux Baro namu. 8Kiya de tbrinah kenan ka dheya ma, ini qbahang kenan. Ini daha qdaani ka pqnqihun noda ckceka kuxul doriq daha ma ini qada tikung Micrayim.
Kiya de mprengo ku, dxeral Micrayim, hrigun mu heyi daha ka paru seang mu. Mpquri dheya kana ka seang mu. 9Ririh ngayan mu ka noda mu nii. So uxe pqluqah ngayan mu nniqan daha ckceka qqlhangan. Ptuura ku dheya meeniq berah doriq dqqlhangan. Dmnudul dheya mlatac peeyah dxeral Micrayim. 10Dmnudul ku dheya mlatac peeyah dxeral Micrayim ma, desun mu tadus brenux. 11Sbege mu dheya ka gaya bneku mu. Nasi muyu nii ka seediq we mpkuudus. 12Sbege mu dheya ka ali sngayan mu. Kiya ka pnskraya mu dheya ma yaku. So maha daha klaun, yaku, Utux Tmninun ka prtaso dheya. 13Kiya de tbrinah kenan tadus brenux hiya ka sapah Israel. Ini puyu kari pndakar mu malix gaya bneku mu. Muyu nii ka seediq we mpkuudus. Kiya de krinah psbrinah ali sngayan mu ka dheya.
Kiya de mprengo ku, meeniq dxeral nrao hiya, hrigun mu heyi daha ma mpkuuka ku dheya ka yaku. 14Ririh ngayan mu ka noda mu nii. So uxe pqluqah ngayan mu nniqan daha ckceka qqlhangan. Ado dmnudul ku mlatac peeyah hiya meeniq berah doriq dqqlhangan ka dheya. 15Dungal we psdehu ku dheya meeniq tadus brenux. Uxe mu ddudul mosa mremux dxeral psbyeqan nunuh ma walu bnege mu ka dheya. Kiya ka dxeral malu riyung kana dxeral. 16Ado malix gaya bneku mu, ini puyu kari pndakar ma, tbrinah ali sngayan mu ka dheya. Lhebun daha we muyu nanak tikung daha nanak. 17Ani so kiya, ida mpsgalu dheya ka doriq mu. Uxe mu qhdeun phuqil ka dheya. Uxe mu qhdeun phuqil ckceka tadus brenux ka dheya.
18Meeniq tadus brenux, rmengo ku lqlaqi daha: ‘Iya ooda gaya pndakar rudan namu. Iya puyu pnugaya daha. Iya psrutiq heyi namu ka tikung daha. 19Yaku we Utux Tmninun, Utux Baro namu. Asi namu ka muyu kari pndakar mu ma, puyu qmeepah gaya bneku mu. 20Dungal we ngali mrtaso ka ali sngayan mu. Pnskraya mu yamu ma yaku ka ali nii. So namu klaun, yaku we Utux Tmninun, Utux Baro namu.’ 21Ani so kiya, tbrinah kenan ka lqlaqi daha. Ini puyu kari pndakar mu ma, ini qeepah gaya bneku mu. Nasi muyu nii ka seediq we mpkuudus. Kiya de tbrinah ali sngayan mu ka dheya.
Kiya de mprengo ku, meeniq tadus brenux hiya, hrigun mu heyi daha ma mpkuuka ku dheya ka yaku. 22Kiya de ini ku kchaya mooda ka baga mu. Ririh ngayan mu ka noda mu nii. So uxe pqluqah ngayan mu nniqan daha ckceka qqlhangan. Ado dmnudul ku mlatac peeyah hiya meeniq berah doriq dqqlhangan ka dheya. 23Dungal we psdehu ku dheya meeniq tadus brenux, pgrehak maku dqqlhangan ma lwaqun maku dseediq icil ka dyamu. 24Ado ini puyu gaya bneku mu ka dheya. Malix gaya pndakar, tbrinah ali sngayan mu ma, doriq daha we mquri tikung ddrudan daha. 25Dungal ka yaku we sbege mu dheya ka gaya uxe pyugun ma pnugaya ini tduwa skuudus. 26Ssapuh daha ckceka puniq ka qbsranan laqi daha, wada mu psrtiqan dheya nanak ka snapuh nii. So maha mklui riyung ka dheya de, mpkeela yaku ka Utux Tmninun.
27Laqi seediq! Rngagi ka sapah Israel, rngagi ka dheya, so nii ka kari Utux Tmninun Bukung: Smngayan kenan meeniq ooda tbrinah nii ka ddrudan namu. 28Dmudul ku dheya psteme dxeral sntangan mu bbege dheya. Taan daha, ani inu ka dgiyaq biciq ma gaga hrean qhuni we spuhan daha mege snapuh brebur seang mu. Dungal we smapuh pskenux ma mege snapuh sino. 29Kiya de rmengo ku dheya, tgbaro gaga ka saan namu we maanu ho? Ngayan na we: ‘Bama’ kesun ani betaq saya. 30Maanu so kiya de, rngagi ka sapah Israel. So nii ka kari Utux Tmninun Bukung, mpuyu namu noda rdrudan namu cbeyo mpsrutiq yamu nanak peni? Mpuyu namu dheya mooda mmhemuc msuupu peni? 31Mege namu snapuh, poda namu puuniq lqlaqi namu ciida, ida namu thmuku tikung smrutiq yamu nanak betaq saya. Sapah Israel! Huwa mu kesun meyah psiling ka yamu da peni? Rmengo ka Utux Tmninun Bukung, mpsdehu ku knuudus mu ani betaq knuwan, uxe namu srwaun psiling.
32Rmengo namu: ‘Pntena miyan dqlhangan, kklegan seediq thmuku tikung qhuni ma btunux.’ Lnglungan namu so nii we ida uxe maha so kiya.
Pkdira ma Smruwa ka Utux Baro
33Rmengo ka Utux Tmninun Bukung, mpsdehu ku knuudus mu ani betaq knuwan, mpqbsuran paru ku, mpdoi ku baga niqan paru beyax, Nii ku muudus ka yaku. Ida ku mdoi mbeyax baga mu ma sqama seang mu qmlahang yamu. 34Mdoi ku beyax baga mu ma hiqur baga mu, dungal we mpheri ku paru seang mpdudul ku yamu peeyah kana seediq. Psliun maku peeyah dqqlhangan lnwaqan. 35Desun maku tadus brenux. Meeniq hiya mooda psgao yamu. 36Wada ku huwa mesa psgao ddrudan namu meeniq tadus brenux Micrayim hiya we, mpuyu ku so nii mooda psgao yamu. Rnengo Utux Tmninun Bukung ka nii. 37Pdaun maku toma hukuc, mpuyu so sdhegun maku kari dmudul yamu. 38Pkngalun mu kana ka dseediq tbrinah ma mnoda qnquwan noda kenan meeniq ckceka namu. Ddudul mu mlatac peeyah dxeral tnooda namu. Kiya de, uxe mremux dxeral Israel ka dheya. Kiya ka mpkela namu, yaku ka Utux Tmninun.
39Yamu, sapah Israel! Rmengo so nii ka Utux Tmninun Bukung, nasi namu ini qbahang kenan, mpeeyah saya pdaun maku mpthmuku tikung namu nanak ka yamu. Kiya de uxe moda smngayan ngayan mrtaso mu ka snapuh namu ma tikung namu.
40Meeniq dgiyaq mrtaso mu, kiya ka bobo bungu ba dgiyaq Israel. Kana sapah Israel ma, dseediq meeniq hiya meeyah thmuku kenan ka dheya. Meeniq hiya, mpqaras ku dheya ka yaku. Dungal we mpqaras ku yamu meyah mege snapuh ma pnlaale pnugheyi dxeral ma, kana qyqeya mrtaso. Rnengo Utux Tmninun Bukung ka nii. 41Platac ku maadis peeyah ckceka dseediq ma, psseli yamu peeyah qlhangan lnwaqan namu. Ciida, mpqaras ku mangal snapuh skenux. Ptrwaun mu mrtaso meeniq ckceka namu ma, meeniq berah doriq dqqlhangan. 42Dmnudul ku yamu mremux dxeral Israel, kiya ka dxeral sntangan bbege mu rdrudan namu. Kiya de mpkeela namu, yaku we Utux Tmninun. 43Maha namu lnglungun ka kana snrtiqan noda namu, dungal we mptraqil namu yamu nanak so nii kana naqah noda namu. 44Sapah Israel! Ririh yaku ma ngayan mu, ini ku ooda naqah qneepah namu ma msburo noda namu cmiyuk yamu. Kiya ka mpkela namu, yaku ka Utux Tmninun. Rnengo Utux Tmninun Bukung ka nii.”
Paru Puniq Negeb
45Meyah kenan ka kari Utux Tmninun, rmengo, 46“Laqi seediq! Pquri toma ka dqeras su. Psquri toma rmengo, psquri bbuyu qhuni Negeb rmengo kari pgeela. 47Rngagi ka bbuyu qhuni Negeb, qbhangi ka kari Utux Tmninun. So nii kari na ka Utux Tmninun Bukung: ‘Qtai! Mpsrading ku puniq isu hiya, Mpqhedu ku psqama kana meluq qhuni ma kana mdengu qhuni. Puniq paru riyung nii we uxe mpehing. Mpeeyah tgtruma betaq tgbaro, ani dqeras seediq we ida psqmaun kana. 48Kana niqan heyi ma dara we mpkela kana, yaku, Utux Tmninun ka pnrading puniq. Puniq nii we uxe mpkpehing.’” 49Kiya de mprengo ku: “Ah! Utux Tmninun Bukung! Tmiyu kenan ma rmengo ka seediq, uxe seediq rmnengo paangal kari ka nii da peni?”
Currently Selected:
Yexejqel 20: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
