Yexejqel 16
16
Yerusalem Uka Stmaan
1Meyah kenan ka kari Utux Tmninun ma rmengo, 2“Laqi seediq! Pgklai ba ka qnrquun ba noda Yerusalem. 3Rngage isu, so nii kari na quri Yerusalem ka Utux Tmninun Bukung. Pnyahan su ma, pnttingan su ka dxeral Kenaan. Seediq Amori ka tama su ma, seediq Xet ka bubu su. 4Quri so pntingan su. Uka seediq psetuq puga su mntuting su ciida ma, uka ka ptrima qsiya pkbgurah sunan. Uka ka rmehak timu heyi su ma, uka ka lmabu galiq sunan uri. 5Uka seediq gmaalu sunan, betaq ini ooda ani kingal smbleyaq gmaalu sunan. Sqada su daha bobo dxeral nrao, ado ali pnttingan su ciida we pntrqilan.
6Moda ku ssiyo su ciida, gaga su tdoruy ckceka dara su we, rmengo ku sunan: ‘Ani su gaga ckceka dara we, asi su ka muudus!’ Rmengo ku dungal: ‘Ani su gaga ckceka dara we, asi su ka muudus!’ 7Wada misu pkdkilun mntena so speriq dxeral nrao ka isu. Dmudul su mdakil ma tgdehu su hnyegan mqedil. Betaq kdringan ka nunuh su ma, bbaro ka snuunux su, ani si mbberas su ini plukus.
8Moda ku ssiyo su we qmita ku sunan. Qtai! Pkelu su bale baka sdngiyan pnugluwan ka knkawas su. Kiya de bungan misu lukus mu ka heyi su mnbberas. Dungal we sndhegan misu ma, psdehu ku sunan, so maha nyaku ka isu. So nii ka rnengo Utux Tmninun Bukung. 9Ciida, dmoi ku qsiya trima dara heyi su ma, rcuhan misu abura. 10Plkusan misu lukus bgurah ma pkrmilan misu ramil qraqil camac. Bungan misu pala nuqah malu ma hlagan misu galiq tninun ware kuyi. 11Pdpingan misu pdeping ma psaan misu qmuru ka baga su. Psregan misu sniru ka nduyung su. 12Psaan mu cuqi ka muxi su ma pswilan misu gidi ka birac su. Pkbnuhan misu bunuh lmedax ka tunux su. 13So kiya de pdpingan su king ma ging, mlukus su lukus nuqah, ware kuyi ma pniri. Mekan su tgmalu ba nemu mugi ma beyuq walu ma abura. Tgqango ka qnsdiqan su ma dehuk su mqbsuran paru da. 14Ririh baka qnsdiqan su ma mkgarang qqlhangan ka ngayan su. Ado yaku ka pttuku pkledax ma pdeping sunan. So nii ka rnengo Utux Tmninun Bukung.
15Kiya de smtama su qnsdiqan su ma knmalu ngayan su mmhemuc msuupu su txaun. Mnhemuc su msuupu mooda sunan hiya, pndeping su we ndheya kana. 16Saangal su lukus su pdpingan su ba smalu ka thmkuwan tikung ma mmhemuc su msuupu bobo na hiya. Nuuka betaq saya ka so nii ma, uxe mpkeso kiya ka nexal uri. 17Bnege mu sunan ka malu ba king ma ging we ngalun su ma smlean su tikung rseno ma mmhemuc su msuupu heya. 18Ngalun su ka lukus su pniri ma splukus su heya. Ssapuh su heya ka abura mu ma skenux mu. 19Uqun wada mu sbege sunan, kiya ka pqdiyal mu sunan ka nemu mugi biciq ma abura ma beyuq walu we, ngalan su skenux ssbleyaq ma ssapuh su heya. So nii ka rnengo Utux Tmninun Bukung. 20Isu we ngalun su ka laqi rseno, laqi mqedil pntuting misu we, speekan su heya. Biciq ooda ka noda su knhmetan su msuupu nii peni? 21Phqilun su ka lqlaqi mu ma psqmaun su smapuh tikung sbege dheya. 22So nii pqnqihun ba noda su ma mmhemuc msuupu su we, ini su lnglungi ka lqlaqi su ciida. Ali ciida we, mbberas su ma, treeru su ckceka dara.”
Mntena Mqedil kbrexun ka Yerusalem
23“Smtali su bale! Smtali su bale! So nii ka rnengo Utux Tmninun Bukung. Bobo kana naqah noda su so nii qnnaqah noda de, 24phyegan su spuhan tikung ma sgspatan meeniq pssliyan. 25Ani inu pnstreengan elu alang we smlean su spuhan, hneegan su we so trqilun. Dungal we tmaus su dseediq mkleelu ma, mmhemuc su msuupu mtaqi dheya. 26Sgspatun su ka mbesu ba seediq Micrayim siyo su ma brebur su seang mu. 27Qtai! Posa ku baga mpcebu ku sunan ma, psbciqun mu hari mege sunan ka snbleyaq. Bege misu seediq Peliset kiya ka tmraqil sunan mpkmhemuc mptraqil sunan. Mpqsiqa noda su knhmetan su mmhemuc msuupu dheya uri. 28Ani so kiya de uka khngeras su ma, mmhemuc msuupu su dseediq Asur dungal. Mkmhemuc Msuupu su dheya ma ida su ini baka nana. 29Krinah su mmhemuc msuupu Krdiya dxeral bbrigan ma, ida su ini baka nana.”
30“Ma muuwic riyung ka lhebun su! So nii ka rnengo Utux Tmninun Bukung. Ida su so mqedil kbrexun uka siqa ka kana noda su. 31Phyegan su spuhan tikung ma sgspatan meeniq pssliyan. Kiya uri we ini su pntena mqedil kbrexun, ado ini su sprui ka pila snadu mnhemuc msuupu. 32Isu mqedil mpkmhemuc msuupu! Ngalan su so rseno su ka seediq icil ma, kmpririh su rseno su. 33Maangal snadu kana ka mqedil kbrexun. Kiya we krinah su lbuwan mege ka dseediq kuxul su, kiya ka meyah kmmhemuc msuupu sunan ka ssiyo alang. 34Ini pntena mqedil taxa ka smhemuc msuupu su isu. Uka ka kmmhemuc msuupu sunan. Isu ka mege snadu seediq, uxe dseediq ka mege snadu sunan. Mspaux su ka isu.”
Pkdira Yerusalem ka Utux Baro
35“Isu mqedil kbrexun nii! Qbahang kari Utux Tmninun. 36So nii kari na ka Utux Tmninun Bukung, ado mmhemuc msuupu su seediq ma, ptraun su ka knbberas su ma, mmhemuc su msuupu dseediq kuxul su. Ado thmuku su kana tikung trqilun. Mntena su mangal dara lqlaqi su sbege dheya. 37Kiya de, qtai! Psliun mu peeyah ani inu ka kana seediq sgaalu su tnheyaq sunan, ani dseediq nkuxul su, ani dseediq qnriqu sunan. Ptraun mu berah daha ka knbberas su. Asi daha ndwai qmita ka knbberas su. 38Ida so pkdira mu mqedil mmhemuc msuupu ma mqedil pnhuqil seediq ka pkdira mu sunan ma mciyuk ku sunan ka seang qnriqu mu ma dara pnhuqil su. 39Bege mu baga daha ka isu. Mpselaq spuhan tikung ma, mhurah sgspatan. Tnugsebuc lmhelah lukus su ma, mpgeluk malu ba ppdeping su, pbrasun su daha ma betaq uka lukus su. 40Mppseli qpuruh seediq ka dheya ma meeyah mccebu sunan. Buun su daha btunux phuqil ma, paqun su daha hlmadac. 41Psqmaun su daha puniq ka sapah su ma, psgeegun misu berah hbaro mqedil. Uxe misu pdaun mmhemuc msuupu ma, uxe misu npsalun pbege snadu da. 42Ptretun mu ka seang mu sunan ma, mplatac sunan ka qnriqu mu sunan. So kiya de, mptbale ku ma, uxe ku mpkseang da. 43Ado ini su lngelung ali lqlaqi su ciida. Krinah su pkseang kenan so nii noda su. Manu so kiya de, qtai! Kiya de mpuyu ku noda su cmiyuk sunan. So nii, bobo ani maanu kana pqnqihun ka noda su we, uxe su mnoda mmhemuc msuupu peni? So nii ka rnengo Utux Tmninun Bukung.”
So Kika Bubu we so Kika Weewa Na Uri
44“Qtai! Rmengo so kari pnccugil ka seediq we so nii kari na mccebu sunan: ‘So kika bubu we, so kika weewa na uri.’ 45Isu we nweewa su bubu, qmada su rseno su ma lqlaqi su. Bale su dmtswai mqedil su ka isu, qmada su rseno su ma lqlaqi su. Seediq Xet ka bubu su. Seediq Amori ka tama su. 46Qbsuran su mqedil we Samareia. Heya ma dweewa na we gaga meeniq tgdaya su. Mtswai su mqedil we Sedom. Heya ma dweewa na we gaga meeniq tgtruma su. 47Uxe wano muyu su noda daha ma, qnrquun ba qneepah daha we pyugun su mooda uri. Uxe su mpqbsiyaq, maha hmrinas dheya ka qnnaqah noda su.” 48Rmengo ka Utux Tmninun Bukung: “Smdehu ku pooda knuudus uka psteqan ani knuwan mu, Sedom mtswai su ma dweewa na we, ini oda noda su ma noda dweewa su ka dheya. 49Qtai! So nii ka qnquwan noda Sedom mtswai su. Psparu, msngari bale uqun, malu ba ka kndesan daha ka heya ma dweewa na. Kiya de ida ini dayo baga dseediq mqraqil ma qrinuc ka dheya. 50Psparu riyung qmeepah pqnqihun ba noda berah mu ka dheya. Taan mu de, wada mu asi pkngali. 51Ini dehuk dmeka qnquwan noda su ka Samareia. Hmrinas dheya kneegu pqnqihun noda su. Spntena ta kana qnquwan noda su we, rinah truura knsderux daha ka mtswai su mqedil. 52Isu we dmayo su rmengo mtswai su de, paani ka qnsiqa su nanak. Ado hmrinas su dheya egu bale pqnqihun qnquwan noda su. Nuuqu hmrinas sunan ptuura knsderux noda daha ka dheya. Betaq su ptuura knsderux noda mtswai su de, naka su msiqa riyung ma, mapa qnsiqa su nanak.
Pbrnahun Dungal ka Sedom ma Samareia
53Yaku ge, pbrnahun mu ka seediq qnerac. Pbrnahun mu dyamu seediq qnerac ka Sedom ma dweewa na ma, Samareia ma dweewa na. 54So su aapa su ka siqa su nanak. Ririh kana qnsiqa noda su, betaq maangal smbleyaq ka dheya. 55Mosa nniqan daha ka Sedom mtswai su ma dweewa na. Mosa nniqan na ka Samareia ma dweewa na. Isu ma dweewa su we mosa nniqan su uri. 56Ali psparu su ciida, uxe su wada ngalan phlisan ka Sedom mtswai su mqedil peni? 57Tgberah ini ptuura ka qnquwan noda su ciida, gisu tmsiiyax mtqiri sunan ka dweewa Aram tnsyaxan ma, dweewa Peliset gaga mtqiri ssiyo Aram. 58Rmengo ka Utux Tmninun, asi su ka paanun nanak ka knbesu su ma qnqihan noda su.”
Sndhegan Ani Betaq Knuwan
59“So nii rmengo ka Utux Tmninun Bukung, isu so nii smbiciq su qmita sndhegan su ma tbrinah sndhegan su we, mpuyu ku noda su mpciyuk ku sunan. 60Kiya de mplngelung ku sndhegan mu sunan lqlaqi su ciida. Mpsdehu ku sndhegan mu sunan uri. 61Ngalan su ka tgqbsuran mqedil su ma mtswai mqedil su de, asi su ka lnglungun ka noda su, kiya ka mpqsiqa su nanak. Bege mu sunan ngalun su dweewa ka dheya. Nii we uxe mu pnooda pnsdhegan mu sunan ka nii. 62Mpsdehu ku sndhegan mu sunan, kiya ka mpkeela su, yaku ka Utux Tmninun. 63Mpsruwa ku sunan kana qnnaqah noda su ciida, mplngelung su ma mpqsiqa su. Ririh baka qnsiqa nii, uxe su mpnpusal smnetur. Rnengo Utux Tmninun Bukung ka nii.”
Currently Selected:
Yexejqel 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
