Yexejqel 14
14
Mseang Thmuku Tikung ka Utux Baro
1Meyah kenan ma tleung berah mu ka duma rudan seediq Israel. 2Ciida, meyah kenan ka kari Utux Tmninun, 3“Laqi seediq! Pheyu tikung lhebun daha ka dseediq nii. Psaun daha berah ka btunux pskripuc mtakur qnquwan noda daha nanak. Ya mu maha spdurun ka dheya nii? 4Maanu so kiya de, rngagi ka dheya. ‘So nii kari na ka Utux Tmninun Bukung, dseediq tnsapah Israel, kana gaga pheyu tikung lhebun ma, psaun daha berah ka btunux pskripuc mtakur qnquwan noda daha nanak we, betaq meyah mpgeela kari hiya. Yaku, Utux Tmninun we, ririh so nii kneegu tikung tnhmkuwan daha we, mpciyuk ku dnurun daha. 5So ku maha pbrinah lhebun tnsapah Israel. Wada malix peeyah kenan ma, thmuku tikung kana ka dheya.’
6Maanu so kiya de rngagi ka sapah Israel. So nii kari na ka Utux Tmninun Bukung: ‘Pryuxi lnglungan! Qdriqi ka tikung namu ma, ririh peeyah kana qnrquun ba ka dqeras namu.’ 7Ado dseediq tnsapah Israel ma, dseediq tnooda ckceka daha, kiya ka kana malix kenan ma gaga pheyu tikung lhebun daha ma, psaun daha berah ka btunux pskripuc mtakur qnquwan noda daha nanak we, betaq meyah dmurun kenan meniq mpgeela kari hiya. Yaku, Utux Tmninun ka mpciyuk dheya. 8Biqun mu qilu ka so nii seediq, ngalan so qlhangun ma, phlisun. Dungal we qada mu peeyah seediq mu. Kiya de mpkeela namu, yaku ka Utux Tmninun. 9Nasi wada qbriqun ka mpgeela kari ma rmengo kari pgeela de, yaku, Utux Tmninun ka pkuuni heya. Mposa ku baga cmebu heya ma, psnakun mu peeyah ckceka Israel seediq mu. 10Asi ka mapa nanak qnquwan noda daha ka dheya. Maha mntena ka qnquwan noda mpgeela kari ma dseediq dmnurun. 11So uxe mpnpusal mgedang peeyah kenan ka sapah Israel ma, uxe mnpusal smrutiq dheya nanak peeyah ani maanu qnquwan noda daha. Kiya ka maha mseediq mu ka dheya ma, ma Utux Baro daha ka yaku uri. So nii ka rnengo Utux Tmninun Bukung.”
Noax, Daniyel, Yobu
12Meyah kenan ka kari Utux Tmninun, 13“Laqi seediq! Nasi tbrinah moda qnquwan noda kenan ka qlhangan we, mposa ku baga cmebu dheya, stequn mu ka pnyahan daha uqun, pdaun mu krayan ka dxeral kiya, pkngalun mu peeyah ckceka seediq ma camac ka dheya. 14Ani ya meniq hiya ka Noax, Daniyel ma Yobu so nii 3 heyi we, mooda nanak knsderux daha mpkuudus dheya nanak kiya. Rnengo Utux Tmninun Bukung ka nii. 15Nasi mu pdaun dxeral kiya ka camac mngaangal, mooda mnhemuc smeeliq ma, ngalan dxeral qnada. Ririh camac nii, uxe mooda hiya kana ka seediq. 16Ani yaa meeniq hiya ka 3 heyi seediq nii, mprengo ka Utux Tmninun Bukung, mpsdehu ku knuudus mu uka psteqan ani knuwan. Uxe daha dhekun pkuudus ka laqi rseno daha ma laqi mqedil daha. Wano dheya nanak ka pkdusun daha. Dxeral kiya we maha laxun. 17Uxe uri we pdaun mu hiya ka hlmadac ma mprengo: ‘Dai ptlihu dxeral kiya ka hlmadac.’ Kiya ka pkngalun mu peeyah ckceka hiya ka seediq ma camac. 18Ani yaa meeniq hiya ka 3 heyi seediq nii, rmnengo ka Utux Tmninun Bukung. Mpsdehu ku knuudus mu uka psteqan ani knuwan. Uxe daha dhekun pkuudus ka laqi rseno daha ma laqi mqedil daha. Wano dheya nanak ka pkdusun daha. 19Uxe uri we pniqun mu mnarux punu ka dxeral kiya. Spneyah seang mu sheruy mu ckceka daha ka dara, kiya ka pkngalun mu peeyah ckceka hiya ka seediq ma camac. 20Ani ya gaga meniq hiya ka Noax, Daniyel ma Yobu, rmengo ka Utux Tmninun Bukung, Mpsdehu ku knuudus mu uka psteqan ani knuwan. Uxe daha dhekun pkuudus ka laqi rseno daha ma laqi mqedil daha. Wano knsderux daha nanak ka pkuudus dheya nanak.”
21“So nii kari na ka Utux Tmninun Bukung, nasi mu pyahun Yerusalem ka 4 kcugun pkdira. Kiya ka hlmadac, krayan, camac naqah ma, mnarux punu. Pkngalun mu peeyah ckceka hiya ka seediq ma camac we, uxe mpkrinah ka oda nii peni? 22Qtai! Meniq hiya we, madis laqi rseno ma laqi mqedil daha ka dseediq mntngari muudus. Qtai! Meyah yamu hini ka dheya. Qtaan namu ka noda daha de, maha malu kuxul namu ririh so pnkdira mu Yerusalem ma kana pndaan mu dheya. 23Mpkmalu kuxul namu qmnita noda daha. Kiya de maha namu klaun, uxe uka pusu na mnoda ku Yerusalem. So nii ka rnengo Utux Tmninun Bukung.”
Currently Selected:
Yexejqel 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
