Yexejqel 13
13
Mseang Mnnangi Mpgeela Kari
1Meyah kenan ka kari Utux Tmninun, 2“Laqi seediq! Rengo kari pnugeela, dmpgeela kari pkremux Israel. Rngagi ka mmhemuc pooda lnglungan daha rmengo kari pgeela: ‘Qbahang kari Utux Tmninun ka yamu.’” 3So nii kari na ka Utux Tmninun Bukung: “Smtali bale! Dmpgeela kari mngataq, spooda namu lnglungan namu nanak ma, uka ka qntaan namu. 4Israel! Dmpgeela kari namu we, mntena huling bbuyu gaga meeniq dxeral nlaxan. 5Ini osa hmetur pnharac ma, ini smlei kana qnalang alang sapah Israel. So maha mheyu meniq ckceka mccebu, meniq ali eyah Utux Tmninun. 6Qnita daha we uxe bale ba. Pnooda daha mpsbunul mberiq ka kesun daha rnengo Utux Tmninun. Bale ba we, ini skagul dheya ka Utux Tmninun. Kiya de tmara kari so nii maha msdehu riyung mesa ka dheya. 7Uxe namu qmnita so tuutux skbrhuwan peni? Uxe namu pnooda mberiq mpsbunul peni? Rmengo namu we: ‘Rnengo Utux Tmninun ka nii’. Bale ba we, ini ku rengo.”
8Maanu so kiya de so nii kari na ka Utux Tmninun Bukung: “Ado skbrhuwan ka rnengo namu ma, mberiq ka qnita namu. So kiya de, qtai! Mpkpais ku yamu. So nii ka kari Utux Tmninun Bukung. 9Mpkremux ku qmnita tuutux skbrhuwan ma, dmnoi mpsbunul mberiq ka baga mu. Uxe meeniq tuumal pnssliyan seediq mu ka dheya. Uxe spatis patis ngayan tnsapah Israel ma, uxe mpremux dxeral Israel duri. Kiya de, maha namu klaun, yaku ka Utux Tmninun Bukung. 10Mpsridil dseediq mu ka dheya ma mprengo: ‘Msbleyaq!’ Bale ba we, uka ka msbleyaq. Mntena so mharac qnabil ka seediq ciida, qtai! Asi na rcuhi nemu btunux ka qnabil kiya. 11Maanu so kiya de, rngagi ka dseediq rmnicuh nemu btunux nii: ‘Mpthurah ka qnabil ma, qyexun quyux nuhur. Quyux huda paru! Qyuxi nhari. Mpseeliq qnabil nii ka bgihur paru.’ 12Qtai! Mhurah ka qnabil nii. Uxe mprengo so nii ka seediq peni: ‘Wada inu ka rncuhan namu nemu btunux di?’” 13Kiya ka so nii kari na ka Utux Tmninun Bukung: “Mpkseang ku ptutuy ku bgihur paru mooda smeeliq hiya. Ckceka seang mu moda mubung hiya ka quyux paru. Dungal we tnpreqan seang mu ka ptuting quyux huda moda smeeliq hiya. 14Mpkeso ku nii moda smeeliq qnabil rncuhan namu nemu btunux ma, mphurah ku ptuura pusu na. Mrqeraq ka qnabil de, mpkuuka namu ckceka hiya uri. Kiya de maha namu klaun, yaku ka Utux Tmninun. 15Mpquri ku qnabil ma rmnisuh nemu btunux nii ka seang mu. Mprengo ku dyamu: ‘Uka ka qnabil di! Uka ka rmnisuh bobo na hiya uri di!’ 16So nii ka dmpgeela kari Israel. Mquri Yerusalem ka kari pgeela ma, qmnita so tuutux mtbale alang, bale ba we uka ka mtbale. Rnengo Utux Tmninun Bukung ka nii.”
Mseang Mberiq Mqedil Mpgeela Kari
17“Isu, laqi seediq! Pquri dmqedil spooda nanak na lnglungan daha rmengo kari pnugeela ka dqeras su. Rengo kari pnugeela cmebu dheya, 18rengo, so nii ka rnengo Utux Tmninun Bukung: ‘So smtali yamu dmqedil nii! Smalu namu snuyuk pstuutux sakur baga daha ma, smalu bubung tunux pstuutux mndungus sbubung ani paru ma biciq tunux daha, ririh namu qmerac knuudus seediq. Ye namu mpqerac namu knuudus dseediq mu ma, pkuudus namu nanak peni? 19Snmugi paru ma biciq ba pang de, betaq namu tmsiiyax kenan meniq ckceka dseediq mu. Betaq namu mberiq rmengo dseediq smkuxul mbahang kari mberiq. Kiya ka ani uxe mphuqil we phqilun namu, ani uxe pkdusun we pkdusun namu.’”
20Maanu so kiya de rmengo ka Utux Tmninun Bukung: “Qtai! Mpciyuk ku dmqerac seediq, mntena namu snuyuk pstuutux qqerac qbheni. Gleekun mu maangal peeyah baga namu ka snuyuk pstuutux ma, plaxun mu ka dseediq qnerac namu mntena so qbheni. 21Sgliqun mu ka bubung tunux namu ma, mpdoi ku baga dseediq mu mplatac peeyah baga namu. So uxe mptpusal pqerac baga namu ka dheya. Kiya de mpkela namu, yaku ka Utux Tmninun. 22Ini ku pqnaqah kuxul dseediq msderux noda. Kiya we yamu ka sdoi namu kari mberiq pqnaqah kuxul heya. Dungal we psbyaxun namu ka baga naqah seediq ma, ini namu pbrnahi pkuudus malix peeyah naqah oda daha. 23Maanu so kiya de, uxe namu mqita so tuutux skbrhuwan ma, uxe namu mooda mpsbunul uri. Yaku we mpdoi ku baga dseediq mu mplatac peeyah baga namu. Kiya de mpkela namu, yaku ka Utux Tmninun.”
Currently Selected:
Yexejqel 13: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
