Yexejqel 12
12
Mgseediq Qnerac ka Mpgeela Kari
1Meyah kenan ka kari Utux Tmninun, 2“Laqi seediq! Gaga su meeniq sapah dmptbrinah ka isu. Ani niqan doriq ka dheya we, uxe mpqita. Ani niqan birac ka dheya we, uxe mpqbahang. Ado sapah dmptbrinah ka dheya. 3Maanu so kiya de, laqi seediq! Gbuli ka qyqeya ddoyun su qnrapan ma, peeyah berah daha mlatac diyan. Peeyah berah daha mlatac nniqan su ma, osa theruy icil. Ani ya sapah dmptbrinah ka dheya we, nhuwa mkela lmngelung ka dheya. 4Ngali diyan so berah daha ka qyqeya qnrapan su daha. Keeman de platac peeyah berah daha, pntena so seediq qnrapan mlatac ka isu. 5Asi gblingi berah daha, ka qnabil ma, pooda gnblingan hiya madis ngerac qyqeya. 6Keeman ciida, kiya ka berah bale daha, pheli ahing ka qyqeya ma, qrengi ka dqeras su ma, iya qita dxeral. Ado pnskraya mu sapah Israel ka isu.”
7Kiya de muyu ku rnengo na moda. Diyan han we, ngalun mu ka qyqeya ddooyun de qrapan. Keeman de, gblingan mu baga kmari ka qnabil. Mnkuung de, phelun mu ahing moda berah daha madis nganguc.
8Mgrebu so kusun, meyah kenan ka kari Utux Tmninun. 9“Laqi seediq! Sapah Israel. Kiya ka sapah dmptbrinah. Uxe su na knesa smiling: ‘Gaga su hmuwa?’ 10Rngagi ka dheya: ‘So nii ka kari na Utux Tmninun Bukung. Kari nii we quri dqbsuran Yerusalem ma kana sapah Israel gaga meniq hiya ka nii.’ 11Rengo so nii ka isu: ‘Yaku we pnskraya pnlaale namu, so manu ka noda mu we, mpkeso uri ka ddaun namu smterung. Qrapun madis ka dheya ma, ngalun daha.’ 12Qbsuran ckceka daha duri we, mpheal qyqeya daha ma desun daha nganguc de keeman. Gblingun dheya ka qnabil ma mplatac peeyah hiya. Bungun na ka dqeras na, ini qita dxeral. 13Qada mu bobo heyi na ka tlenga mu ma, mptgdiyal tnraki mu ka heya. Aadis mu Babirun dxeral seediq Krdiya ka heya. Ini qita dxeral kiya ka heya ma, huqil hiya di. 14Pkrehak mu ani inu ka kana gaga meniq mtqiri na mdayo heya ma, kana dsupi na. Hgeluq mu hlmadac ma mpbhero ku dheya uri. 15Pkrehak ku dheya ckceka dqqlhangan ma dseediq ciida, mpkeela ka dheya, yaku ka Utux Tmninun. 16Kiya de ckceka daha we uxe pkpiya ka rngiun mu ma, uxe mu pdaun pqraqil hlmadac, krayan ma mnarux punu ka dheya. Dheya nii ka ani maanu pqnqihun noda daha we prngagun mu dheya nanak ckceka seediq kana qlhangan ndaan daha. So kiya de, mpkela ka dheya, yaku ka Utux Tmninun.”
Pkrkerang ka Mpgeela Pnskraya
17Meyah kenan ka kari Utux Tmninun, 18“Laqi seediq! Mpkrkerang su de mekan su ido, mpkiicu su ma mpslngelung su de mimah su qsiya. 19Rngagi ka seediq dxeral nii: Utux Tmninun Bukung we so nii kari na seediq Yerusalem dxeral Israel. Mpqnaqah kuxul de mekan ido ciida ka dheya ma, mpslngelung de mimah qsiya ciida ka dheya. Ado sgcuqi pkdira noda dseediq ckceka hiya ma, maha sqada ma uka ani maanu ka dxeral nii. 20Sqada uxe sbgrnahun ka lualang nniqan seediq ma, laxan uka rrihan ka dxeral. Kiya de klaun namu, yaku ka Utux Tmninun.”
Kari Pncugil ma Kari Bale
21Meyah kenan ka kari Utux Tmninun, 22“Laqi seediq! Ma niqan kari so nii ka rnengo seediq meniq dxeral Israel: ‘Sqndisan ka ali, wada uka ka qnita so tuutux’ ho? 23Maanu so kiya de rngagi ka dheya: ‘So nii ka kari Utux Tmninun Bukung, qada mu ka kari pncugil nii. Uxe mprengo kari so nii ka ckceka Israel.’ Kiya de rngagi so nii ka dheya: ‘Daling ka ali ma ida mpbale ka qntaan so tuutux.’ 24Bobo na nii de, mpuuka sapah Israel ka qmita so tuutux skbrhuwan ma mpsbunul mberiq. 25Yaku, Utux Tmninun ka mprengo, rnengo mu we, mpbale ma uxe mplgila. Yamu sapah mptbrinah! Maha mpbale ka kari rnengo mu meniq namu muudus ciida. Rnengo Utux Tmninun Bukung ka nii.”
26Meyah kenan ka kari Utux Tmninun, 27“Laqi Seediq, qtai! Rmengo ka dseediq sapah Israel: ‘Qnita na so tuutux we oda bobo na bsiyaq ali hiti ka kiya. Rnengo na kari pgeela we meeyah nexal ka kiya.’ 28Maanu so kiya de rngagi ka dheya: ‘So nii kari na ka Utux Tmninun, kari mu we, uxe mptgila ma, ida maha mpbale.’ Rnengo Utux Tmninun Bukung ka nii.”
Currently Selected:
Yexejqel 12: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
